Kommune Qeqertalimmiit peqataasut Aasianni naapinnerminni imminnut ilinniarput, ataatsimeersuariarnissaminnut qulequttanik assigiinngitsunik eqqartuillutik pilersaarusiorlutillu. Aasianniinnerminnilu Kommune Qeqertalimmi Kommunalbestyrlsit ataatsimiittut alakkarterpaat.
Nakuusa.- Meeqqat Isummersorfiisa ataatsimeersuarneranni Kommune Qeqertalik peqataarngaarpoq.
Kangerlussuarmi Meeqqat Isummersorfiat ataatsimeersuarmat Kommune Qeqertalik Qeqertarsuarmiit, Aasianniit, Kangaatsiamiit, Qasigiannguaniit meeqqanik inuusuttuaqqanillu tallimanik peqataatitaqarpoq.
12. november 2019
Kommune Qeqertalimmi Meeqqat Isummersorfianut peqataasut saamerlermiit:Nuka Siegstad Johansen, Kimmernaq Zeeb, Kasper Brandt Thomassen, Edvard Sandgreen, Niels Otto Olsen.
Kommunalbestyrelsip ataatsimiinneranni tusarnaartutut peqataasut.
Kangerlussuarmi ataatsimeersuarneq ulluni pingasuni sivisussuseqartumi meeqqat inuusuttuaqqallu Meeqqat pisinnaatitaaffii, inuttut inerikkiartorneq, inuttut saqqummersinnaaneq taamatullu ataatsimeersuarnermi qulequtarineqartoq:”Meeqqat perorluarnissaat anguniarlugu, ilaqutariittut sammisassaqartitsineq ingerlanneqarnerusariaqarpoq” pillugu isummersoqatigiipput siunnersuusiorlutik nunatsinni borgmesterinut Naalakkersuisunullu novemberip 20-ni tunniunneqartussanik, meeqqat pisinnaatitaaffiisa ukiut 30-vit anguneqarneranut atatillugu.
Assi: Nakuusa Meeqqat Isummersorfiisa ataatsimeersuarnerannit, Kangerlussuaq.
Kommune Qeqertalimmiit peqataasut qulequttatut sammissallugu toqqarsimavaat: "Qanoq iliorutta angajoqqaat meeqqatik perorluarnissaat anguniarsinnaavaat?"
Tassani angajoqqaat perorsaanermut qaammarsaatinik tuniorarneqarnerunissaat Meeqqat isummersorfianut anguniarneqarusuppoq pisortaqarfiit assigiinngitsut peqatigalungit. Paasititsiniaanikkut plakatit, innuttaasut qanimut aggersarnerisigut, tusagassiuutit Radio TV-lu atornerullugit, paasititsiniaanerit anguniarneqarusupput imatut qulequtserlugu:
”Qanoq iliorutta inersimasut meeqqat perorluarnissaanut suliniarnerulissappat?".
“Ulluinnarni naliginnaavoq angajoqqaat meerartik atuariartoraangat ullaamiik ualimut meeqqap sulerisarnera nalusaraat. Meeraqataasugut ilinniartitsisullu ulluunerani meeqqat akornanni pisut pissutsillu takullugillu malinnaavigaangut. Angajoqqaat isaanni “meerarput ajunngilaq”-mik oqariartortoqartaraluartoq suli pingaaruteqarpoq angajoqqaat ilisimanerulissagaat meeqqat ulluunerani angerlarnissartik tikillugu sulerisarnersut. Angajoqqaat ulluunerani meeqqamik susarnerat Ilisimaarileruniku peqqinnarnerusumik meeqqat akornanni inooqatigiissinnaaneq anguneqarsinnaammat. Tamanna ilinniarsimasut pisortaqarfinni sulisut assigiinngitsut peqatigalungit angajoqqaanut paasititsiniaanerit tusagassiiuutit, Facebook, music videoliornerit aqqutigalungit ingerlanneqarsinnaanera kaammattuutigissavarput taamaalilluni Meeqqanut perorluartitsinissaq anguneqarsinnaalissalluni.”- Taama oqaaseqarpoq Edvard Sandgreen, Meeqqat Isummersorfiani peqataasoq.
Edvard Sandgreen Illoqarfigisaq: Qasigiannguit Ukiut: 14
“Kangerlussuarmiinnerput nuanneqaaq. Pikkorissaasoqarluta ingerlavugut. Team ledereqarpoq kommunikkaarlutalu teamledereqarluta. Immitsinnut ilinniarpugut, inunnut attaveqariaaseq, saqqummiisinnaaneq ilinniarpagut kammattaartorlutalu. Isummat annissinnaanngorlugit inuiaqatigiinnut politikerinillu iluartorujussuuvoq.”
Edvard Meeqqat Isummersorfianniit Nordisk topmødeqalerpat peqataassaaq.
“Kommunimiik Kalaallit Nunaat tamakkerlugu avannaamioqatigiinnut eqqartortakkatsinnik peqataanissaq saqqummiinissarlu nuannerunarlunilu pissanganarpoq.”
“Meeqqat Isummersorfianut peqataannginninnii atuarfimmi saqqummiisinnaanissara ajornakusoortarnikoq maanna ilikkarpara kanngungiunnaarlugu ittoorunnaarlunga, isummakkalu annissinnaalernikuullugit. Taamaalinissara ilimaginikuunangu taamakku angullugit nuannertorujuuvoq.
MIsileraanitsinni nipinitunerulerneq, ilikkagassat misileraqattaarlugit. Allat saqqummiisut malinnaavingalugi pakatsinanngilaq aamma peqqissiminanngilaq peqataalluni.”-Taama oqaaseqarpoq Meeqqat Isummersorfianut peqataasoq Kimmernaq Zeeb.
Kimmernaq Zeeb.
Illoqarfigisaq: Qeqertarsuaq
Ukiut: 13 Assi: NAKUUSA
NAKUUSA PILLUGU PAASISSUTISSAT NAATSUT:
NAKUUSA tassaavoq Namminersorlutik Oqartussat UNICEF Danmarkilu suleqatigiissitaliaat 2011-mi januarimi aallartinneqartoq. Suleqatigiissitaliap siunertarivaa nunatsinni meeqqat inuusuttullu pisinnaatitaaffii patajaallisarnissaat. NAKUUSA amerlanertigut fondiniit aningaasalersorneqarpoq.
Kommunini meeqqat atuarfiini Nakuusaaqqanik meeqqat isummersorfiaraannik pilersitsisoqarnikuuvoq. Nakuusaaqqat saniatigut kommunini tamani Meeqqat Isummersorfeqalissapput Meeqqat Isummersorfiat-nik taaneqarlutik. Taakku Kommunerisami meeqqat inuusuttullu sinnerlugit sassartartuussallutik.