Aasiammiu, Nivaami inunngorsimasoq, Hans Rafaelsen sivikitsumik napparsimareerluni ataasinngormat januaarip ulluisa 30-anni 2023 toqukkkut qimaguppoq.
Hans Rafaelsen ujakkaarnikkut sunniuteqarluarsimaqaaq, timersornerinnaanngitsukkulli sungiusartagarisimasaminut sunniuteqartarsimavoq. Aammali inuttut pissuserissaarnissamik, inoqammut ataqqinninnissamik allarpassuartigullu sunniuteqartarsimavoq. Timersortartuussagaannilu eqqarsaatigisassarpassuaqarpoq, soorlu, nerisaqarneq, qasuersaartarnissaq, aammalu sungiusarnerup paarilluarnissaa, soorlu aamma sungiusarpallaalinnginnissaq taamaalillugu timi ”qasutinnginnissaa”.
Ujakkaartartuutimi soqutiginnittuaannarnissaat angorusuttarpaa
Hansip ujakkaartartunik meeqqanik ilippanaatilinnik sungiusariartartoqaleraangat sapinngisani atorlugu soqutiginnittuunissaat angorusuttarpaa. Tassa sungiusartakkani atortussaaleqileraangata, nammineq piminik imaluunniit aningaasaliisinnaasunik ujaasiuttarpai, taamaalilluni sungiusakkani atortussaqarniassammat; soorlu ujakkaarutit, skistøvlit, perrassaatit allarpassuillu. Taamaalilluni sungiusartoq meeraalluni tamakkuninnga eqqasuuteqarani sungiusartuarsinnaaqqullugu. Taamaalilluni ´90-kkut aallartinneranni angajoqqaaqatigiit katersisarnermikkut aammalu sungiusartartut atorunnaakkaminnik tunniussisarnerisigut attartorneqarsinnaasunik pissaqalernikuupput. Tamakkulu atorluarneqartaqalutik.
Illoqarfimmut sunniuteqarluarsimaqaaq
Hans Rafaelsen illoqarfimmut Aasiannut sunniuteqarluarsimaqaaq. Illoqarfimmi pisartut ilaat innuttaasunit soqutigineqarluartaqisut Hans Rafaelsenip aallarneeqataaffigisimavai. Aappaa aasakkut seqernup kaaviinnaleruttorfiani ingerlanneqartarpoq, tassalu Midnightsun Marathon. Nunanit allanit peqataaffigineqartarpoq, taamaalilluni illoqarfik Aasiaat nunarsuarmioqatitsinnit ilisarisimaneqarlualersimalluni. Aappaa ukiakkut taarseruttorfiani pisarpoq, tassa juulleriartulernerani Aasiaat Timersortarfiani juullimut niuffatsitsineq ingerlanneqartarluni. Tassa inuit piffissap taarnerpaaffiani juullimut qilanaartuutissaanik Hans pilersitserusussimagami – inuit nuannaarlutik juullimut qilanaarnerussammata.
Misiginneqataangaarpugut
Aasiaat inummik maligassiusumik, ataqqinartumik sunniuteqarsimaqisumillu annaasaqarpoq. Nulia, pania, ernutaalu qamannga pisumik misiginneqatigingaarpagut, qanortorlu atugaanni artornartumi nukissaqartitaagilik.
Misiginneqatiginninnerput matumuuna ingerlateqqipparput.
Kommunalbestyrelse sinnerlugu
Borgmester
Ane Hansen