Inuusuttunut inissianik Kommune Qeqertalimmi sanaartorneq aallartippoq.
Illoqarfinni isorliunerusunilu Namminersorlutik Oqartussat inissianik sanaartornerat ukiorpassuanngortuni uninngareersoq ujartuiffigisarsimasarput maanna alloriarfigineqarpoq, Namminersorlutik Oqartussaniit nalunaarutigineqartoq nuannaarutigeqaarput. Inuusuttut inissianik sanaartulerneq alloriaataavoq pingaarutilik, illoqarfinnut mikinerusunut isumalerujussuaq.
Kommune Qeqertallip Borgmesteriata Ane Hansen-ip nuannaarutigaa Kommune Qeqertalimmi illoqarfiit pingasut inuusuttunut inissialiorfiusussanngormata. Tamanna siuariaataassaaq, ukiorpassuimmi Namminersorlutik Oqartussat inissiaataasa aserfallakkaluttuinnarnerat pillugu Naalakkersuisunut saaffiginnittuarsimavugut nutaaliortoqarnissaa ujartuiffigalugu, kiisami tamanna alloriarfigineqarmat nuannaarutigeqaarput. Inissiat sanaartorneqalersut inuusuttut angajoqqaaminni suli najugaqartunut iluaqutaassapput inuunermilu imminut nappannissamut alloriaataassallutik, neriuppungalu inuusuttunut inissianik sanaartorneq nunaqarfinni isorliunerusunilu inissianik pisariaqartitatsinnik sanaartornerup aallarteqqinneranut ersiutaalluarumaartut.
Inussiarnersumik inuulluaqqusillunga
Borgmesteri
Ane Hansen
Kommune Qeqertalik