Qasigiannguit Borgmestererisimasaat Kaaleeraq Heilmann toqukkut qimaguppoq
Kaaleeraq septembarip sisamaani 1942-mi Qullissani inunngorpoq. Qasigiannguanilu juulip 18-ianni 2023-mi toqukkut qimaguppoq.
Kaaleeraq Heilmann Qasigiannguit kommunalbestyrelsiani 1975-imiit 1997-simut sinniisutut inissisimasarsimavoq 1997-simiit 2001-imut kommunalbestyrelsimut qinigaavoq borgmesterinngorlunilu.
Ukiorpassuarni Raajarniat Peqatigiiffianni KNAPK-milu suleqataasimavoq.
Utoqqaat peqatigiiffiani peqataalluartartuuvoq, utoqqaqatigiinni ataatsimuualaarneq pingaartillugu peqataasarluni. Kaaleeraq inuk qiimasuungami illarneq nuannaarnerlu pingaartitaraa. Taamatullu utoqqaqatigiinni qiimmassaasuusarluni. 2023-mi utoqqaat siunnersuisoqatigiivi pilersinneqarmata Qasigiannguaniik qiningaalluni ivertinneqarpoq. Kingornali napparsimalernini pissutigalugu sinniisumi isertinnissaa kissaatigisimavaa.
Kaaleeraq Heilmann Inatsisartut Siulittaasuannit Kim Kielsenimit decembarip ulluisa 8-nni 2022-mi sølviusumik Nersornaaserneqarpoq. Tamannalu Qasigiannguani Hotel Diskobayimi nalliuttorsiorpalaartumik malunnartinneqarpoq.
Kaaleeraq Heilmann aalisarnikkut Qasigiannguanilu borgmesteriunermini najukkami politikkikkut ingerlatsinermi malunnaatilimmik tunniussimallunilu suliniuteqarsimanera pissutigalugit nersorniarneqarpoq. Kaaleeraq sinerissap qanittuani raajarniarnermik ingerlataqarpoq, tassanilu soraarninngornissami tungaanut eqeersimaarluni aalisartuuvoq. 1973-1981 KNAPP-mi siulersuisuunerini ilaasortaavoq. 1985-1999 KNAPK-p siulersuisuunerini ilaasortaavoq, taavalu 1989-imiit 1999-imut kattuffimmi siulittaasup tulliatut inissisimavoq.
Kaaleeraq Heilmann ulloq 15. november 2021-mi Niels Carlo Heilmannip Aningaasaateqarfianiit maligassiuilluarsimasutut nersornaaserneqarpoq.
Kaaleeqqap qimatai, nulia, meerai, ernutai ernutaqqiutaalu qamannga pisumik misiginneqatigaavut. Kaaleeqqap eqqaaneqarnera ataqqinartuuli.
Borgmester Ane Hansen
Kommune Qeqertalik