Ippassaq marlunngorneq decembarip 13-ianni Iluartup Luciap ulluni Niaqornaarsummi meeqqerivik naammassilluni atoqqaarfissiorneqarpoq.
Inuit nuannaarlutik atoqqaarfissiornermut peqataapput. Meeqqat Ornittakkamiit aamma erinarsoriartorput. Marloriarlutik erinarsorput, atorlugit: Nuivoq ulloriaq aamma Nissiaqqat isaalikaseqaat.
Qiorsisoqannginnerani nunaqarfimmi aqutsisut siulittaasuata tullia Kristiane Jeremiassen oqaaseqarpoq. Oqaaseqanermini ilaatigut eqqaavaa nammineq Niaqornaarsummut nuussimallutik 1964-imi. Taamanikkut qatanngutigiit iluini angajulliit qatanngutiminnik nukarlernik paarsisartut. Tassa imaappoq, meeqqeriveqarnissaq eqqarsaataanikuunngilaq taamanikkut.
Kristiane oqaaseqareermat borgmester Ane Hansen nukappiaqqamik ikiortilerluni qiorsivoq, saniatungaannilu aamma Kirsten H. Rasmussen niviarsiaqqamik ikiortilerluni qiorsipput.
Qiorsineqareermat Niaqornaarsummiut meeqqerivimmut isernissaminnut tikilluaqquneqarput. Isaareermata borgemster Ane Hansen pilluaqqusilluni tikilluaqqusivoq.
Ane Hansen oqalugiareermat tulliulluni oqalugiarpoq Meeqqat Isummersorfianniit Laura Brønlund, Kangaatsiaminngaanneersoq oqalugiarpoq. Laurap meeraqatini sinnerlugit nuannaarutigaa meeqqeriveqalermat, aammalu meeqqat peqataatinneqarnerulernikuummata tusaaniarneqarnerulernikuummatalu. Aamma oqarpoq: “Una illoq meeqqerivissaq kusanartoq manna atorluarnissaanut ilissi inersimasut pisussaaffigilerparsi meeqqanut toqqissisimanartumik aggerfinngornissaa. Aammalu ilissi Niaqornaarsummiut pisussaaffigilerparsi illup kusanartumik erligalugu eriagalugulu aserutsaalinissaa.”
