Meeqqat Isummersorfiini ilaasortat decemberip ulluisa 8-anni 2022 nuna tamakkerlugu nittartakkakkut ukiumoortumik Nakuusap ingerlattagaani ataatsimeersuarnerminni isummersuutitik oqalliseqataareerlutillu aalajangiussatik, oqariartuutitik oqalugiutitut aalajangersakkatik 18. januar 2023 saqqummiunneqarpoq.
Oqariartuutit Meeqqat Isummersorfiini ilaasortat Qasigiannguaniit Zoe Thorin Nielsen oqalugiarluni aallarniilluni ima ilaatigut oqariartuuteqarpoq: "Unikaallalaaritsi, oqariartuutigullu tusarnaarlugit, pissuserisartakkat allangortinnissaat, uagut meeqqattalu inuuffissaqarnissaat, inuit tamarmik akisussaaffigaat. Immitsinnut ikiornitsinni ikiortigut. Ataatsimoorluta nukittunerussaagut."
Ilaasortap Aasianneersup Mudi Steenholdt Larsen oqariartuut nangillugu ima ilaatigut oqalugiarluni oqaaseqarpoq: "Sooruna uulia ozonimi putunik alliartortitsisoq, silaannatsinnullu ajoqutaatigisoq taamak annertutigisoq atuinnaripput?"
Ilaasortap Aasianneersup Angutitsiaq Rafaelsen oqalugiaat nangillugu ilaatigut ima oqaaseqarpoq: "Silap allanngornerujussua annilaangaginerpaavarput. Sunamita tullinnguutissava? Pinngortitarsuarput manna najugaqarfigisarput kinguaassatsinnut aamma misigitikkusoqaarput"
Kangaatsiami ilaasortap Laura Brønlund nangillugu ima ilaatigut oqariartuuteqarpoq: "Iliuutsigut allanngortinniarlugit akisussaaffimmik tigusisariaqarpugut immitsinnut ikiorniassaagut. Sooruna eqqakkat immikkoortiterneqarneq ajortut?"
Attumiit ilaasortaq Norsaq Ludvigsen ilaatigut ima oqariartuuterpoq: "Silap pissusiata allanngoriartornerata iliuuseqarfiginissaa suleqataaffigerusupparput. Suleqatigiinneq nuannaartitsisarpoq, pilluaammernartarpoq tulluusimaarnartarlunilu"
Angutitsiaq apeqqusiilluni ima oqarpoq: "Sooruna nerisassat taamak amerlatigisut igiinnarneqartartut? Nioqqutissat qaangiutilersut akikillineqarsinnaapput, tunineqanngitsoortullu meeqqerivinnut, ilinniarfeqarfinnut, angerlarsimaffeqanngitsunut, utoqqarnut, timersortarfinnut allarpassuarnullu tunniunneqarsinnaapput. Nunatsinni inuppassuit pissakilliortut nerisassat taakku iluaqutigissaqaat. Inunnut tunniunneqarsinnaanngitsut qimminut nerukkaatigineqarsinnaapput.
Mudi nangilluni ima ilaliivoq: "Immitsinnut paarigutta ikiortigiillutalu mingutsitsinngikkutta inuit akornanni nuannaarneq, tulluusimaarneq qujamasunnerlu pilersissinnaavarput."
Naggasiilluni Qeqertarsuarmi ilaasortaq Arnannguaq Wille ima oqaaseqarpoq: "Taamaammat asasagut Naalakkersuit, asasagut borgmesterit, asasagut meeqqat inuusuttullu - silap pissusiata allanngoriartornera iliuuseqarfigitigu?"
Saqqummiivigineqarpullu borgmesteri, kommunalbestyrelsemilu ilaasortat. Saqqummiinermi najuupputtaaq illoqarfiup sullivianni pisortat, Timi Tarnimi aqutsisut, Sullissivimmi sulisut, atuarfinni Nakuusaaqqami ilaasortat, minnerunngitsumillu saqqummiisut angajoqqaavi ilaqutaallu.
