TUSAGASSIUUTINUT NALUNAARUT
Ulluni makkunani Folketingip Inatsisit atuutsinneranut ataatsimiisitaliaat nunatsinni angalavoq. Kommune Qeqertalik angallavigisaannut ilaavoq tassanilu Akunnaaq Kangaatsiaq Aasiaallu tikinneqartunut ilaallutik. Borgmester Ane Hansenip nuannaarutigaa Folketingip inatsisit atuutsinneqarneranut ataatsimiisitaliami ilaasortanik tikeraarneqarnertik, piffissarlu iluatsillugu Folketingimi Inatsisit atuutsinneqarneranut ataatsimiisitaliami ilaasortanut erseqqissaavoq Kangaatsiami politeeqarfeqalernissamik kissaat maanna Folketingimi ilaasortamik Aaja Chemnitzimik sulissutigineqartup piviusunngortinneqarnissaa qanoq innuttaasut toqqissisimanissaannut qanoq pingaaruteqartigisoq.
Kangaatsiaq nunaqarfiit sisamat ilanngullugit 1.111-t missaani inoqarpoq innuttaasullu toqqissisimanissaat eqqarsaatigalugu politeeqalernissaa ukiorpassuarni innuttaasunik kissaatigineqarpoq pisariaqartinneqarlunilu. Politeeqarneq innuttaasut toqqissisimanerannut pingaaruteqaannarani aamma pinaveersaartitsilluni sulianut pingaaruteqarluinnarnera ilanngullugu erseqqissaatigineqarpoq. Nuannaarutigaarpullu Folketingimi ilaasortanik Kangaatsiami politeeqarfeqalernissamik kissaat tigulluarneqarmat.
Folketingip Inatsiseqarnermut ataatsimiisitaliaata tikeraarnera ullormik ataatsimik kinguaattoorfiulaaraluarluni tikikkusunneqartut tamarmik angumerineqarput, maannalu tikeraat kommuneqarfik Sermersuumut ingerlaqqillutik.