Marlunngorneq oktoberip aallaqqaataanni Aasianni utoqqaat kommunip allaffiata tungaanut ingerlaaqatigiipput allagartarsualisarlutik.
Utoqqaat Kommune Qeqertallip Borgmesterianut Ane Hansen-imut. Najuuttorlu kommunalbestyrelsimut ilaasortaq Enok Sandgreen, kommunimi atorfilittanut oqariartuutitik annguppaat erinarsoqatigiinnertalimmik.
Borgmester Ane Hansen ingerlaaqatigiinnut kommunip allaffiata ataatsimiittarfianut qaaqqusivoq.
Utoqqaat ataatsimiittarfimmut iseqqammersut Borgmester Ane Hansen internetsikkut attaveqaat skype attaveqaatingalugu Qeqertarsuarmi komminip allaffianut attaveqarpoq. Qeqertarsuarmiu Hansigne Broberg tunniusimangaarluni ukiut 50-sit kommunimi sulisimanermini nalliuttorsiortoq pilluaqqullugu, utoqqaallu peqatigalungit Hansigne erinarsorfigineqarpoq.
Pilluaqqusineq ingerlanneqareermat Borgmester Ane Hansen utoqqarnut oqaaseqarpoq kommunimilu utoqqat innarluutillullu atugarisaannik misissuisimaneq pillugu saqqummiussilluni, apeqqutigineqartunullu akissuteqarluni.
"Asasakka Kommune Qeqertalimmi utoqqaat. Ullumi FN-ip utoqqarnut ullorititaanni pilluaritsi, nuannaarutigaara Kommune Qeqertalimmi utoqqaat peqatigiiffiinik eqiigasunik eqqummaarissunillu ingerlasoqarmat - Qujavungalu Aasianni utoqqaat peqatigiiffiata aaqqissugaanik utoqqaat ingerlaaqatigiinneranni periarfissikkassinga utoqqaat atugarisaat pillugit pitsanngorsaanermi suleqataajumanersi nuannaarutigalungu tinguara. Piffissamilu qanittumi utoqqaat siunnersuisoqatigiivisa aallartinneqarnissaat qilanaaralugu. Qilanaaraarput utoqqarnut Kommune Qeqertalimmi atugassarititaasut pitsanngorsarneranni qanimut suleqataarusukkassi" - Taama oqaaseqarpoq Borgmester Ane Hansen, Kommune Qeqertalik.
