Paasissutissaq: Holder tassa unammianik angallassisoq, errortassaqarpata isumagalugit, unammilerpata pilersaarusioqatigalugit, sinaakkusersuilluta sungiusaasoq unammisartullu peqatigalugit, neriffissat, unamminnginnermi naapinnissat, nerisaqarnerup qanoq innissaannik siunnersuinerit. Tassa holderip unammiarnermi isumagisassai.
Victoriap pania Thrune Rafaelsen sulorartartutut aamma peqataavoq. Tanna Nuummiit peqataasutut nalunaarsoqqavoq, massakkut Nuummi GUX ingerlakkamiuk. Taannalu ataasiinnaanngitsumik ujaminnarpoq. Ataasiakkaarnermi 2-nngorpoq, arnat iligiiaarneranni 1-nngorlutik Emilie Sørensenilu. Akuleriit iligiiaarneranni Martin Brobergilu 3-nngorlutik.
- Peqataanera inuttut, holdlerisut sungiusaasutullu pissarsiaqarnarpoq. Soorlu ullup ingerlanissaanut aaaqqissuussinikkut, unammisartunut anguniagassaliornikkut, sungiusaasut suleqatigeeriaasiannut, inunnillu nutaanik kammattaarnikkut. Ingasappoq paniga angajulleq 2018-mi pingasunik guldinnannikuusoq ilisarisimaneqarpoq, taamaammat nukaa Tinasoritittarpoq. Angajoqqaaqatit 2018-imi peqataanikut coachitut ilisarisimalerpakka aamma paninnut angajullermut ilisarisimannilluartut. Victoria oqaluttuarpoq.
Kalaallit angusaat kusanaqaaq
- Kalaallit angusaat kusanaqaat, medaljetigullu rekordeq anguneqarluni, guldit 11, sølvit 8, bronzillu pingasut. Kiisalu Hudson Trophy kalaallinit tiguneqarluni. (Unammisartut tamarmik ataatsimut isigalugu pissuserissaarnerpaatut timersortartorpalaartutut ataqqinnittutullu nalilerneqarluta. Victoria tulluusimaarluni oqaluttuarpoq.
Fort McMurraymi atugarissaaqaagut
Canadami Fort McMurraymiinnerminni atugarisaat pillugu Victoria aperiganni ima akivoq: - Inigisarput nerisaqarnerpullu ajunngilluinnarput, nerisassarpassuit ullaakkorsiutit manniit assigiinngitsunik igaat, baconit, pølsit, naatsiaat ovnikkut ingaat, pannakaat varfilit ullaakkut kissartorineqartarput, immulertakkat assigiinngitsut, issingigassat gluteneqanngitsut uutat, naatitarpassuit toast, sandwich, sodavandit assigiinngitsut, juicit assigiinngitsut, kaagit kaagiaqqat, kakao, kaffit, tiit, suna tamarmi nalunaaqutaq kaajallallugu neriartortoqarsinnaalluni tamarmik akeqanngitsut, unnukkut igaat assigiinngitsorpassuit, naatsiiat assigiinngitsut, suaasat, toqqagassarpassuaqartarpoq. Inigisatsinni kisitta ineqartinneqarpugut, imaattaraluarput klasseværelsini ineqatigiiaat 16-ikkaarlutik, taava massakkut sakkutooqarfikumiikkatta tamatta immikkut ineeralerluta uffarfittaa marluutiinnartarlugu, affarleriit uffarfik ataaseq katuttarlugu. Assit messengerernut nassiussinnaassuakka? Inigisagut akisit qipiit qalii allarutillu pigereerneqarput, luxortitaavugut. Ullaakkulli unnukkullu bussertarneq 2 tiimip tungaanut ingerlaartaratta ingerlaakatannarsinnaasaqaaq. Victoria iluarisimaarinnilluni oqaluttuarpoq.
Kalaaliugattami aamma kalassilaartoqartarpo
- Tikikkatta opgaveliassara nassarlugu, sunaaffa adapteri putunut marluinnarnoortunut pisisimallunga, kalaaleqatikka tamaasa tusagassiortugullu apersoraluarakkit soqanngerrattut, Noah Mølgaardip oqarfigaanga Wal-Marti peqassanerarlugu, uangamingooq: aamma taanna kinaagami? Sunaaffa pisiniarfik. Sukuutsinik meeqqat sukuutsertarfianni misiliigama perrannermut napaffiorpasinngimmat rolatoriusannik atortulerlunga ingerlarpiarsinnaananga ingerlaniarsuaarama, angajoqqaat quiattarrallutik illarnartumik, meerajaraminiaranguit uannit sukkaneruluumillutik ingerlaartut.
Naggataatigut Victoria aperaara tulliani Arctic Winter Gamesertoqalerpat peqataaqqissanersoq, imalu akivoq: -Siumut aaliangertoqarsinnaanngilaq, landstrænerimik BKN badminton Kalaallit Nunaat toqqaasarami, tassa nalunartua, imminut utoqqaagilaarpunga isumaqarlungalu inuusuttut coachit holderillu aallunneqartariaqalersut. Taama naggasiivoq Victoria Rafaelsen. Naggaterpiaatigullu Victoriap suliffiani Ado Lyngep atuarfia minnerunngutsimillu ilaquttami tapersersuilluarnerat qujassutigaa.
Assinik piginnittuuvoq Victoria Rafaelsen.