Kommune Qeqertalimmi kommunalbestyrelsimut taasinernik kisitseqqissaanerit maannamut suli tamakkiisumik allattoqarfimmi kisinneqanngillat, sumiiffinni ataasiakkaanit taaguiviit ilai suli allattoqarfimmit tiguneqanngimmata. Maannamulli Kommune Qeqertalimmi kommunalbestyrelsimut ilaasortanngortut nutaat allaatigisap ataatungaani takuneqarsinnaapput.
Qinersinermi taaneqarnerpaasoq Peter Olsen, Inuit Ataqatigiit, 442-nik taajorneqarsimavoq. Peter Olsen Aasiammiu Inatsisartunut qinigaanermini aalajangiuppaa kommunalbestyrelsimi sulinngiffeqassalluni. Taamaalilluni Inuit Ataqatigiinni sinniisussatut inissisimasoq Bia. A Broberg Qeqertarsuarmiu Kommunalbestyrelsimut sinniisutut ilaasortanngussalluni, Peter Olsenip kommunalbestyrelsimi qinikkatut suliani suliareqqissinnaalernissaata tungaanut.
Peter Olsen kommunalbestyrelsimi sulinngiffeqarniarluni nalunaarnerata kingorna Ane Hansen, Inuit Ataqatigiit, 387-nik taaneqartup isumaqatiginninniarnerit ingerlaneri nangippai.
Kommune Qeqertalimmi parti Inuit Ataqatigiit amerlanerpaanik taaneqarlutik qulingiluanik kommunalbestyrelsimut ilaasortaatitaqassapput, Siumut sisamat, Demokraatit ataaseq, Atassut Ataaseq.
Qinersinerup kingorna kisitsisit siulliit avammut nalunaarutigineqarnerani Otto Jeremiassen Kangaatsiarmiu aamma Nikkulaat Jeremiassen Niaqornaarsummiu marluullutik 81-nik taaneqarsimammata qinersinermi ataatsimiititaliaq makitsineratigut Otto Jeremiassen Kommunalbestyrelsimut ilaasortanngortussanngoraluarpoq. Tamatuma kingorna qinersivinni taaguiviit allattoqarfik INUA-nut nassiunneqarnerisa kingorna kisitseqqissaarnermi paasinarsivoq qinersivimmi ataatsimi taaguiviit marluk atortussaanngitsutut inissinneqarsimasut, pissutigalugu taaguivimmi krydsiligassami marlunnik krydsiliisoqarsimammat; partiimut aamma qinigassanngortittumut. Qinersinerit pillugit inatsisartut inatsisaat nr. 27, 28 november 2016-imeersumi §40, imm. 3 aallaavigalugu partiimik aamma qinigassanngortittumik krydsiliisoqarsimagaangat, inummut qinigassanngortittumut taasineq inissinneqartussaasoq. Taaguiviit marluk atortussaanngitsutut nalilerneqarsimasut aappaat Siumumut aamma Nikkulaat Jeremiassenimut taasinerusimavoq, aappaa Atassummut aamma Arnánguak Jeremiassenimut taasinerusimalluni, taamaalillunilu taasineq inatsit qulaani taaneqartoq toqqammavigalugu Nikkulaat Jeremiassen, Siumut taaneqarneri katillugit 81-iusimagaluartut 82-inngortinneqarput, aamma Arnánguak Jerimiassen, Atassut taaneqarneri katillugit 56-iusimagaluartut 57-inngortinneqarput . Taamaalilluni Siumumit kommunalbestyrelsimi ilaasortaasussat sisamaannik qinersinermi siulersuisut makitsinerigaluat atortussaajunnaarpoq, Nikkulaat Jeremiassen, Siumut taaneqarnerunera peqqutigalugu kommunalbestyrelsimi ilaasortanngortussaammat.
Taaguiviit tamakkiisut allattoqarfimmiit kiseqqissaarneqareerpata, kisitsisit eqqortut nalunaarutigineqarumaarput.
Kisitseqqissaarneq maanna aallaavigalugu Kommune Qeqertalimmi kommunalbestyrelsimut ilaasortanngortut: