Sisamanngorneq 16. Maj 2019 Per Kirkeby-jugaluap ikinngutai Aqqaluk Lynge aamma Teit Jørgensen Aasianni Per Kirkeby qalipagarsui Kommune Qeqertalimmi takornarissanut iluaqutigineqarnerunissaanik sulissutiginnittut, Borgmester Ane Hansen peqatigalungu Aasianni katersortarfiliutileqatigiit siulersuisuinut plakatinik postkortinillu tunniussipput. Taamaasilluni Kommune Qeqertalimmi qalipagarsuit nittarsaalluarneqalernissaat suleqatigiinnit suliniutigineqarluni aallartinneqarpoq.
Aqqaluk Lynge filmiliortorlu Teit Jørgensen 1972-imi suleqatigiinnertik aallarnerpaat Qullissat inuerutitaanerat pillugu filmilioramik eqqumiitsuliortoq Per Kirkeby suleqatigalugu. Teit Jørgensenip ukiorpassuit Kirkeby suleqatigisarsimavaa suliaalu filmiliarisarlugit maannalu inuunera pillugu filmiliani naammassilerlugu. Aqqaluup Per Kirkeby 1969-imi Aasianni qalipaanerata nalaanili ilisarisimalersimavaa.
Teit-ip Aqqalluullu 2017-imi ikinngutertik toqukkut qimagutinngikkallarnerani isumaqatigisimavaat eqqumiitsuliat aserutsaaliornissaat qulakkeerumallugu. Maannalu tassa Aasianni katersortarfiup "Qagsse"-p siulersuisui aammalu Kommune Qeqertalik suleqatigalungit suliaq tamanna aallarnisarneqalerpoq
Eqqumiitsuliortup nunarsuarmi tusaamasap Per Kirkeby-ip qalipagarsui kusanarluinnartut 21-usut Aasiaat Katersortarfiata iigaani nivingapput
