Borgmester Ane Hansen aamma kommunalbestyrelsimut ilaasortaq Thomas Petersen.
Thomas Petersen Niaqornaarsummiu ukiuni 20-ni qinikkatut sulinermini nalliuttorsiutigineqarpoq.
27. november 2020
Kommune Qeqertalimmi kommunalbestyrelsit najuullutik ukiumi matumani naggataamik ataatsimiinnerani Niaqornaarsummiu Thomas Petersen ukiuni 20-ni politikeritut qinikkatut sulisimanera nalliuttorsiutigineqarpoq.
Thomas Petersen 1979-mi bygderådimi ataatsimiinnerni ammasuni peqataasalerpoq. 1997-mi Nunaqarfiit aqutsisuinut sinniisussatut qinigaalluni, sinniisutut ataatsimiinnerni peqataasarluni. Ukioq 2000 Nunaqarfiit aqutsisuinut qinigaalluni ilaasortanngorpoq partii Siumut tunuliaqutaralugu, ukiut ilai Nunaqarfinni aqutsisutut siulittaassuuffigisarlugit,ukioq manna tikillugu ataannartumik ukiuni 20-ni Nunaqarfinni aqutsisutut qinikkatut sulivoq. Nunaqarfimmi aqutsisutut qinigaanermini Kangaatsiaq Kommune, Qaasuitsup Kommunia aamma Kommune Qeqertalik suliffigisimallugit. Kangaatsiap Kommuniani 1993 kommunalbestyrelsimi sinniisussaq siullertut ilaasortaalluni ataatsimeeqataajuarsimavoq. 2005-2008 kommunalbestyrelsinut ilaasortaalluni. Ukioq 2017-mi Ikaarsaariarnermut ataatsimiititaliamut ilaasortaalluni Kommune Qeqertalimmi Kommunalbestyrelsimut ilaasortanngorpoq Inuit Ataqatigiit tunuliaqutaralugu.
Ukioq 1979-mi politikerit nutaanik isumallit, anguniagallit ersarittunik Niaqornaarsummut tikittalermata kaammattuillutillu tapersersuinerisigut Thomas politikikkut suliaqarneq maannamut ingerlappaa angajoqqaaminit, qatanngutiminit, nuliaminit qitornaminillu tapersersorneqarluarluni.
Thomas Petersen kommunalbestyrelsimut aamma Nunaqarfinni aqutsisuni ilaasortaq.
”Politikimik ingerlatsininni ilisarisimasarpassuaqalersimavunga, ukiut ingerlanerini unammillernertarpassuaqartarpoq, allaat ilaatigut oqaatsit sakkortusinnaasut tusartarpagut, taamaakkaluartoq oqaatsit sakkortuut atorneqartaraluartut ukiut ingerlanerini nuannersut misigisassat amerlanerupput. Ukiut 20-it sivikitsuaqqatut misinnarput, kingumut qiviarluni ineriartornermi peqataaffippassuit qiviarnarput, oqallinnerit ammasut, pisariaqarfiini ersarissunik apuussivissanut apuussineq ingerlattarsimavakka. Inuusuttuullungali Niaqornaarsummi Siumumut inissikkama Edvard Peterseniugaluup tapersersortuarsimavaanga, siunnersorlunga, kaammattortuarlungalu toqussi tikillugu, ulluni makkunani eqqaamangaarpara qujassutissaqarfigeqigakku. Nuliaralu Sara ingiaqatigiilluta tapersersortuarmanga qujassutissaqarfigeqaara”-Taama oqaaseqarpoq Thomas Petersen.
Assit: Niaqornaarsummi nerrivimmi arsaarartartut aamma arsarnermik sungiusartagai.
Thomas Petersen politikikkuinnaq suliaqanngilaq, nulianilu Sara Petersen Niaqornaarsummi peqatigiiffilerineq ingerlattuarpaat, ukiorpassuarni nerrivimmi arsaarartartut NBK-88 sungiusaasuuffigisimavai siulittaasuuffigalugillu. Niaqornaarsummi nerrivimmi arsaarartartut saqqumilaarluarsimapput nunatsinni landsholdinut ilaasortaatitaqartarlutik unammiuaarnernilu angusarissaarluartarlutik. Thomas nulianilu Sara aamma Niaqornaarsummi sammisassaqartitsisunut peqataasarput aaqqissuusseqataallutillu.
Thomas Petersen nulialu Sara Petersen.
“Taamanikkut inuusuttuaranngorpunga akissaq pinnagu peqatigiffilerisut ikioqatigiilluarlutik inuiaqatigiilli ataatsimoornissaat aamma inuunerinneq pillugu innuttaasunut sussassaqartitsisartut, ullortunersiornerit, ullukinnersiornerit, ukiup naggataani qititsitsinerit, ukiup ingerlanerani unnussiuaaqatigiisitsinerit imigassartaqanngitsut aaqqissuussat nuannersut amerlasimaqaat. Tamanna ullutsinni ilaatigut peqatigiiffilerisartut uggornarpoq ingerlakkunnaariartoraat, pingaaruteqarmammi inuiaqatigiit nammineq iliuuseqarlutik ataatsimoornissat, susassaqaqatigiinnissaat.”- Taama oqaaseqarpoq Thomas Petersen.
Thomas ilaquttanilu inuunerminni asimiinneq pingaartitarivaat.
“Pinngortitap
tunniussinnaasai nukittoqqutigisarpagut, pinngortitaq nukissamik
aallerfigisarparput, pinngortitap tunniussinnaasai ilisimaareqqissaarlugit
pitsaasut atorluartarpagut aamma pisinnaatilluta pinngortitaq atorluartassavarput.”
Thomas Petersenip ukiuni makkunani pingaartitarilersimavaa angerlarsimaffiit toqqissisimasut.
“Pingaartippara
angerlarsimaffiup toqqissisimanarnissaa, meeqqat angerlarfissaat
aneersimatillutik illu torertoq, alianaatsoq, angerlarsimaffik eqqissisimasoq
meeqqat nerilluartarlutik toqqissillutik angerlarsimaffiat ullaarujussuarmut
festerfiunngitsoq nipiliorfiunngitsorlu. Peqqissumik inuuneqarnissaq aatsaat
taama pingaartigaaq, meerartagut siunissarissaassappata angerlarsimaffiit
toqqissisimaffiusut nunatsinni amerlanerusariaqarput, inuiaqatigiittummi
peqqissuussagaanni meeqqagut, ernuttagut ilumik iserfissaqartariaqarput alianaatsumik
toqqissisimanartumillu."- Taama oqaaseqarpoq Thomas Petersen.
Thomas Petersen nalliuttorsiutigineqarnerani najuupput qitornai qatanngutaalu.
Borgmester Ane Hansen
2. Viceborgmester Hans Aronsen pilluaqqusilluni oqalugiartoq.
Borgmester Ane Hansen aamma Thomas Petersen qitornai qatanngutaalu.