Aasianni innarluutillit ineqarfissaat ukiorpassuit pilersaarutigineqareersimalluni piareerluni atoqqaartinneqarpoq.
Ukiut 30-t sinnerlugit kommunalbestyrelsemi akuerisaasaraluarluni ukiulli tulliani aningaasartuutissat tikinneqaraangata kinguartinneqartareerluni kiisami 2018-imi akuerineqarluni pilersaarusiorneqalerluni aallartisarneqalerpoq. Sanaartorneq 2020-mi aallartinneqarpoq. Ullumikkullu maajip sisamaani 2023 atoqqaarfissiortinneqarpoq.
– Eqqaamavara kommunalbestyrelsemut ilannguteqqaarama siunnersuutima siunnersuutillu allat ilaaniittuartartoq isumaqatigineqartarpoq sanartornissamulli aningaasartai tikinneqaraagata aningaasartuutissat allat pillugit kinguartinneqartuartartoq, taama eqqaamasalersaarpoq borgemster Ane Hansen.
Kommunalbestyrelsip ataatsimorluni pingartitaraa Kommune Qeqertalimmi innarluutilittagut naliginnaasumik inuuneqarnissamut aqqutissiunneqartuassasut. Innarluutillit 18-it ineqarfissami inissaqartinneqarput, timigissartaqarfeqassaaq, assassortarfeqarluni, inimillu aamma ataatsimoorfiusinnaasumik peqarluni. Tassa ineqartut tamarmik immikkut ineqassapput, marluk utoqqartaasumut immikkullu pisariaqartitsisunut naatsorsuussaapput, tassa iggaveqarluni, køleskab, qerititsivik, erruiveqarpoq uffarfeqarlunilu. Sinneri iniupput marlukkarlutik ataatsimut uffarfeqartut. Ataatsimut iggaveqarpoq aamma.
Ataatsimiititaliami siulittaasoq Niels Kristensen oqarpoq: - Utaqqisarput. Ineqartussat quttannaqaat, kiisami ataatsimoorlutik inissaqalerput.
Init nutaaliaapput qaamallutik avamullu illorsuaq assut isikkvigillutik.
