Kommune Qeqertalimmi Aasianni kulturikkut illorsuassaq pillugu, anguniaqaqatigiinnissamut suliassap isumaqatigiissutigineqarnera atsioqatigiissutigineqarpoq.
Atsioqatigiinneq persuarsiornartumik Aasianni Kommune Qeqertallip ataatsimiittarfiani ingerlanneqarpoq, Bormester Ane Hansen kiisalu Aasianni Katersortarfiutileqatigiit siulittaasuata tullia, Ane Petrussen, Katersortarfiutileqatigiit siulittaasuat Simon Petersen, ulloq taanna najuussinnaanngitsoq sinnerlugu anguniagaqaqatigiinnissamut isumaqatigiissummik atsiortuullutik.
Suleriaqqinnissamut ilaatigut suleqataasussat tassaapput Aqqaluk Lynge aamma Teit Jørgensen.
Aasianni kulturikkut illutaarnissaq pillugu eqqarsaat siornatigut arlalinnik qaqinneqartarsimavoq, ilaatigut kommunalbestyrelsemi ilaasortap Peter Olsenip siuttuuffigisaanik, maannalu aqqutit assigiinngitsut atoreerlugit suleriaqqinnissamut isumaqatigiinneq atsioqatigiissutigineqarpoq.
Takorluugaavoq Kommune Qeqertalimmi kulturikkut illutaassaq Aasianni katersortarfiup nalaani pilersinneqassasoq, takorluugarli suli uunga killinngilaq, qularnaatsumik ilisimaneqarluni qanorpiaq sanaartorneqassanersoq.
Maannamiuna kommunep katersortarfiullu akornanni suleriaqqinnissamut isumaqatigiissut atsiorneqartoq, alloriarnissamullu tullermut sulinissaq pisinnaalerluni.
Apeqquterpassuit paasiniagassanngorput, illutaassap isikkussaa qanoq ittuussava? Aningaasalersornissaa qanoq ingerlassava? Innuttaasut piumasaat suuppat? Assigisaallu.
Apeqqutillu tamakku akissutissarsinissaanut suleriaqqittussat, Aqqaluk Lynge aamma Teit Jørgensen, sulillutik aallartereerput. Tassami Per Kirkegaardip qalipagarsui katersortarfimmiittut, aningaasaliisussarsiornermi neqitatut atorluarneqarsinnaasut pillugit, Kommune Qeqertalik suleqatigalugu, quppersakkamik naqitertitsipput. Qalipagarsuillu aanaveersarneqarnissaat sulissutiginiarlugu aningaasaliisussanik qinnuteqareerlutik.
Atsioqatigiinnerup ulluani Nuummi Kulturip illorsuani Katuami, kiisalu Sisimiuni Taseralimmi ittutut sulisimasoq Juaaka Lyberth, taamatut illuliornissamut eqqumaffigisassat misilittakkallu pillugit saqqummiivoq.
”Atsioqatigiinneq nuannarutigaara, maannami suleriaqqinnissamut alloriarnissaq pisinnaalerpoq. Maannalu kommunep tungaaninngaanniit eqqumaffissat eqqarsaatissallu suunersut paasivagut, alloriaqqinnissamullu suleqataassalluta.”- Taama Borgmester Ane Hansen oqaaseqarpoq.
