Kommune Qeqertalimmi Kommunalbestyrelsip kommunip ukioq 2018-mut naatsorsuutai ulloq 25. juni 2019 akuerai.
Ukioq 2018-mut naatsorsuutit 48,8 mio. Koruuninik sinneqartooruteqarfiupput kiisalu ukiup naanerani aningaasat tigoriaannat 59,3 mio. koruuniullutik.
Naatsersuutit pitsaasumik inerneqarneri arlalinnik peqquteqarpoq. Pissutsit ilagaat sanaartugassat ukiup siulianiit nuutat naqqaniit pilersaarusiorfigineqarsimanerat ukiumut tullermut ingerlaqqittussangorlugit. Taakkua 26 mio. koruuninik aningaasartaqarput.
Kommunalbestyrelsi 2018-mi aalajangerpoq, sanaartugassanut aningaasaliissutit ukiumi tassani atorneqanngitsoortut ukiup tulliani missingersuutitut nuunneqassasut. 26 mio. koruunit sanaartugassanut aningaasaliissutitut atugassiat 2018-mi atorneqanngitsoorput, taamaattumik ukioq mannamut 2019-mut missingersuutinut immikkut ittumik aningaasaliissutitut ilanngunneqassapput.
Aningaasat taakkua ilanngunneqarneri eqqarsaatigissanngikkaanni naatsorsuutit pitsaasumik inerniliunneqarnerini 22,4 mio. koruuniuvoq, tamannalu kommunalbestyrelsip naammagisimaarpaa.
Kommunip avinneqarnera kingornalu kommunip nutaap aallartisarnera suliaqarfiit arlallit, soorunami, amerlanerusunik aningaasanik atorfissaqartitsinerinik kinguneqarnikuupput. Kommunitoqqap, Qaasuitsup Kommuniata, matuneqarnissaanut/ naammassineqarnissaanut kiisalu avinneqarnissaanut aningaasarpaaluit ilaatigut atorneqarput, sulisut arlallit nuunneqartussaapput, kingorna immikkoortortaqarfinni nutaani suleqataalersussaallutik. Sulisut suleriasii aaqqissuussamut nutaamut nalimmassarniarlugit piffissarujussuaq ilaatigut atorneqarpoq, kiisalu sulisussat eqqortut aaqqissuussaanermut nutaamut sulilersinniarnerinut nukippassuit aamma atorneqarput.
Pissutsit taamaattut atuukkaluartut kommunip aningaasartuutit qiviallakaallugit sapinngisamik isumatusaartumik atorsinnaasimavai. Aningaasartuutit annikinnerusut atorneqarnerisa peqqutaat ilaatigut unaavoq; atorfiit arlallit inuttaqarsimannginneri, paarlattuanilli kommunip napparsimalluni sulinngitsoortarnerit sammisimavai, taamaatullu sammininnermini innuttaasunik sullissinerup ajorseriannginnissaa aamma/ imaluunniit pitsanngoriarnissaa qulakkeerniarneqarpoq.
Kommuni ukiup ingerlanerani pitsaasumik ikiorneqarpoq, ilaatigut Kommuneqarfik Sermersooq-mit, tassanngaanniit suliaqarfinni arlalinni ilisimasallit ikiuukkiartortinneqartarput, tamannalu pitsaasorujussuuvoq.
Uanga borgmesteritut kommunip illoqarfiini nunaqarfiinilu sulisut aqutsisullu sulineri assut naammagisimaarpakka, taakkuami tamarluinnarmik taama kusanartigisumik naatsorsuutit angusaqarfigineqarnerinut suleqataapput. Sulisut allanngueqataarnermi sulerusussusermik angisuumik takutitsipput aamma suliat naammassineqarnissaannut piumaffigineqartillutik immikkut ittumik sulinissaminnut piareeqqasarput.
Aningaasartuutit qanoq atorneqarneri suli qiviallakaaneqartussaavoq aamma innuttaasut aningaasaataannik kommunip qanoq atuisarnera suli malinnaavigineqartussaalluni.
Kommune Qeqertalik angisuunik pissanganartunillu suliassaqarpoq aamma ukiup naatsorsuusiorfiusup inernerisa unammillernartunut taakkununnga kommunip suliaqarsinnaanera tunngavilerpaat.
Naatsorsuutit kukkunersiuisunut, kommunip kukkunersiuisuinut, maanna nassiunneqarput.
Aasiaat 27. Juni 2019
Ane Hansen
Borgmester
Kommune Qeqertalik