Kommune Qeqetallip atsiisua persuarsiornartumik ilassineqarpoq.  

Pingasunngorneq 24. juuli Borgmester Ane Hansen-ip Kommune Qeqertallip atsiisua Pavia Petersen Ikerasaarsummiu kommunip ataatsimiittarfiani, qullersaqarfimmi INUA-ni sulisut peqatigalungit persuarsiornartumik pulaartorivaat.

Qaasuitsup Kommunia avinneqarnialermat Qaasuitsoq Kujallermi ikaarsaariarnermut ataatsimiititaliaq 21. juuni 2017 kommunip atissaanik siunnersuutaasut 72-sit akornanni aalajangerpoq kommuni Kommune Qeqertalik-mik taaguuteqassasoq.

Kommune Qeqertallip ilisarnaatissaanik siunnersuuteqartut akornanni Julius Jeremiassen Niaqornaarsummiu toqqarneqarluni ilisarnaasiisuulluni.

Pavia Petersen-ip Borgmester Ane Hansen naapinnerani Kommune Qeqertallip atserneranut tunngavilersuutini pappiaqqamut allaganngorlungu nassuiaatini ima imaqartoq tunniuppaa:

”Taamanikkut ukioq 2017 aallartisimalersoq unammisitsisoqarpoq kommuni nutaassaq qanoq taaguuteqartinneqassasoq siunnersuuteqartoqassasoq aaliangersimavunga Kommune Qeqertalik siunnersuutigissallugu taamatut siunnersuuteqarninnut pissutiga siulleq tassaavoq Kalaallit Nunatsinni qeqertat annersaat tassalu Qeqertarsuaq kommuneqarfeqatigilissagipput tassa eqqarsaat siulleq taannavoq, aappaattullu isumanga tassaavoq kommuneqarfittaassarput ilisimangakku qeqertarpassuaqartoq aammalumi illoqarfiit arlariit aammalumi nunaqarfiit ilaat qeqertani inissisimammata.” –  taama oqarpoq Pavia Petersen.

Kommune Qeqertalik 2.200 missaanik qeqertaqarpoq.