Tamanna siunissami takornariarpassuarnik tikisitsinissamut siunertaqarnermut naapertuutinngilluinnarpoq, ingammillu innuttaasut pillugit pitsaasumik sullisserusukkaluartunik eqquinerluttarpoq annaasaqaataasarlunilu. Tamatut ingerlatsineq attanneqarsinnaanngilaq Naalakkersuisut angallassinermi isumaqatigiissusiorsimasut tamanna iluarsiniartariaqarpaat. Taama oqaaseqarpoq Borgmester Ane Hansen, Kommune Qeqertalik
Qeqertarsuami peqqissaavimmi angallannerup kipiluttunarsinerani peqqissaavimmut nakorsaatit, pilattaanermilu atugassat kingusinaarunneqartarput, angallannermi assartuinermi kingullerpaatut angallassassanut inissinneqartaramik. Qeqertarsuarmi nakorsaatit Januarimi piniarneqarsimasut suli tikissimanngillat. Peqqissaavimmut suliartortoqartillugu nakorsaatit assigisaalu angallannermi kinguaattoortinneqartut suliartortunit pingaarnersiorlugit nassarneqartarput, tamannalu aqqutissaanngikkaluartoq niviarsiap oqaluttuaraa.
Aaversinnermi aammik misissugassat Qeqertarsuamit Nuummut nassiunneqaraangamik arlaanni uninngatitaavallaarlutik misissugassaajunnaarlutik ajortittarput. Tamatuma kingunerisaanik innuttaasut arlaleriarlutik aaversittariaqartarput, tamannalu ajornartorsiuterujussuusartoq Susan Vignole Qeqertarsuup peqqissaaviani niviarsiaq oqarpoq.
Nunatta avataaniit peqqinnissaqarfinnut suliartortut angallannermi uninngagallartariaqarnerat peqqinnissaqarfiup inissisimaffissai nerisaqarnerilu akilertarpaat,
suliartortut taakkua nunatsinni najugaqartutut allagartaqanngimmata. Nunaqavissut nunatsinni najungallit angallannerni sapernunerni inissimaffissaat angalatitsisunit isumagineqartartut.
Blue Water nunatsinni assartuisartut suliffeqarfiit ilangaat, Ilulissani immikkoortortaqarfiani inissisimasumi naatitat assartugassallu allat Qeqertarsuup Tunuani ingerlaqqittussat ukiuunerani angallannerit kinguaattooqattaaleraangata naatitat pallenut ilioqqakkat oquinnartut nassiussassallu allat uninngasuutigineqalertarput.
Nassiussat uninngavallaartarnerisa kingunerisaanik, Blue Waterimi sullissisut nassiussilernermi allaffimmi marloriaammik pappilissanik suliaqalertarput. Sullitallu utaqqikatalluinnartut saaffiginnittaqattaartut sullinneqalertarlutik.
Kasper Broberg Qeqertarsuamiu isumaqarpoq angallanneq eqaannerusumik ukioq naallugu aaqqiiffigineqartariaqartoq. Silap pissusaanut naleqquttumik angallannermik aaqqissuusseqqittoqartariaqartoq.
Qeqertarsuami Illoqarfiup pisortaa tamatumunnga ilaliivoq:
-Qeqertarsuarmi atortussat amingaatigineqartut Ilulissanilu uninngatiinnarneqartut akueriinnarsinnaajunnaarpagut.
Atortussat Diskoline-mit inissaqartinneqannginneri pissutigalugu piffissami sivisuumi tingujumaneqarneq ajorput, timmisartuminngooq ajutooqqaneq pissutaalluni.
Atortussat inuutissarsiornermut inuunermilu pisariaqartinneqarluinnartut apuuffissaminnut piaartumik anngunneqarnissaat innuttaasunit suliffeqarfinniillu kissaatigineqarlunilu piumasarineqarpoq.
Pissutsit ajorluinnartut iliuuseqarfiginissaannut aaqqiivigineqarnissaannullu akisussaasut immikkut iliuuseqartariaqalerput.- Benedikte Mølgaard, illoqarfimmi pisortaq Qeqertarsuaq taama oqarpoq.
Angallassinermik isumaqatigiissut maanna atuuttoq siuariartuutaanani kinguariartuutaavoq tamannalu mumisissallugu Naalakkersuisut pimoorunnerusariaqarpaat. Kommune Qeqertalik inuutissarsiornikkut, takornariaqarnikkut innuttaasunillu kiffartuussinermi siuariartuutaasunik suliniuteqarpoq, siuarsaaniarlunilu. Angallannermi pissutsit aporfiit annersarilerpaat tamannalu attanneqarsinnaangilaq, taama Borgmester Ane Hansen naggasiivoq.