Kingullermik Qasigiannguani ukiut marluk-pingasut matuma siorna inunngortoqarpoq.
Ullutsinni qaqutiguulernikuuvoq illoqarfinni mikinerusuni inunngortoqartarnera. Tassa avannaani naartusut amerlanerpaat Ilulissanut erniartortinneqartarput. Nakkutigisariaqarnerusullu Nuummut erniartortinneqartarlutik. Ippassarli allarluinnarmik pisoqarpoq, tassa sapaat februaarip isikkarnanni 2024 Qasigiannguani nukappiarannguamik ullaakkut 05.15 missaani inunngortoqarpoq. Nukappiaraq anaananilu peqqipput. Ullumikkut februaarip 12-ianni anaanaa Konny Lundblad ilanilu Nuummukartussaagaluarput erniartorluni. Nuununnguarli Qasigiarmioorusussimagami ippassaq sapaammi inunngorpoq. Qujanartumik massakkut Qasigiannguani nakorsaq ukiuni 25-ni ernisunut nakorsatut misilittagaqartuuvoq. Taamaammat ernumananngitsumik ernisinnaasimalluni.
Meerartaartut Konny Lundblad aamma Jens-Isak Storch, aleqanngortorlu Aimie Petersen, ilaqutaasullumi tamaasa Kommune Qeqertalimmiit pilluaqquagut.