Tallimanngorneq januaarip ulluisa aqqaneq-aappaanni Kommune Qeqertalimmi borgmesteri Suliffeqarfinnut namminersortunut, pisortaqarfinni suliffeqarfinnut peqatigiiffinnullu ukiortaami ilassinnippoq. Tassani Kommune Qeqertalimmi illoqarfiit nunaqarfiillu tamarmik attaveqaat Teams atorlugu peqataapput.
Borgmesterip oqalugiarnermi ilaatigut makku tikippai:
Kommune Qeqertalimmi atuarfigissaanerit, meeqqeriviliortiternerit nangeqqinneqassapput. Tassa kommunalbestyrelsi ukioq manna aalajangersimammat sanaartornermut 50 mio. koruunit atorneqassasut. Taassuma saniatigut sanaartornermi aningaasaateqarfimmik ukiut marluk matuma siorna Kommune Qeqertalik pilersitsisimavoq. Taamaalilluni taakku ilanngukkaanni ukioq manna katillugit 109 mio. koruunit angullugit sanaartornermut atorneqarsinnaalersimallutik.
Qeqertalik Business Council ukiunut tulliuttunut sisamanut isumaqatigiissusiorfigineqarpoq. Taassuma inuussutissarsiornikkut siuarsaaneq ingerlatiutigalugu takornariaqarnermut inerisaaneq ingerlatissavaa. Kommune Qeqertaliup aammalu Qeqqata Kommuniata suleqatigiissutigisaat Nuna Allanngutsaaliugaq Nunalerinermut, Imminut Pilersornermut, Nukissiuutinut, Avatangiisunullu Naalakkersuisup saaffiginnissutaat ilassilluarlugu 8.1 mio. koruuninik aningaasaliiffigisimammagu qutsavigaa. Kommune Qeqertalik ukioq manna akileraarutinik %-inik marlunnik appaavoq makku siunertaralugit: innuttaasut aningaasarsiakinnerusunut akit qaffakkaluttuinnarnerini ikorfartuinertut siunertaqarpoq, aappaattullu Kommune Qeqertalimmut nutserfigiuminarsaanertut siunertaavoq, kiisalu pingajussaattut suliffeqarfiit angerlarsimaffissaattut orniginarsaanerulluni.
ESANI eqqarsaatigalugu suliassat ilagaat angerlarsimaffitsinni eqqagassanik immikkoortiterisarnerup aallartisarnissaa.
Borgmesteri tikilluaqqusilluni oqaaseqareermat Nunalerinermut, Imminut Pilersornermut, Nukissiuutinut Avatangiisinullu Naalakkersuisoq Kalistat Lund oqaaseqarpoq. Taassuma erngup nukinganik innaallagissiorfiliassaq pillugu tusarniaasoqarnera oqaluttuaraa. Taannalu pereerpat suliariumannittussarsiuussineq ingerlanneqartussaasoq eqqaavaa. Taamaalilluni 2026-p aallartinnerani sanaartorneqalernissaa aallartinneqarumaarpoq, taava 2030 missarluinnaani allamik pisoqanngippat erngup nukinganik innaallagissiorfik atulersinnaasoq naggasiutigaa. Aamma Nuna Allanngutsaaliugaq Qeqqata Kommunia suleqatigalugu Kalistap aamma taallatsiarpaa. Aammalu eqqagassalerinermut suliffeqarfik ESANI aamma ingerlaqqissasoq oqaatigaa.
Kalistat Lund oqaaseqareermat eqqagassalerinermut suliffeqarfiup ESANI-p siulersuisuini siulittaasoq Nicolai Odgaard Jensen oqaaseqarpoq.
Nicolai Odgaard Jensenip oqalugiarnermini eqqaavaa ESANI eqqagassanik ikuallassinnaasunik assartuinermi suliniutissaminnut killiffik, aamma Kommune Qeqertalik eqqaaveqarfinnik katersuivinnillu pitsanngorsaanissaanut siunnersortaraa oqaatigaa. Ukiorlu nutaaq periarfissarpassualik, piujuaannartitsineq ESANI-llu aammalu Kommune Qeqertaliup suleqatigiilluaqqinnerunissaat kissaatigalugu.
Oqaaseqartussat tamarmik oqaaseqareermata qaaqqusat sassaalliutigineqartunik takannaarneqarput.
Aaqqissuussaq oqitsumik nuannaffiulluni ingerlanneqarpoq.
