Sisamanngorneq juunip ulluisa 15-ianni Gammeqarfimmi atuartut angajulliit allagartartaartinneqarput.
Soorunami aamma akissarsisitsisoqarpoq ukununnga:
• Karakteriginnerpaaq
Nora Dahl Josefsen
Ivik Sandgreen Olsen
• Atuarfiusumi atuartuaannartoq inortuineq ajortoq
Ulloriaq Nielsen Jensen
Angusat, misilittakkat inerisagassallu Gammeqarfimmi atuarfiup pisortaata Ajaaja Rosingip atuartut angajulliit naggataarneranni ilaatigut ima oqariartorfigai:
- Meeqqat atuarfiani atuarnissinni makkua angusimavasi imaluunniit misilittagarilerpasi:
• Namminersortumik eqqarsarsinnaanngorsimavusi
• Isummersinnaassuseqarnermik piginnaassutsisi ineriartortissimavasi aammalu isummassinnik,
nammineq isiginnittaatsissinnik misigissutsissinnillu oqaatiginnissinnaassuseqarnersi
siuarsarsimavarsi.
• Amerlanertigut anguniakkassinnik angusiniarsinnaassuseqarluarpusi.
• Siuarsakkassi ilagaat naleqqussarluni allanngortitseriarsinnaaneq
• Pilersitsisinnaaneq aamma piginnaanngorsarfigeqaarsi
Atuarfimmi atuarnissinni makkua pingaartissimavagut imminut naleqartillusi inuussasusi, imminut tatigalusi inuussasusi aammalu atuaqatissinnik ilinniartitsisunillu suleqateqarsinnaalissasusi. Pingaarutilinnut ilaavoq akisussaassuseqarluartuunissarsi kiisalu ataqqinninnermik ineriartortitsisinnaanngussasusi. Inuiaqatigiinni kinaassusersi aammalu kulturimik pingaartitassinnillu paasisimasaqarnersi ilisimasatigut toqqammavilerusussimaqaarput nammineq ingerlaqqillusi ilusilersoqqissinnaaniassagassiuk. Inuiaat allat kulturiinik ilisimasaqalernissamut paasisimasaqalernissamullu aqqutissiuussissammat. Toqqammaviit sinaakkusiukkusussimasagut qanortoq inuiaqatigiinni oqartussaaqataanermik eqqarsartaatsissigut iseriartuaartikkisigit – taamaaliorussimi ilikkassuarsi inuiaqatigiinni oqartussaaqataallusi, pisinnaatitaaffeqarlusi aammalu inuiaqatigiittut ineriartortitseqataanissamut pisussaaffeqarlusi pinngortitamullu pinnersumut naleqqussarlusi inooqataallusi. Taama oqarpoq Gammeqarfimmi atuarfip pisortaa Ajaaja Rosing.
Imminut napatinneq tassaannaanngilaq imminut naammagisimaarneq
Atuarfiup siulersuisuini siulittaasoq Dorthea Siegstad aamma atuarfimmik naammassinnittunut ilaatigut ima oqaaseqarpoq: - Kaammattuutigissuara immissinnut napatinnissarsi tamassi sulissutigissagissi, inuussutissarsiut nuannarisarsi, ilinngiagaq soqutigisarsi kinaassusissinnut tulluuttoq toqqarisiuk. Inuussutissarsiut ilinniagarluunniit sorliunersoq apeqqutaanngilaq tamassi inuiaqatigiinni atorfissaqartinneqarpusi. Uanili pingaarnerpaavoq inuunissinni ilissinnut naammagisimaarlusi pinissarsi, tassaniikkussi inuussutissarsiummi suliffimmiluunniit ineriartortitsiuarnissarsi qularinngilara. Imminut napatinneq tassaannaanngilaq imminut naammagisimaarneq, sulimillu ineriartortitsineq, kisianni aamma taannaavoq kiffaanngissutsimik inummut tunisisartoq. Taama ilaatigut oqarpoq Gammeqarfimmi siulersuisini siulittaasoq Dorthea Siegstad.
Ulloq annaasinnaasarparsi
10. K-mi atuartunut ilinniartitsoq Dorthe ilaatigut oqalugiarnermi oqarpoq: - Nipilersornermik soqutigisaqartuunissi ilaatigut nipilersorneq aqqutigalugu ulloq annaassinnaasarparsi.
Tassa atuartut ataatsimoorneranni nipilersuutinik ajutoornerup kingorna 10. klassemi atuartut atuarfiup nipilersuutai atorlugit appisimaartarmata.
10. L-imi ilinniartitsisoq Kristine aamma oqaaseqarnermi eqqaavaa atuartut allagartaq tigusartik tassa siunissami atugassarigaat. Nassuerutigalugulu nammineq ullut ilaanni qialaartarluni atuartitami siunissaat eqqarsaatigileraangamiuk.
Paggaa
Soorunami aamma naggataatigut angajoqqaanit, aanaakkunnit ilaqutaasuniillu paggatsitsisoqarpoq.
