”Asasakka Kommune Qeqertalimmi innuttaasut, nunaqqatillu Aasianni.
Aasiannut tikinnitsinni paasivarput KNR nittartagaani ilanngutassiaq uippallissutigineqarlunilu ilaatigut paatsoorneqartoq. Taamaammat ingerlaannartumik Upalugaarsimanermut suleqatigiisitaq katersorpakka taavalu paasiniaalluta Nunatta Nakorsaaneqarfianut nutaarsiassaq sunaanersoq.
Paasitinneqarpugut Coronavirusimik tunillatsissimasoq ataasiinnaasoq, immikkut upalugaarsimaneq pissutigalungu tunillatsissimasumut qanimut attaveqarsimasut attaveqarfigisimasai immikkut misissorneqaramik. Siammaattoqannginnissaa qulakkeerniarlugu imaluunniit pinaveersaartitsineq annertusisaq ingerlallugu. Taamaatuumik KNR-ip ilanngutassiaa imatut paasisariaqarpoq: immikkut ittumik taakkua misissorneqartut aamma Nunatsinni Nakorsaanerup ilisimatitsissutigivaa taakkunani misissorneqartuni amerlanerpaat ajunngitsut paasereeritik testertinneqarneri ajunngitsut.
Nutaarsiassaqassappat ulluni tulliuttuni piaarnerpaamik ilisimatitsissutigiumaarparput kisianni erseqqissarusuppara tunillatsissimasoq suli ataasiinnaammat, kisianni upalugaarsimasoq immikkut ittoq pillugu misissueqqissaarnermi tunillatsissimasut naapissimasai aamma misissorneqaramik. Taanna toqqissisimanarpoq paasillugu maannamut tunillatsissimasumik allamik nassaartoqanngitsoq.
Taamaakkaluartoq immikkut ittumik upalugaarsimanerup nalaani sissuernissaput pisariaqartorujussuuvoq, soorlu sapaatip akunnerata naanerani ileqquukkajuttarpoq kaffellernerit agisuut, inuuissiortoqarsimappat.
Tamakkua aamma immikkut annikillilerlugit pinissai kissaatiginarpoq, aammalu peqatigiiffiit assigiinngitsunik aaqqissuussaqarsimasut timersortarfimmi imaluunniit bingortitsiniartut allallu kaammattorusuppakka akisussaaffitsik tigullungu aamma immikkut upalugaarsimanerup nalaani akisussaaffimmik tigueqqullugit. Soorlu ullumi paasivara timersortarfimmi timersoqatigiit assigiinngitsut aaqqissuussaralui unitsinneqartut, taanna qujanarpoq aamma toqqissisimanarluni.
Oqaatigerusuppara immikkut errukulaarnerit, spriternerit, tallinut quersornerit saniatigut inuit toqqissisimarusukkunik qanernik assiaqutinik peqartarsinnaammata silamiinnerminni imaluunniit pisiniarfilinarnerminni, tamanna inunnut toqqissisimarusuttunut kaammatuutiginartorujussuuvoq.
Immikkut upalugaarsimaneq eqqarsaatigalungu, Upalugaarsimaneq pillugu suleqatigiisitamiit kaammatuutigivarput utoqqaat illuanut pisariaqanngitsumik pulaartoqassanngitsoq, aamma napparsimavimmut pulaartoqassanngitsoq, aammalu illoqarfimmi utoqqaat napparsimasut sanngiinnerusullu pulakaffigineqarnaveersaassasut, tamakku aattortinnginnissai pillugu.
Tamassi sissuerluakutsoorisi aamma sapaatip akunnera naalluarisiuk.”