Asseq nammineq pigisaq
Arfininngorneq oktobarip 22-anni 2022 nuna tamakkerlugu KNR aallakaatitsisoralugu Maligassiusut aallakaatinneqarpoq. Inissaminiilluinnartumik Hans Rafaelsen nulialu Karen Mina Clasen Maligassiusutut qujassuteqarfigineqarput.
Hans Rafaelsen meeraallunili ujakkaarneq sammisarilersimavaa. Tallimanik ukioqarluni siullerpaamik ataarutitaarpoq Thele Petersenip sanaavinik. Meeraanermini inuusuttuunerminilu timersoqatigiiffimmi Akunnaamiittumi A51-imi arsartartuuvoq, ukiukkut ujakkaarneq annermik sammisarlugu. Aasiannut nuukkamik Aasianni timersoqatigiiffimmut T-41-mut ilaasortaalerpoq, tassanilu aamma arsarnermi sungiusaasuusarsimalluni. 1991-imi T-41-mi arsarnermi sungiusaasuulluni GM naggataarnerani pissartanngorniunnermi nr. 3-nngorput.
Ujakkaarnerinnaanngitsumik inuppassuilli inooriasiannut sunngiuteqarsimaqaaq. Frederik Lundblad ´80-kkunni ´90-kkunni meeraasimasoq ilaatigut ima oqarpoq: - Nunatsinni ataartarnerup angajoqqaavisut taaneqarsinnaasut ukiuni 50 missaani kajungerisartik suleqataaffigiuarlugu. Meeraallunga eqalunniarnermi ikiortitut ilagisarusullunga angajoqqaakka aperinikuuat, kingorna paarisarlunnga ujakkaarnerullu tungaatigut tapersortarlunnga. Tamanna qujamasuutigisaqaara. Kingornami angerlarsimaffiannut pulaartarnerini oqaluasaat, isummersoqatigiinnerit, tapersersuiuarneri, kajumilersitsisarneri, nukissamik tunisiuarneri, inoqatinik ataqqinnittuunissamik pingaartitsineri, asanninnermik tunisiuarneri angusimasagut sunniuteqarsimanerilu uannut annertoqaat. Hansip oqariartuutigisartagaasa annerpaartaraat inoqatinut ataqqinnittuunissaq, tamannalu unammiannginnerit tamaasa ataatsimiinnermi uteqqiajuartarpaa Naak immitsinnut ungasikkaluarluta, tusartarnigut akuttusinnaasaraluartut isumaqassusersi millinikuunngilaq. Sungiusartarsimasaasa ilaat Frederik Lundblad ilaatigut taama allappoq.
Hans Rafaelsen Aasianni ASP-p ingerlalluarneranut sunniuteqarluarsimaqaaq. Tiimerpassuit atorlugit peqatigiiffik soqutigilluakkani pillugu suliaqartarsimaqaaq. Tamannalu pillugu paniat Alida C. Rafaelsen ima oqarpoq: - Ukiorpassuarni aningaasarsiutiginnguarnagu aqqusiortuartarpoq, naak allani illoqarfinni kommunimit akilersorneqartunik aqqusiortoqartartoq. Tiimerpassuit kisissaanngitsut aqqusiornermut atornikuuai ataartartut tamaasa atugassaqartilluarumallugit. Taama oqaluttuarpoq Hans aamma Karen Minap paniat Alida C. Rafaelsen.
Assiliisoq Frederik Lundblad
Inuuninnut pingaarutilerujussuuvoq
Kristian Kristoffersen maanna Maniitsumi najugaqartoq Hans Rafaelsen pillugu ilaatigut ima oqaluttuarpoq: - Hansi inuuninnut pingaarutilerujussuuvoq, meeraasungali annertuumik tapersersorpaanga siunnersortarlungalu. Allanngunngisaannartuuvoq tamannalu toqqissisimanaqaaq. Mikininniit atortutigut amigaateqartinneq ajorpaanga, nammineq piminik atortinngikkuninga tapersersortissarsiuuttarpaanga aningaasaliisinnaasunik. Hansi qungujunnartunik nuannarisaqarpoq, illarnissamut piaarilaarnissamullu qanittoq. Taama oqaluttuarpoq Kristian Kristoffersen
Attaasiaannarnanga nersornaaserneqarnissaanik innersuukkusuttaraluarpara
Tippu Kristensen 1990-nngorneranili peqatigiiffilerinerup tungaatigut Hans aamma Karen Mina inuttut ilisarisimannilersimavoq. Hansilu pillugu ima oqarpoq: - Assigiinngitsunut ataasiaannarnanga nersornaasigassatut innersuuttariaqarneranik oqaaseqartaraluarpunga. Assersuutigalugu soorlu Inuiattut nalliuttorsiornermi nersornaaserneqartarnermut maani Kommunetsinni, aammalu nuna tamakkerlugu ulloq taanna nersornaasiisarnermut. Tamakkununngali innersuunneqarnissaminut perusunneq ajorpoq, immaqalu uanga taamatut pineqarusunnginnera ataqqivallaartarsimavara - inuttaanut uanga nammineq ataqqinninnerujussuara peqqutaaqataasimanerluni, aammali nammineq oqartarneratut; nammineq piumassutsiminik suliniarami ataqqeqqusaarutaanngitsunik paasissagippoortarnera uniffigisarakku. Taama oqarpoq Tippu Kristensen.
