Paulus Steenholdt 24 oktober 1939-mi Qeqertarsuatsiani inunngorpoq toqullunilu 5. juli 2023 Kangaatsiami angerlarsimaffimminni.
Paulus Steenholdt 1997-imiit 2001-p tungaanut Kangaatsiami borgmesteriuvoq Partii Siumut tunuliaqutigalugu.
Paulus Steenholdt 1983-imiit 1993-ip tungaanut kommunalbestyrelsemi ilaasortaavoq tamatumalu kingorna 1997-imi qinigaaqqikkami 2001-p tungaanut borgmesteriulluni.
Paulus 1960-ikkunnili peqatigiiffinni assigiinngitsuni suleqataasarpoq, Paalup pingartitaasa ilagilluinnarpaat meeqqat atuartitaanerat ilinniagaqarnissaallu, Kangaatsiap atuarfittaarnissaa noqqaassutigiuarsimasaasa ilagaat aammalu nunaqarfiit Kangaatsiap eqqaaniittut meeqqat angajulliit eqqarsaatigalugit kolligiaqarnikkut piorsaasoqarnissaa pingaartissimallugu.
Paalu Kangaatsiaq meeqqat atuarfittaarmat atissaanik siunnersuuteqartunut ilaavoq, atuarfillu atserneqarpoq siunnersuutaa aallaavigalugu tassalu Atuarfik Iperartarfik. Aterlu taanna isumaqartippaa
maanna meeqqat atuarfittaavata toqqavia qanga siulitta qullissiutiminnut iperartarfigisarsimavaat, isumaalu ima nangippaa iperaq tassaasoq siunissamik qaamasumik angusaqarluarnissamillu tikkuussisoq.
Paalu kommunit 18-iugallarmata Qeqertarsuullu borgmesterertaava Maliinannguaq Marcussen Mølgård uangalu Aasianni inuusuttunguulluta 1997-imi borgmesterinngoqatigaarput, Paalullu
isumassortarsimavaatigut inussiarnersuulluni oqaloqatigiuminarlunilu assullu immitsinnut aliikkutariittarsimavugut politikkernitta saniatigut.
Paalup pingaartitarai siunissami kalaallit ilinniarluarsimalernissaat pitsaasumik tungavissinneqassasut, kiisalu inuutissarsiutinut nutaanut malinnaasoqassasoq soorlu takornariartitsinermut assigisaanullu. Paalup aamma pingaartitaraa siulitta oqaluttuarisaanerat tunngavittut eqqaamaneqartuassasoq taamaattumillu kissaatigiuarpaa Kangaatsiap eqqaatalu oqaluttuassartai pillugit Kangaatsiaq katersugaasivittaassasoq.
Paalup qitornai kinguaavilu misiginneqatigeqaagut eqqaamanninnerpullu ugguuna apuupparput, Paalup eqqaaneqarnera ataqqinartuujuassaaq.
Inussiarnersumik inuulluaqqusillunga
Ane Hansen, Kommune Qeqertallip borgmesteria.