Kommune Qeqertalik Qasigiannguani pisortaqatigiit marlunngorneq 21. februar 2023 ataatsimeeqatigiinneranni ilaatigut Qasigiannguani pimmatiginnittarneq akiorniarlugu suliniutissat piareersarlugit aallartippaat.
Pimmatiginninneq Qasigiannguani annertuumik ajornartorsiutitut isigineqarpoq.
Maannamut suliniutaasimasut naammaginartumik kinguneqartarsimanngillat.
Ullormut oqalusserisassani immikkortup saqqummiunnerani suliarineranilu eqqersimaartumik anguniagaqarusussusermillu oqallinneq ingerlanneqarpoq.
Qasigiannguani Juunarsip Atuarfiani meeqqat akornanni pimmatiginnittarneq qitiutillugu pilotprojektitut aaqqissuussaalluartumik ataqatigiissaarluartumillu aallarniutigineqassaaq.
Kingornatigut suliniut ataqatigiissarluakkamik aaqqissuussaalluakkamillu siammarneqassaaq, meeraaqqerivinni, meeqqerivinni pimmatiginninnermut akiuinermi suliniut allaartinneqassalluni, atuarfimmut ikaarsaannginneranni suliniuteqarfigereerneqartarlutik, atuarfimmiilernermi annertusisamik ingerlaavartumillu ukioqatigiiaat akimorlugit pinaveersaartitsineq ingerlanneqartussanngorlugu, atuareernerullu kingorna fritidsklubbi, juniorklubbi, orninneqartartullu allat, Timersortarfik, Katersortarfik, Katersugaasivik il.il. pimmatiginninneq akiorniarlugu ataqatigiissumik periusissianik, suleriusissianik, suullu pimmatiginninnerup akiornissaanut pinaveersaartitsinermilu sakkugineqartussat pillugit arbejdsgruppimik pilersitsisoqarpoq kommunip suliffeqarfiiniit tallimanik ilaasortalimmik.
Arbejdsgruppilu pimmatiginnittarnerup akiornissaanut pinaveersaartitsinermilu qulaani taaneqareersut ingerlaavarnissaasa qulakkeernissaasa saniatigut suliniutigineqartussat ingarlaavartumik nalilersuisarnissaanik nalimmassaasarnissaanik, suliniummullu tunngatillugu ataatsimiigiaqqusisarnissanut aggersaasartussanngorlugu piginnaassuserneqarpoq.
Eqimattanngorluni suliniutissaq oqallisigineqareernerani saqqummiussisoqarnerani qitiunerusumik pimmatiginnittarnerup akiorneqarnissaanut pingaartinneqarnerusussat saqqummiunneqarput ingerlateqqinneqartussanngorlugit.
Qasigiannguani pimmatiginninnerup akiorneqarneranut pinaveersaartitsinissamilu suleqatigineqalereerput Namminersorlutik Oqartussat Pimmatiginninnerup akiorneqarneranut Immikkoortortaq, Kommune Qeqertalimmi fagkoordinatorit, suliniummilu kommunip suliffeqarfii, inunnik isumaginnittoqarfiup meeqqanut inuusuttunullu immikkoortortaa, Ilaqutarit Illuat, Utoqqaat Illuat, Majoriaq allallu attuumassuteqartut suleqatigineqassapput, taamatuttaaq Ataatsimiititaliaq Timi Tarni, Efterskole Villads Villadsen aamma Palaseqarfik, peqatigiiffiit, Qasigiannguani pinaveersaartitsinermut ataatsimiititaliaq allallu attuumassuteqarsinnaasut suleqatiserineqassallutik.
Suliniut aallartisarneqartoq pillugu bychef isumalluarpoq, suliniutillu kingunerisassai Qasigiannguani innuttaasunut naggataasumik pitsaasumik inerneqarumaartoq neriuuteqarfigalugu.