Nunani allani unammisarnerpassuit
Sungiusagarpassuarisimasama angusartagaat nipaatsumik tulluusimaarutigisarpakka uannut naleqaqisut. Angusimavagummi OL, VM, Skiskydning aamma Lovlanders. GM Veteran, VM Veteran. VM peqataaffigisarneranni ikinnguterpassuaqarpunga unammisartakkannik aammalumi taakkunani ataasiarlunga nr. 3 inissiffiginikuuara. Naalagaaffiit 28 akornami uanga peqatikka 80-it missaat unammisarnikuullugit.
Ukuli eqqaamalluarneruakka immikkuullarissut 1994 -miugunarpoq Amerikkap nunarsuani. Amerikka Canadalu ataatsimut unammersuarnerni 40-44 ukiulinni nr. 3-unikuuvunga. Tamatuma saniatigut 1900 ingerlanerani Canadami Silver Spons unammissutaanerani inersimasut utoqqasaanerillu ataatsimut 15 km unammissutaanerani ilaatigut Canadami ukiup siuliani landsholdiusimasut peqataaffigisaanni unammisarpassuit akornanni ajugaanikuuvunga tupaallaataasumik. Minikkusunngilaralu Veteran VM Norgemi ingerlanneqarnerani naalagaaffiit 28 peqataaffigisaanni stafetimi qallunnaat pitsaanerpaat pingasut peqatigalugit kingullertut ingerlaartuullunga nr. 3-nngornerput, taakkua pingasut unammisartuuninni puigunaatsut ilagilluinnarpaat naak nunatsinni pissartanngoqqaartalerama nuannersimaqisoq, sulimi nuannertarpoq taamaattorli naluinnarpara qasseriaqalunga pissartaasimanerlunga. Taama oqaluttuarpoq Hans Rafaelsen
Assimik piginnittoq Kristian Kristoffersen
Inuit qungujullutik kiinnertarnerat akissarsiat pitsaanerpaartaraat
- Ukiut amerlanerpaat sungiusaasutut siulersuisutullu ingerlatsivigaakka ASP-mi angusarpassuit qularinngilara sunniuteqarfigilluarsimallugit. Uanga pissusissamisut isigiinnarpara inuiaqatinnut sullississallunga akissarsiassaq tunngaviginagu, uannut pingaarnerpaajunikuuvoq sullissininni inuit qungujullutik uannut utertitsisarneri akissarsiat pitsaanersaattut isigaara.
Minikkusunngilaralu pilersitama ilaat tassalu Aasianni julemarked pilersinnikuugakku 1990 qiteqqutilernerani. Tassani pingaartissimavara ASP ingerlanneqarnerani meeqqat, inuusuttut, inersimasullu angalatinneqartarnerinut aningaasanik tapertassanik pissarsiorneq pingaartillugu silap taarsiartulernerani Aasianni innuttaasut arlaatigut ullormik nuannaarlutik juullimullu qilanaarlutik ornissinnaasaannik sullikkusullugit, taama oqarpoq Hans Rafaelsen. Aamma pilersaatasa ilagaat Aasiaat Midnight Sun Marathon, taanna ukiuni 27-ni ingerlatereerlugu allanut ingerlateqqitassanngorlugu tunniuppaa. Hansilu ima nangippoq: - Inuppassuit qujassuteqartarput iliuusaasigut tuppallernartarlutik nipituuliuutaanngitsumik qujassutitut uannut tuttarsimasut. Uannut pingaarnerpaavoq inuit qungujullutik ilassinissaat taannaavorlu akissarsiat pitsaanersaat. Taama naggasiivoq Hans Rafaelsen.
Assiliisoq Agnethe Andersen