Aggutsip qulingat 2022 ulloq Kommune Qeqertalimmut pingaaruteqarluinnarpoq. Ullumikkummi Kangaatsiap atuarfittaarsua atoqqaartinneqarpoq. Atuarfik nutaarsuaq kommunimit tamakkiisumik aningaasalersorneqarpoq, tamannalu Kalaallit Nunaat tamakkerlugu siullerpaavoq. Atuarfimmik sanasuupput KJ Greenland A/S
Kangaatsiap atuarfia silataaniit
Laura Brønlund meeqqat pisinnaatitaaffii eqqaasitsissutigaalusooq
Laura Brønlund Meeqqat isummersorfiannit sinniisussatut qinigaalluni oqalugiarpoq. Laurap meeqqat pisinnaatitaaffiit eqqaasissutigalugillusooq Meeqqat pisinnaatitaaffiini isumaqatigiissutit issuaaffigai. Isumaqatigiissut 28 aamma 29.
28: Meeraq kinaluunniit atuartinneqarnissaminut pisinnaatitaaffeqarpoq. Meeqqat atuarfianni atuartitaaneq akeqassanngilaq. Ingerlaqqiffiusumik qaffasinnerusumillu ilinniartitaanissaq meeqqanut tamanut periarfissaasariaqarpoq. Meeqqat sapinngisamik qaffasinnerpaamik ilinniagaqarnissamut kaammattorneqartariaqarput. Atuarfinni meeqqat pisinnaatitaaffii ataqqillugit nakuusertoqarnanilu atuartitsisoqartassaaq.
29: Meeqqat atuartinneranni kinaassusaat, pikkoriffigisaat piginnaasaallu tamakkiisumik ineriartortinneqartariaqarput. Nammineq pisinnaatitaaffimmik paasinissaannut, inuillu allat pisinnaatitaaffiinik, kulturinut allanut assigiinngissutsinullu ataqqinninnissaat pillugu ilinniartinneqartariaqarput. Atuartitaanerup eqqissinartumik inuuneqarnissamut avatangiisinillu paarsilluarnissamut meeraq aqqutissiuutissavaa.
Taama naatsumik imartuumillu Laura Brønlund oqaaseqarpoq.
Laura Brønlund Meeqqat Isummersorrfianniit sinniisutut oqalugiarpoq
Utersaarnarpoq
Atuarfiup pisortaa Sussi Adelholm oqaaseqarnermini eqqaasassat amerlasuut utersaartoorutigai tupinnanngitsumillu attortissutigalugit. Atuarfiup oqoqarnera pissutigalugu atuartut ilinniartitsisullu peqqissutsimikkut assut malugisarpaat, allaat ilinniartitsisut arlalissuit atuarfik suliffitsik qimagarnikuuaat. Massakkullu atuarfik nutaarsuaq iserterfigaat.
Qiorseqataasut
Atuarfiup atoqqaarfissiornerani qiorseqataapput atualertussat Niviarsina Næsgaard Madsen aamma Nukappiannguaq Lundblad. Niviarsina atuaqatissamini angajullersaalluni Nukappiannguarlu atuaqatissamini nukarlersaalluni. Niviarsina Katsiaap (Christian Jeremiassen) siullersaalluni Kangaatsiami ilinniartitsisutut ilinniarnikup kinguaarivaa. Nukappiannguaq Kaaleeqqap (Karl Lundblad, Kangaatsiami innuttaaneq) kinguaaraa. 
Qiorseqataasut Niviarsina Næsgaard Madsen aamma Nukappiannguaq Lundblad
Kangaatsiap eqqaani nunaqarfinnit Kangaatsiamut
Borgmester Ane Hansenip oqalugiarnermini suliassatut tullertut taavaa atuartut angajulliit Kangaatsiap qanittuani nunaqarfinniit Kangaatsiamut atuariartortalernissaasa sulissutiginissaat. Massakkumut kommunerisami nunaqarfinni atuartut angajulliit kommunimi illoqarfimmut atuariartortinneqartarput. Massakkulli atuarfittaaq meeqqanut 120-nut inissalik inissaqartitsilluarnera atorluarlugu Kangaatsiamut atuariartortitsisalernissaq eqqarsaataavoq.
Ulloq 31. maj 2018 Kommunalbestyrelse aalajangerpoq Kangaatsiaq nutaamik atuarfiliuunneqassasoq Kommune Qeqertalimmit aningaasalersorneqartumik
Kangatsiap aturfissaata sananeqalernerani qaartitseqqaarneq siulleq
Kangaatsiap atuarfiani isaariaq
Isaarissap eqqaaniit aulamut isivikkvik
Fysikertarfik
Meeqqat nalliuttorsioqataallutik erinarsortut