Pingasunngornermi marsip ulluisa 20-anni 2024 Kommune Qeqertalik aamma Kalaallit Nunaanni Timersoqatigiit Kattuffiat suleqatigiinnissamik isumaqatigiissuteqarlutik atsioqatigiipput.
Isumaqatigiissutigineqartut pingasut
1. Kommune Qeqertalimmi innuttaasut kikkulluunniit najukkami timersornissamut neqeroorutit ajornaatsumik peqqissuunissamut, timersornissamut kikkunnillu tamanik inissaqartitsilluni ataatsimoorfinnut peqataanissamut periarfissaqassasut.
2. Innuttaasut timersornerulernermik, atugassaarnerulernermik peqqinnerulernermillu angusaqarfiusunik avatangiiseqartinnissaat
3. Kinguaarit timersornikkut ataatsimoorfeqartilerlugit
Suleqatigiinnissamut isumaqatigiissutip suleqatigiit siunissami qaninnerusumi suleqatigiinnissamik siunertaqarnerat taamaallaat naqissuserpaa, suleqatigiit tamatuma kingorna suleqatigiinnermi sinaakkutissanik aalajangersisunik tigussaasunik isumaqatigiissuteqarniarumaarput.
Borgmester Ane Hansenip nuannaarutigaa Kommune Qeqertalik Timersoqatigiiffiit kattuffiat peqatigalugu meeqqat inuusuttuaqqat utoqqaallu pingartillugit suliniuteqarfiuniarmata. ”Tamatuma saniatigut innuttaasut aalanerulernissamik kissaataat sutigut tamatigut qitiuvoq timersornikkullu peqatigiiffiit qanimut suleqatiginerisa siuariartorfiunerat isumaqatigiissut aqqutigalugu nukittorsaqqissuarput”.
”Isumaqatigiissut sumiiffimmut tulluarsagaq aqqutingalugu peqqinnartumik ataatsimoorfinnik nunatsinni pilersitsiniarnitsinnut annertuumik alloriartitsivoq, Timersoqatigiit Kattuffianniillu qilanaarpugut Kommune Qeqertalik suleqatingalugu 2030-imi nunarsuarmi timimik aalatitsinerpaanngornissaq anguniarlugu”. Taamak Timersoqatigiit Kattuffianni siulersuisunut ilaarsortaq Frederik Lundblad oqarpoq.
Aasianni meeqqeriviit kommunep allaffiata silataani Oqilaatsukkut peqatigalugit timersornermik takutitsipput
Kommune Qeqertaliup Kalaallit Nunaanni Timersoqatigiit Kattuffiannik timimik aalatitsinerunissamik isumaqatigiissummik atsioqateqarnissaanut atatillugu, Aasiaanni meeqqeriviit arlaqartut ataatsimoorlutik, Aasianni utoqqaat peqatigiiffiat Oqilaatsoq peqatigalugu Kommune Qeqertaliup allaffissuata silataani timersoqatigiillutik takutitsipput.
Tassa Aasianni meeqqeriviit Oqilaatsukkullu pisuttuaqatigiittarput, timersoqatigiillutik allatullu imminnut aliikkusersoqatigiittarlutik. Ullumillu pingasunngornermi pisuttuaqatigiittussaanertik atorluarlugu kommunep allaffissuata silataani timersoqatigiillutik takutitsipput.
