Aasaq manna borgmesterip kommunip illoqarfiini nunaqarfiinilu tikeraarnerit aallarnerlugit Qasigiannguit tikeraarpai, tikeraarnermi suliffeqarfiit pulaaqattaarneqarput kommunalbestyrelsimi ilaasortaat Aqqa Samuelsen aamma Kristian Jeremiassen peqatigalugit.
Marlunngornermi Meeqqerivik ”Inequnaat” aamma meeqqerivik ”Kulunnguaq” pulaarneqarput. Kommune Qeqertalimmi aaqqissuussaanermi nutaajusumi suleriuseq sungiulluarneqalereersimasoq maluginiagassat ilagivaat.
Meeqqerivik ”Inequnaat” nutaanik igalaalersorneqarsimavoq silataalu nutarsarlugu avatangiisigissarneqarsimallunilu. Kommunip ingerlanneqarnerani aaqqissuussaanermi nutaajusumi suliassat akisussaaffiillu sumiiffinni nammineq akisussaaffigileriartornerani, suliffeqarfimmi amigaataasut aaqqissorneqartussallu sumiiffimmi sulisunit nammineq allattorneqartarput, pingaarnersiuillunilu aaqqitassanik allattuinikkut sukkanerusumik suliffeqarfinni aserfallatsaaliugassat imaluunniit taarsersugassat suliarineqartalerput, suliffeqarfiit nammineq ilisimaaralugu aaqqitassat allattortalernerisigut kissaatigisat kommunalbestyrelsit aalajangigassaannut ukiumut aningaasartuutinut pingaarnersiuinermi ilannguttalernerisugut.
Meeqqerivik ”Inequnaat”-ni sulisut akunnerminni pilersitsisimapput ”Avatangiiserissaarisunik”-nik taallugu. Sulisut avatangiisimik suliaqartut meeqqeriviup iluani najoruminarsaaneq ingerlattarpaat, mersorlutik saaguliorlutik, ininik kusassaanerit il. Il. Taamaasilluni meeqqerivik sutigut tamatigut tamarmi iseruminarsisimalluni.
Kommune Qeqertalimmi atuarfik Gammeqarfimmi siorna atuartut siulliit Ipaditaartinneqarput, maanna Qasigiannguani Juunarsip Atuarfiani atuartunut nuannaarutaaqisumik Ipadinik Borgmester Ane Hansen aamma Atuarfeqarnermut ataqatigiissaarisumit Nivikka Rosing, peqatigalugu Juunarsip atuarfiata Pisortaa Uno Geisler agguaassinerit ingerlanneqarput.
”Atuartut iPaditaarnissami tungaanut qilanaarnikuupput. Killiffimmik ilisimatinneqallattaartarput, soorlu coverissaanik skærminillu tikittoornermi paasitinneqartarnermikkut, tassuunakkut iPaditaarnissamut uppernarsaaqattaarsimavugut. Ulloq nallermat, atuartut qanoq qilanaartiginerat kiinaasigut takuneqarsinnaavoq. Atuartut iPaditaartorneranni malunnarpoq ataqqinnittumik pissuseqarnerat, ilinniartitsisuniit siumut piareersarneqarsimanerat iluatsilluarsimasoq takuneqarsinnaalluni. Atuartut misileraallattaalereerput, aammalu atorluaalereerpasillutik. Qujarujuppugut, borgmesterimit pulaartoqajuittuulluta piffissaqarfigineqarnerput, pulaartoqarneq tamatsinnut isumalerujussuuvoq. ” -Taama oqaaseqarpoq Atuarfiup pisortaa Uno Geisler.
Kivitsisa tassaavoq Kalaallit Nunaanni Kommunit tamarmiullutik anguniaqatigiiffiat meeqqat atuarfiisa maanna inissisimanerani qaffassaanissaq pamersaanernik aamma Ipad atorlugit suleriutsinik nutaanik atuilernikkut.
Kivitsisa pillugu nittartagaq linki toorlugu alakkarteruk:
Pingasunngorneq unnukkut innuttaasunik ataatsimiititsineq Qasigiannguani Katersortarfianni ingerlanneqarmat innuttaasunit peqataaffigineqarluarpoq.
Ipadip atuutilerneqarnerani qanoq atungassiaaneranik saqqummiussisoqarpoq.
Qasigiannguani ukioq manna sanaartugassat saqqummiunneqarlutik:
• Umiatsialerivik, piareernissaa juni qeqqani pilersaarutaavoq
• Katersortarfiup iluarsaanneqarnera, piareernissaa septembarip naanerani pilersaarutaavoq
• Iliveqarfiup suliarinissaa, pilersaarusiorneqarnera ingerlavoq. Ukioq manna aallartisarnissaa pilersaarutaavoq.
• Anartarfeqarfissaq pilersaarusiornera tulluussarneqarluni aasamut naammassissaaq.
Ukioq 2021-mut sanaartugassatut pilersaarutaallutik:
• Anartarfeqarfissaq
• Illoqarfiup iluani kloakinik suliaqarnissamut pilersaarut ukiamut tusarniutaassaaq.
Kissaatit:
• Innarluutillit inissiaat
• Utoqqaat pisinnaanerusut inissiaat
• Timersortarfiup iluarsaanneqarnissaa
• Katersugaasiviup iluarsaanneqarnissaa
• Illoqarfiup qeqqata tikikkuminarsarnissaa
Qasigiannguani asfatiterineq ukioq manna Juulimi aallartinneqassaaq.
Assimi takuneqarsinnaapput aappaluttumik nalunaaqutsersimasut siulliullugit asfaltiterneqartussat
Tungujortumik nalunaaqutserneqarsimasut tassaapput asfalti sinneqarpat asfaltiterneqartussat
Asfaltilu sinneqassappat aqquserngit ujaraannaasut aappaluttoq qaamasumik nalounaaqutserneqarsimasut qallerneqassallutik.
Borgmesterip tikeraarnerani ulloq naggaserlugu utoqqaat illuat ”Qeersaat Illuat” pulaarneqarpoq nereqatigiinnertalimmik. Innarluutillit angerlasimaffiat pulaarneqarluni, utoqqaat peqatigiiffiat naggataatigut naapeqatigineqarpoq, tassani Kommune Qeqertalimmi utoqqaat sinnissaat Qasigiannguani pilersinneqarnissaat eqqartorneqarluni, taamaasilluni Kommune Qeqertalimmi illoqarfinni tamani utoqqaat sinniisaat pilersinneqassallutik.
