Sisamanngorneq 18. maj borgmesteri Ikerasaarsummi innuttaasunut sullissivik atuarfillu pulaarpai peqatigalungu Kangaatsiami inoqarfimmi aqutsisoq Angerdlartúnguak Larsen-Petersen
Borgmesteri atuartitsisorlu Agnette Inûsugtok
Ataatsimiititsinermi ukioq manna sanaartugassat saqqummiunneqarput, kommunip killiffia, kommunalbestyrelsit aalajangiussaat ukiuni tallimani tulliuttuni atuartut angusarisartagaannik pitsanngorsaanissaq aamma atuanngitsuukulaarnerit apparsarnissaanut suliniartoqalernera, MIO nalunaarusiaa pillugu kommunillu killiffia aallaavigalugu pitsanngoriaatissat pillugit sulisoqarnera pilersaarusiortoqarnera aamma kommunimi inuussutissarsiutitigut siunnersuisartoqalernissaq eqqartorneqartut ilagivaat.
Maannalu inoqarfinni tamani aappaagumuinnaq eqqarsarani ukiunut arlalinnut pilersaarusiorsinnaanerup pingaaruteqassussaa eqqartorneqarpoq pitsaasumik avatagiisigissaaneq pingaaruteqarmat ukiorpassuani attanneqarsinnaasumik aaqqissugaalluarnerusumillu.
Innuttaasunut ataatsimiititsineq eqqartueqatigiilluarnermik ingerlanneqarpoq ilaatigut inuussutissarsiorneq eqqarsaatigalugu allatigut siuarsaasinnaaneq nunaqqatigiinni soqutigineqarpoq qeqqualerinermi aamma takornarialerinermi, nunaqarfiup nunagissarnissaa, innaallagissat aqqutaat, paaviaasarneq, qatserinermi upalungaarsimaniarneq, imeqarneq, ilaqutariit najugarisinnaasaannik illunik amigaateqarneq, eqqaaveqarneq aamma qinersiviit eqqarsaatigalugit nunaqarfinni tamani ilaasortaatitaqartalernissaq pingaaruteqarmat aaqqiisoqarnissaa kissaatigineqarluni ilaatigut Ikerasaarsuk Iginniarfillu ataatsimoorlutik qinersivimmiit ilaasortaatitaqarsinnaanerat nukittoqqutaalluarsinnaalluni sumiiffigisami. Eqqartueqatigiinnermittaaq ileqqupalaajusut illaruaatiginninnerit pimmatiginnittarnerit meeqqanut ileqqupalaanik ingerlatitseqqiisarnerit qaangerneqarnissaat eqqartorneqartut ilagivaat.
Eqqartueqatigiinnermi Ikerasaarsummiut ilaasa ujartorpaat qaqugu Kommune Qeqertalimmi imeq atorlugu nukissiuutit qaqugu pilersinneqassanersut Kommune Qeqertalimmut iluaqutaassaqimmat. Tassani eqqarsaatigineqarluni Qasigiannguit eqqaani erngup nukiganik nukissiorfissatut pilersaarut innuttaasunik tapersersorneqartoq.
Siunissaq ungasinnerulaartoq eqqarsaatigalugu nunaqqatigiit kissaatigaat illuliorfissatut nutaatut Anagguffiup tungaanut ineriartortitsisoqasssoq kissaatigineqarluni.
Ukioq manna Ikerasaarsummi suliassat aamma sanaartugassat:
-Eqqaavissuaq imaarneqassaaq.
-Iliveqarfiup ilassutissaa suliarineqassaaq.
-Illut tamarmik paaviarneqassapput.
Ukioq manna Nukissiorfimmiit pilersaarut:
-Seqinisaatinik ikkussuineq.
Siunissami qaninnermi pilersaarut:
-Eqqaavissuup nuunneqarnissaanut pilersaarut.
Ikerasaarsummi eqqaavissuaangallartoq qaqqap qaani inissisimavoq, eqqakkat teqqannginniassammata palletsinik ungaluneqarsimallutik qassutinillu qallerneqarsimalluni, aputilli aannerani palletsit ilai uppigalersimasut nuullugit aaqqissuuteqqinneqassapput aasaq manna imaarnissaata tungaanut.
Ikerasaarsummi silami sulisut, pedelit Frank Siegstad aamma David Siegstad eqqaavissuup tungaanut aqqutissamik nunagissaapput, gummiged-eqqat firehjulillu aqqutissaat nunagissarlugu.
”Nuannertorujussuuvoq suleqatigiillaqqeqingatta angusaqartaqaagut”- Taama oqaaseqarput Ikerasaarsummi silami sulisut, pedelit.
Aasaq manna eqqaavissuaq imaarneqassaaq taamatullu eqqaavissuassap aqqutissaa pilersaarusiorfigalugu aallartinneqareerluni taamaasilluni siunissami qaninnerusumi eqqaavik annanullu kueraavik nunaqarfiup illuisa akornaniikkunnaarluni illut tarrillugit inissisimalissalluni.
Eqqakkanut pilersaarut aamma eqqakkat angallattarnissaanut Kommune Qeqertalimmi pilersaarut uani takujuk:
Kommune Qeqertalimmi eqqakkat illoqarfinni nunaqarfinnilu assartorneqartalissapput.
Ukioq manna aamma Ikerasaarsummi puttasut nutaat ikkunneqarput, qaqqallu qaavani alianaalluinnartumi isikkivilimmi nutaamik issiaartarfeqalersimalluni.
Qaqqannguup atuarfia oqaluffiuutigisup iluani matu sanimut ammarlugulu matusartoq aaqqitassanngorsimavoq
Nunaqarfinni aqutsisunut ilaasortaq Anthon Petersen, Ikerasaarsummiu aamma Borgmester Ane Hansen
