Nipilersortartut Inneruulat 1976-mi Aasianni aallartikkamik nunarsuarmi pissutsit, politikki, inuit atugaat, pinngortitarlu pillugit saqqummersitsisarput, nunarput tamakkerlugu avataanilumi maannamut tusaamaneqarlutik nuannarineqarluartut.
Borgmesteri Ane Hansen-ip nipilersortartut Inneruulat ukiuni 45-nngortorsiorlutik nalliuttorsiortut kommunip allaffissuanut qaaqqullugit ilassivai tunissuteqarfigalugillu.
”Inneruulat pileqqaarmata nunatsinni inuusuttuusugut allannguerusussuseqarluta, nujakkaarsuulluta, paakkaarsuaqarluta pikialaartarsimavugut. Inneruulat Aasiannut kommunitsinnullumi nittarsaassilluartuupput ilisimaneqaataallutillu. Nipilersornikkut inuiaqatigiit akornanni maannamut annertuumik ataatsimoortitsisut. Inneruulat nipilersornerup silarsuaani pisoorsuutimmatigut qujassuteqarfigivakka, unnummullu qilanaarpugut appisimaarnissaannut”- taama oqaaseqarpoq borgmesteri Ane Hansen.
Ilassinninnermi najuupput Inneruulani guitarertoq, ataasiakkaarisoq Kaaleeraq Reimer, nipilersoqataasartoq qangaaniilli Leif Immanuelsen, nipilersoqatigisartagaat Pele Kaspersen, Nukannguaq Sandgreen, Viila Sandgreen aamma peqatigiiffik Inussuit-mi siulersuisut.
Inneruulat ukiuni 45-runngortorsiorneranut atatillugu Aasianni peqatigiiffik Inussuit, Inneruulat Aasiaat timersortarfiani appisimaarnissaat aaqqissuussimavaat tallimanngorneq 1. oktober 2021 unnulernerani ilaqutariinnut, unnunneranilu inersimasunut.
Allattoqarfik INUA.
