Sapaat maajip ulluisa aqqaneq-aappaat T-41-p meerartai Ilulissani pissartanngorniutereerlutik angerlamut apuupput. Angajoqqaanit nunaqqataasunillu tikilluaqquneqangaarlutik niuffiorneqarput qummoroortarneqarlunilu.
Maajip ulluini 9., 10. aamma 11. maj 2024 Aalasa Cup Ilulissani ingerlanneqarpoq. Tupilak 41-miik meeqqat 60-t paarsisullu 20 missaat Aasianniit Ilulissanut angalapput.
Angusat
Unammiuaarneq naammassilluarpoq. U7 sølvinnapput, U9 bronzennapput, U11 4-nngorput, U11 niviarsiaqqat sølvinnapput, U13 guldinnapput.
Paarsisut ilaat Regine Lundblad oqaluttuarpoq: Angalaneq ataatsimut isigalugu ingerlalluarpoq. Angallassagut pikkoreqaat. Ukiorpassuarni niviarsiaqqat imminnut holdiunikuunatik holdiupput. Tulluusimaarnaqaat takutitsilluarlutik. Meerartagut timersortartorpalaartumik takutitsipput. Kammalaatitaartorput nuannisarrallutillu.
Illoqarfiit peqataatitaqartut
Aalasa Cup Ilulissani ingerlanneqarmat illoqarfiit makku peqataatitaqarput:
Qaanaaq QSC, Upernavik UB 83, Uummannaq UB 68, Qeqertarsuaq Dis-76, Ilulissat I69 aamma N-48, Qasigiannguit K-45, Aasiaat T-41, Sisimiut SAK, Maniitsoq K37.
