Ukiut siuliini Ikerasaarsummi assut ajornartorsiutaalersimagaluarput nunaqarfiup iluani niviukkat, eqqakkat pissutaallutik. Sinerissami allarpassuarni aamma Ikerasaarsummi eqqakkat ikuallassinnaasut ikuallassinnaanngitsullu ataatsimut eqqarneqartarput. Eqqakkallu ikuallanneqartarallarmata niviukkat ikuallanneqarnerisalu kinguneranik pujoq illoqarfimmut annguttarnera ajornartorsiutaasimapput. Pujoq illoqarfimmut anngukkaangat qamiinnarneqartarpoq.
Taamaallunili Agnethe Inusugtok Danmarkimi feriertilluni takusaleramigit eqqakkat immikkoortiterneqartartut isumassarsiarisimavaa aamma Ikerasaarsummi taamaaliorsinnaallutik. Taamaammat nunaqarfinni aqutsisunut ilaasortanngunngikkallarami ilaasortaasoq Anthon Petersen attavigisimavaa tamanna pillugu. Siullertut igaakut immikkut eqqaavilernissaat isumassarsiarineqarpoq. Agnethelu ilaasortanngoriarami eqqakkat immikkoortinneqartalernissaat suli ineriartorteqqissimallugu. Nunaqarfimmi eqqakkanut naqiterivik atuleriarmat ikuallassinnaanngitsut immikkut eqqaaveqarnissaat isumassarsiarineqarpoq.
Tassalu nunaqarfimmi aqutsisut aningaasat aqutatik atorlugit eqqaavinnik igalaaminernut containerinik aammalu piniartut pilattarfiannut orsukunut puussanik containeriaqqanik pissarsinikkut. Eqqaaviit nalinginnaasuupput kisianni matusartuupput qajannaatsuullutillu. – Uanga nammineerlunga eqqaavimmi igalaaminikut uloriagisarakkit, taamaalilluta igalaaminikunut eqqaavinnik pissarsinikuuvugut. Taama oqarpoq Agnethe Inusugtok.Soorunami tamakku tamarmik pinnginnerini nunaqarfimmi najugaqartunut saqqummiunneqaqqaarsimapput.
Soorunami aallaqqaammut nunaqarfimmi najugaqartunit sungiukkuminaatsinneqaqqaarsimavoq, massakkulli amerlanerpaat atorluarpaat.
Suliffeqarfiit eqqaanermut peqataalluarput. KNI Pilersuisumi siullermik eqqagassat, soorlu immuit kueraqqaarnagit igiinnarneqartarput. Massakkut tamarmik kueragassat kueraqqaarlugit puukui iginneqartarput. Aammalu nunaqarfik niviugaqarpallaarunnaartoq maluginiarneqarpoq.
- Eqqakkagummi uagut nammineq pilersitaraagut, taamaammallu uagut aamma suleqataasariaqarpugut aallaqqaataaniilli. Allanut aamma atortikkusunnaqaaq, maani taamaalilluta niviukkat terissallu ajornartorsiutiginngilagut. Taama naggasiivoq Agnethe Inusugtok, nunaqarfimmi aqutsisunut ilaasortaq Ikerasaarsummiit.