Aalisarnermut Piniarnermullu Naalakkersuisoq aalajangerpoq Nunatta Kitaani ataatsimoorluni qoorortoorsortunut qamutilissortunullu tikaagullittassiissutit 55-it sinneruttunit agguaasseqqittoqassanngitsoq. Tamanna pivoq angallatit qamutilissorlutik tikaagullinniartartut salliunneqarnissaat pillugu.
Taamaallaat Tunumi tikaagullittassiissutinik sinneruttunik agguaasseqqittoqarpoq.
Tusagassiorfinnut decembarip 17-ianni aamma 21-anni 2020-mi nalunaarutini, Kitaani ukiumut tikaagullinnik tunngaviusumik pisassiissutit 164-it pillugit ilisimatitsissuteqartoqarpoq kiisalu 2020-miit pisassiissutinik 55-inik Kitaani nuussisoqarpoq. Ataatsimoorluni qoorortoorsorluni piniarnermi tikaagulliit 64-it pisassiissutigineqarput qamutilinnillu tuukkartalinnik piniarnermit 100-t pisassiissutigineqarlutik tunngaviusumik pisassiissutiniit. Tunumi pisassiissutit tamakkerlugit 20-upput aamma 2020-miit nuussat marluullutik.
APN-ip oktobarip 11-anni 2021-mi killiffittut paasissutissat tigusai naapertorlugit Kitaani tikaagulliit 55-it ataatsimoorluni piniarnermi aamma qamutilinnik tuukkartalinnik piniarnermit tikaagulliit 54-it pisarineqarsimapput. Kitaani tikaagullittarineqarsimasut tamakkerlugit 109-upput, sinneruttullu katillugit 55-iullutik, taakkunannga 21-t qoorortoorsortunit 34-llu qamutilissortunit.
Kommune Qeqertalimmi 2021-mi qoorortoorsorluni pisassiissutit sinneruttut maannakkut marluk.
Piumasaqaatit pinngitsoorneqarsinnaanngitsut:
- Inuussutissarsiutigalugu piniarnermut allagartaq pinngitsoorani nassarneqassaaq, nassarneqanngippat agguaassinermi peqataatinneqarsinnaanngilaq.
- Angallat nammineq pigisariaqarpoq taannalu nalunaarnermi nalunaarutigineqarnikuusoq atorneqassaaq.
- Kaptajn pisinnaatitaavoq pisaqaqataasut piniarnermut allagartaminnik nassataqarnersut aperisinnaallugit pisaqarsimalluni agguaannginnermi.
Ataatsimoorluni tikaagullinniarnissami piumasaqaatit ilaatigut ukuusut maluginiaqquneqarput:
- Piniaqataanissamut akuerisaasimasut kisimik piniaqataasinnaapput.
- Piniarneq ima aaqqissuunneqassaaq, ataatsimoorluni piniarnermi ikinnerpaamik umiatsiaaqqat tallimat piniarnerni ataasiakkaani peqataatillugit.
- Piniarneq aallartinneqassanngilaq ataatsimoorluni piniarnermut peqataasussat akuersissutinik piginneqataasut sumiiffinni tamarmik piniarnerup aallartinnissaanik nalunaarfigineqarsimatinnagit piniarneq aallartinneqassanngilaq.
- Angallatit qamutileqanngitsut 30 fods tikillugit angissusillit ataatsimoorluni piniaqataasinnaapput, kisiannili angallatitut siuttuutinneqaratik.
Allattoqarfik INUA Kommune Qeqertalik