Kommune Qeqertalimmi utoqqaanersarput Kasper Brandt Kaasiparujuk 98-nik ukioqarluni 6. september nunaqarfimmi asaqisamini Iginniarfimmi eqqissilluni toqukkut qimaguppoq. Kaasiparujuk inuunermini nunaqqamminut sunniuteqarluartuusimavoq, aalisarnermik piniarnermillu nuannarisaqarnermi saniatigut sanalunnermik nuannarisaqarpoq kiisalu peqatigiiffinnik ingerlatseqataani aallussarilluarsimallugu. Kaasiparujuk Iginniarfimmut tikittut ataqqillugu ornigarluartarpaat oqaluttuarpassui ilisimasarpassuilu pillugit. Kasper Brandt-ip meerai, ernutai, ernutaqqiutai ilaqutarpassuilu misiginneqatigaagut. Qujanarlu inuugallarnermini ilisimasaminik isumassortuarsimamnatigut.
Borgmester Ane Hansen, Kommune Qeqertalik
Ernera Peter Brandt eqqaaniaalluni ilaatigut ima allappoq:
“Ataataga Iginniarfimmi inunngorsimavoq 22. Januar, ukioq 1924, angajoqqaaralugit
niuertoruseq Thomas Brandt nulialu Margrethe Brandt katinngikkallarami Frederiksenimik naggateqarsimasoq.
Ataataga atuaqqittussaasimagaluarpoq, piniarnerli aalisarnerlu nuannarillualersimasani qimakkumanngivikkamigit taamanikkut Aasiannut atuariartortitaanissaminut aallarusussimanngilaq. Ataataga meeraanerminiit assassullaqqilluinnarsimavoq, soorlu qisunnik sananermik, saviminernik saffiornermik allarpassuarnillu. Inuusuttunnguulluni umiaasaliullaqqissimavoq ningittakkersuutigisartakkaminik, peqatigisarlugit meeraanerminiit inuusuttunngornerminut ikinngutigilluakkani Søren Hansen qatanngutaalu Peter Hansen - Piitannguaq - kingorna ukiorpassuarni umiarsuaaqqani naalagaasimasoq.
Ataatama angajua Jan Brandt ukiup 1956-ip ukiaani toqukkut peerummat, soraluannguani perorsaaqataaffigisimavai, kingorna taakkua aalisartutut 36-fodsimik "Miina"-mik raajarniutitaarput. Ataatama imarsiornermik nuannarisaqarluartup soraluannguani taakkua imarsiornermik ilinniartilluarsimavai ernersiartik Johan Olsen - Juaat aamma soorlu taamatut imarsiornermittaaq ilinniartissimasaa, kingorna umiarsuaaqqani naalaganngorsimasoq, kingornalumi "Tuullik"-mi naalagaasimasoq umiarsuarmilu sinersortaammi aquttuusimasoq. Juaat maangamut aamma ilanngulluni qujaniartarpoq ataatannut, tassa imarsiornermik ilinniartilluarsimammani.
Ataataga nersornaateqarpoq Kunngikkut assilissamik nersornaasiuttagaannik, - taamanikkut Aasianni Kæmneriusumit neriorsorneqarluni kingorna saqqarmiumik malitseqassasumik. - Taannali saqqarmioq eqquutsinneqarani inuttanngua toqukkut qimagutiinnarpoq.
Ataataga nunaqarfimmini aalisartunut piniartunullu peqatigiiffimmut ukiorpassuarni siulittaasuusarsimavoq ilaasortaasarlunilu. Blåkorsimi ukiorpassuit maani siulittaasuusarsimavoq ilaasortaallunilu. Nunatsinni Blåkorsit suliniutigisimasaannut "Qaqiffeqalernissamik" siunnersuuteqartunut ataatsimiinnerni peqataasarsimavoq.
Maani nunaqarfimmini atuarfimmi sanatitsisartutut aamma Timelæreriusimalluni. Sorpassuarnik nunaqqamminut, meeqqaminut, ernuttaminut ernutaqqiutiminullu maligassiuiloortarsimavoq sutigut tamatigut. Piniartoqamminut aalisartoqamminut iluaqutaaloortarsimavoq, pujortuleeqqat motooriminnik aserortooraangata akiliisitsinani motooriinik iluarsaassisarluni, sakkuinik aallaasinik, ikumasartunik allarpassuarnillu sullissiloortarsimalluni. Maani nunaqarfinnilu qanigisatsinni toqusoqaraangat illerfiliuussiloortarsimalluni. Meeraasugut Sisimiut amutsiviata ittuanit qinnuigineqarsimagaluarpoq Sisimiuni amutsivimmut saffiuunngoqqullugu motorilerillaqqinnera pissutigalugu. Ataatagali piumasimanngilaq imarsiortuunini qimakkumannginnamiuk.
Ataatannguara sineriassuatsinni ikinnguterpassuaqarpoq. Ataatannguara ukiorpassuit ilagiinnut sinniiseqalermalli ilagiinnut sinniisaaloornikuuvoq, qatserisartuunikuulluni aamma ukiorpassuarni, nunaqarfinni Bygderådeqalermat ilaasortaasarsimalluni aamma.
Ataatannguara Kasper Abel Otto Brandt Iginniarfik. Eqqaaneqarnera ataqqinartuuli!”
Peter Brandt
Kommune Qeqertalimmi kommunalbestyrelse ilaqutaasunut tamanut misiginneqataangaarpoq.