Killilersuinerit nutaat 31. oktober 2021 tungaanut atuutsinneqarallartut malillugit Aasianni Kommune Qeqertaliup suliffeqarfiutaani innuttaasunut kiffartuussinermi maleruaqqusat atuuttut.
Matumuuna nalunaarutigissavarput marlunngorneq ulloq 24. august 2021 aallarnerfigalugu Naalakkersuisut killilersuilluni maleruagassat nutaat sivitsorpaat 31. Oktober tungaanuugallartoq atuutsillugit. Maleruagassat malillugit Kommune Qeqertaliup suliffeqarfiutaanni innuttaasunut kiffartuussinerit makku atuutsinneqarput:
Sullissivik Aasiaat aamma suliassaqarfiit allat allaffissuarmi inissisimasut saaffiginiaraanni:
- Saaffiginninniaraanni oqarasuaat 70 19 00-mut sianernikkut saaffiginnittoqassaaq.
- Ornigulluni saaffiginninniaraanni oqarasuaatikkut aamma mailikkut piffissamik takkunnissamut inniminniisoqassaaq. Aatsaat piffissamik tunineqareernermi Sullissivimmut ornigulluni saaffiginnittoqarsinnaavoq.
Ornigulluni saaffiginninniarnermi piffissamik inniminniiffissaq:
Oqarasuaat: 70 19 00 E-mail.: qeqertalik@qeqertalik.gl
Aasianni kommunip allaffiani isaariaq Sullissivimmiittoq kisimi iserfigineqarsinnaavoq piffissamik inniminneereersimasunut.
Ornigulluni saaffiginninniarluni piffissamik tunineqarnermi Sullissiviup isaariaatigut isertoqassaaq, saaffiginnittorlu sulisumit Sullissivimmut aaneqassaaq, iserniaraannilu kiinnamut assiaquteqarluni isertoqartassaaq. Eqqaamallugulu qanillinaveersaartoqassammat aammalu assaat spritimik salinneqartassammata.
Anartarfilerineq Aasiaat, Kommune Qeqertalik:
- Anartarfilerisut sulisut illumut iserlutik igitassanik aallertarunnaarput, taamaattumillu anartarfimmi igitassaq najugaqartut namminneq suliareriarlugu annittassavaat. Igittakkanik anartarfillit illup silataanut namminneq puussiaq ilisassavaat, kisiannili namminneq igitsissanngillat, tassalu utoqqaat pittorluttullu qinnuigissavagut Sullissivimmut saaffiginneqqullugit oqarasuaammut uunga 70 19 00-mut imaluunniit mailimut uunga qeqertalik@qeqertalik.gl.
Sullissivimmut ornigulluni saaffigininninniaraanni qulaani allaqqasutut piffissamik inniminneeqqaartoqassaaq.
Anartarfilerinermik suliaqartut ullut igitsiffissat malillugit igitsissapput. Taamatut aalajangerneq innuttaasunik sulisunillu Covid-19-mut illersuinissamik peqquteqarpoq aamma Covid-19-mik tuniluuttoqannginnissaanik pinaveersaartitsiniarluni taama aalajangertoqarpoq.
Aalajangiinerit taakkua atuupput 31. Oktober tikillugu atuukkallarput allamik nalunaartoqarnissaata tungaanut.
Qanermut assiaqut:
Sumiiffinni tamanit iserfigineqarsinnaasuni qanermut assiaqut atorneqassaaq. Inuusuttut 18-it inorlugit ukiullit ilaatinneqanngillat. Aamma utoqqaat illuni puiguttortunngortut pillugit immikkut aaqqiisoqartarpoq.
Meeraaqqeriviit, meeqqeriviit aamma atuareernerup kingorna ornittakkat Iglo Klub aamma Juniorklub nuannersoq:
- Aggiussisoq aamma aallertoq ataatsiinnaassaaq.
- Qanermut assiaqut isersimanermi atorneqassaaq. Meeqqat inuusuttullu 18-nit inorlugit ukiullit uani pineqanngillat.
- Pinnguassanik nassartoqassanngilaq.
- Igdlo Klub unnukkut matoqqassaaq.
Atuarfik Gammeqarfik:
- Atuarfimmi Zonekkaarineq tassa immikkoortukkaaraluni atuartunik inissititerineq ingerlanneqarpoq. Atuartut kisimik atuarfimmut iseqqusaapput.
- Atuarfimmut attaveqarniaraanni oqarasuaatikkut mailikkulluunniit saaffiginnittoqassaaq. Takkulluni ornigulluni saaffiginninniaraanni sianerluni mailerluniluunniit piffissamik inniminneeqqaartoqassaaq:
Gammeqarfiup oqarasuaataa: 89 47 55 E-mail.: gammeqarfik@qeqertalik.gl
Piffissamik inniminneereersimallutik takkuttut allaffiup isaariaatigut qanermut assiaquteqarlutik isissapput, eqqaamallugu qanillinaveersaartoqassammat aamma assaat sprititerneqassammata.
- Paasissutissat allat atuarfiup nalunaarutaani takuneqarsinnaapput.
Najugaqatigiiffiit:
- Najugaqatigiiffinnut pulaartoqassanngilaq.
Utoqqarnik sullissineq aamma utoqqaat illuat:
- Utoqqaat illoqarfimmi najugallit utoqqaat illuannut neriartortartut, nerisassanik pajunneqartassapput.
- Utoqqaat illoqarfimmi najugallit utoqqaat illuannut pulaartarnerat unikkallarpoq.
- Utoqqaat illuannut ilaqutaasut pulaarniarunik ataasiakkaassapput, qanermullu assiaqut atorneqassaaq. Puiguttunngortulli pillugit allatut aaqqiisoqartarpoq.
- Utoqqaat illuanni sulisut qanermut assiaquteqartanngillat, utoqqaat uippallinnginnissaat piniarlugu.
Innarluutillit aamma utoqqaat bussiinik angallassineq:
- Innarluutillit utoqqaallu bussianni ilaasut issiaffissaat sinnerlugit ilaasoqassanngilaq, qanermullu assiaqut atorneqassaaq.
Linkit toorlugit Naalakkersuisut nalunaarutaat atuakkit:
Katerisimaartarnernut aamma ininut kikkunnit tamanit iserfigineqarsinnaasunut killilersuigallarnerit pillugit Namminersorlutik Oqartussat nalunaarutaat nr. 46, 23. august 2021-mersooq:
https://inatsisit.gl/Lov?rid=%7b3F83DFF0-09DF-4297-8004-9EC49DEC68D9%7d&sc_lang=kl-GL
Illoqarfinnut nunaqarfinnullu tunillaassorfiusunut toqqakkanut killilersuigallarnerit pillugit Namminersorlutik Oqartussat nalunaarutaat nr. 47, 23. august 2021:
https://inatsisit.gl/Lov?rid=%7bE0D485F3-29D3-47C7-B1C7-100CDE24BA4B%7d&sc_lang=kl-GL
Kalaallit Nunaannut nunatsinnilu angalanermi piumasaqaatit pillugit Namminersorlutik Oqartussat nalunaarutaat nr. 48, 23. august 2021-mersooq:
http://inatsisit.gl/Lov?rid=%7b6A70C30E-ADA6-4F30-8530-544350F69457%7d&sc_lang=kl-GL
Inussiarnersumik inuulluaqqusilluta
Kommune Qeqertalik