Ullumikkut ataatsimeersuarnermi qulequtarineqarpoq: Meeqqat inuusuttullu sunngiffimmi toqqissisimasumik ineriartorfiusumillu sammisassaqarfeqartinneqartarnissaat.
Aviaja Pregaard ataatsimeersuarnermi aqutsisuuvoq.
Maliina Abelsen UNICEF-ip Kalaallit Nunaanni pisortaa ammaavoq. Taassuma inuusuttuaqqat sulilluarnissaannik kissaappai. Ilaatigut oqarluni ataatsimoorneq nukissanik katerfissiusartoq, ineriartorfiusartoq, aamma ataatsimoorneq pinaveersaartitsinertut aamma atorneqarsinnaasoq. Naggataatigullu inuusuttuaqqat inuusuttuaraqatiminnik kiserliortunik naammattoorsissagaluarpata sammisaqaqatigiiffimminnut tikilluaqqusillutik qaaqqusisassasut. Minnerunngitsumillu ullumikkut eqqartorneqartut novembarip 24-anni Naalakkersuisunut, borgmesterinut kommunalbestyrelsimi ilaasortat, atuarfinnut angajoqqaanullu tunniunneqartussaasut erseqqissarpaa.
Rasmine Hansen MIO-mi allaffimmi pisortaq aamma oqaaseqarpoq. Taassuma malugeqquaa inersimasoqartoq meeqqat pisinnaatitaaffiinik paatsoorsinnaasartunik. Angalanermilli ilaanni Inuusuttuarannguup assiliaaqqamik tigusilluni assersuutigisimaa aamma assersuutaa oqaluttuaraa: Assiliaaqqamiipput tummeqqat. Taakkulu atorlugit qummukartoqartarpoq, qummullu apuunniaraanni sukataartoqartariaqarpoq. Imminut upperaluni tatigalunilu.
Ataatsimoorfik toqqissimasoq aamma ineriartorfiusartoq Rasminep tikkuarpaa.
Qulequttanut oqallinnerit tallimanut agguataarlugit eqimattani oqallissutigineqarput:
Oqaluuserisat
Oqallinneq 1:Sunngiffimmi sammisassat, Sunngiffimmi sammisaqarnerup iluaqutaa sunaava? Sunngiffimmi sammisassat naammanginarpat? Sunngiffimi sammisassaqartarnermi suna pingaarnerpaava? Sooruna taanna pingaarnerpaasoq?
Oqallinneq 2: Ataatsicmoorfissaq ornittagaq toqqissisimanartoq qanoq takorluugarivisiuk? Ornittagaqarnissaq sooq pisariaqarpa? Ornittagaq toqqissisimanartoq suusinnaava, qanoq ittuusinnaava? Inuusuttunut tulluartunik pilersitsinissamut klubråd aqqutissaalluarput.
Oqallinneq 3: Ornittagaq sammisassaqartitsivilluunniit tamanut atorneqarsiinnaasoq qanorittuua? Sunngiffimmi sammisassaqarfiit sorliit ukioqatissinni amigaatigineqarpat? Sunngiffimmi sammisassaq sunaasinnaava?
Oqallinneq 4: Ataatsimoorfissanik pilersitsissangutta, sunngiffimmi sammisassanik, tamanut nalequnilu orninneqarsinnaasumik. Qanoq iliorsinnaavit? Angajoqqaasi qanoq iliorsinnaappat? Atuarfik qanoq iliorsinnaava? Kommuuni qanoq iliorsinnaava? Naalakkersuisut qanoq iliorsinnaappat?
Oqallinneq 5: – Innersuutinik isumaqatigiinniarneq Suut pisariaqartippisigit? Meeqqanik inuusuttunillu? Angajoqqaassinniit, Atuarfimmiit, Kommunimiit, Naalakkersuisut.
Novemberip 24.ni nal. 16:00 aalajangersagaq – Meeqqat innersuutaat Naalakkersuisunut Borgmesterinullu tunniunneqassaaq.
Kommunet meeqqaniit siunnersorneqarnissartik aamma pisariaqartittarpaat
Kommune Qeqertalimmi borgmester Ane Hansen NAKUUSA-p ataatsimeersuarnerani oqaaseqarnermini naggataata tungaatigut oqaatigaa meeqqat inuusuttullu nutarterutissanik naleqqussagassanillu tikkuussinissaat qilanaarineqartoq. Kommunemmi meeqqanit siunnersorneqartarnissartik pisariaqartittarpaat, taakkuummata kommunet eqqumaffiginngisaannik meeqqat inuusuttullu eqqummaffigisaqartartut.