Qasigiannguit Katersugaasiviat Maligassiusoq Showimi suliffeqarfik eqeersimaartutut toqqarneqarpoq.

17. november 2020

Arfininngorneq 14. november 2020 Maligassiuisut Show ingerlanneqarmat Qasigiannguit Katersugaasiviat "Ukioq 2020 suliffeqarfik eqeersimaartoq"-tutut toqqarneqarpoq.

Paarisap toqqaanermi tunngavilersuutigaa katersugaaviup sammisassaqartitsinermi neqeroorutai.

Suliniuteqarnermi makkua erseqqissaatigineqarput:

- Sulisunik najukkamilu inuiaqatigiinni innuttaasunik tamanut peqataatitsisarneq.
- Kulturikkut tammatsaaliinermik qiutitaqarluni ullutsinnullu naleqqussakkanik sammisaqartitsilluni suliaqartuuneq.
-Tamanik ataatsimullu isiginninniartuuneq.

Qasigiannguuani Katersugaasiviup toqqarneqarnertik sapaammi 15. november 2020 malunnartinniarlugu katersugaasivimmi kaffilliutigaat.

Saamerlermiit: nunaqarfik uumassusilimmi ikiorti Randi Broberg, katersugaasiviup pisortaa Anne Mette Olsvig, katersugaasivimmi ikiorti: Mads Jeppesen.

Qasigiannguit Katersugaasiviat tassaavoq kommunimi najukkami kulturikkut oqaluttuarisaanermi katersugaasiviisa akuerisaasut pingasuusut ilaat. Ukiumoortumik missingersuutit kommunalbestyrelsimit aalajangersarneqartut sinakkutaralugit kiisalu ukiunut sisamanut suleriusissamik pilersaarut katersugaasiviup siulersuisui suleqatigalugit suliarineqarsimasoq atorlugu aamma Kalaallit Nunaanni katersugaasiveqarneq pillugu inatsit naapertorlugu katersugaasivik sulivoq.

Kommunip ukiumoortumik aaqqissuuttagaanni soorlu Meeqqat Ulluat, Unnuk Kulturisiorfik assigisaannilu kulturikkut attuumassuteqartunik sammisaqartitsilluni katersugaasivik peqataasarpoq.

Ukiuunerani katersugaasivup saqqummersitaanut attuumassutilinnut sammisassanik arlalissuarnik katersugaasivik neqerooruteqartarpoq, aamma nunaqarfiup uumassusillip sannaviani kulturikkut periutsinik kiisalu kulturimut attuumassuteqartunik assasornermik sannavimmi B-18-imi ilinniartitsinissamik neqerooruteqartoqartarpoq.

Aasanerani silami sammisassaqartitsinernik katersugaasivik neqerooruteqartarpoq, soorlu 16-1700-kkuni aasarsiorluni tupersimaartarfiit uumassusilerneqarneranut peqataatitsinerit aamma qajartornerit kiisalu pisissaarnerit ilanngullugit.

Aasaanerani arpatsitsinerup ”Kulunnguaq Run”-ip tungaanut aammattaaq katersugaasivik immikkut ilaqutariinnut sapaatip akunneqartitsisarpoq, taamaalilluni oqaluttuarisaanermi atuakkiamut Kulunnguamut tarrrarsortumik meeqqanut aamma inersimasunut silami sammisassaqartitsisarluni.

Ulluinnarni sulinermi innuttaasunik suleqateqarneq aamma akuutitsineq katersugaasiviup ingerlatitseqqiinermini annertuumik pingaartitaraa.

Borgmester Ane Hansen:"Tulluusimaarutigisorujussuuvara kulturikkut kingornussatta nutaamik eqqarsarluni kommunitta suliarisinnaammagit kiisalu meerartatsinut aamma inuusuttatsinnut iluaqutissanngorlugit kulturikkut kingornussagut suli atorsinnaagatsigit. Aamma piffinni nutaani silarsuarmi avatitsinnut suli unammilleqataasinnaanerput ilanngullugu. Aamma Qasigiannguani najukkami katersugaasivimmi sulisut kiisalu kajumissutsiminnik suleqataasut nersornammik tigusaqarsimaneranni pilluaqqorujussuarpagut."

Nersornaammut tigusaqarnermut atatillugu katersugaasiup pisortaa Anne Mette Olsvig ima oqaaseqarpoq:

”Qujanaq.
Qujanaq ilissinnut Qasigiannguit Katerugaasivianut innersuussisimasunut, qujanaq Paarisap
innersuussisimaneranut aamma Ukioq manna suliffeqarfik eqeersimaartutut toqqarneqarnitsinnut. 

Aammattaaq katersugaasiviup sulisuinut kiisalu avataani suleqatigisanut qujanaq – uani
ingammik katersugaasiviup siulersuisui aamma kajumissuseq aallaavigalugu
peqatigiiffimmut – ilisseqanngikkaluarpat Qasigiannguit katersugaasiviat
sunniutilimmik aamma avammut isigisumik ingerlatitseqqiinermik suliniuteqarnini ingerlassimasinnaanngikkaluarpaa.

 Tupaallaatigaara nuannaarutigalugulu kulturikkut kingornussanik katersugaasiviup suliaqarnera
taamatut akuerineqarmat, kiisalu kulturikkut kingornussat ulluinnatsinnut
nutaaliaasumut tulluarsarlugit atugassanngortinneqarnerisa pingaarutaat
Qasigiannguit Katersugaasiviata atuuffeqarnera ilanngullugu. Tamatuma
takutippaa ullutsinni kulturikkut- aamma sunngiffimmi sammisassaqartitseriaasitta
ataatsimoorussamik kulturitsinnut aamma kinaassutsitsinnit patajaatsumik
tunngaveqarmat. 

Najukkami katersugaasivik tassaavoq ataatsimoorussamik eqqaamanninnissatsinnut- aamma
kulturitsinnut ataatsimoorluta toqqorsivipput – tassaniippoq ataatsimoorussamik
kingornussarput – aamma neriuutigaara ukiumi suliffeqarfik eqeersimaartutut toqqarneqarneqarnerput aallaavigalugu kulturikkut
kingornussatsinniitut periarfissat aamma nukittuffiit tamanit
takuneqarsinnaalerumaartut. 

Kulturikkut kingornussanik nutaanik ingerlatitseqqinnissamut suli Katersugaasivik
kajumissuseqarpoq aningaasallu tunniunneqartut sunngiffimmi aamma timersornermi
atugassamik umiamik ullutsinnut tulluarsakkamik sananissamut periarfissiipput.”