Nalinginnaasumik paasissutissiineq
Ilinniagaqarnersiutit tassaapput tapiissutit ilinniartuuguit qinnuteqaatigisinnaasatit. Taakku tapiissutaapput ilinniartuuninni aningaasaqarniarninnut tapertaasussat. Ilinniagaqarnermut tapiissutit makkuusinnaapput:
- Aningaasat ikiorsiissutit
- Ilinniartuunermi akissarsiat
- Ilinniagaqarnermi taarsigassarsiat
- Akiliunneqarluni angalanerit
- Usinik assartuussinerit
- Meeqqanut tapiissutit
- Atuakkanut tapiissutit
Pingaaruteqarpoq ilinniartinnak piumasaqaataasut atugassarititaasullu, ilinniarnermut ilinniagaqarnersiutillu pillugit maleruagassanut iluamik paasisimasaqarnissaq.
Malugiuk
Nunami allami ilinniagaqarniarlutit ilinniagaqarnersiutinik atuarnermullu akiliutinut tapiiissutinik qinnuteqarniaruit, immikkut akuerineqarnissamik qinnuteqaasiussaatit.
Piumasaqaatit
Kalaallit Nunaanni ilinniarniaruit ilinniagaqarnersiutinik pisinnaavutit:
- Danskisut innuttaassuseqaruit
- Kalaallit Nunaanni nunaqavissuuguit
- Ilinniakkamut akuerisaasumut akueritissimaguit
Danmarkimi ilinniarnissamut ilinniagaqarnersiutinik pisartagaqarusukkuit:
- Danskisut innuttaassuseqaruit
- Qinnuteqarnerni ukiuni 5-ni imaluunniit ukiuni 10-ni nunatsinni aalajangersimasumik najugaqarsimanissat aamma 18-nileereernerup kingorna annerpaamik ukiunik pingasuni Kalaallit Nunaata avataani najugaqarsimaneq
- Ilinniakkamut akuerisaasumut akueritissimaguit
Danskit SU-annik tunineqarsinnaanngikkuit, Danmarkimi ilinniarnissannut Kalaallit ilinniarnersiutaanik pisinnaatitaanermut qinnuteqarsinnaatitaavutit piumasaqaataatinik eqquutsisisimaguit.
Danmarkimi ilinniagaqartilluni Kalaallit ilinniagaqarnersiutaannik qinnuteqartariaqarnissaq naliginnaasuunngilaq, Danmarkimi ilinniakkanut amerlanernut qallunaat SU-annik pisinnaagavit.
Danmarkimili ilinniarnerit ilaannut Kalaallit ilinniagaqarnersiutaannik qinnuteqarnissaq pitsaanerusarpoq.
Makkua eqqarsaatigalugit:
- Ilinniakkat immikkut piumasaqaatitallit - 'Ilinniakkat immikkut piumasaqaatillit' ataani annertunerusumik takusinnaavat
- Inuusuttut 20-t inorlugit ukiullit ilinniarnertuunngorniarfinni atuarniartut, inuussutissarsiutinik ilinniagaqarniartut imaluunniit ilinniarnertuunngorniarfinni ilassutaasumik ilinniagaqarniartut
Kalaallit Nunaata avataani ilinniarniaruit Kalaallit Nunaanili najugaqarnak ilinniagaqarnersiutinik pisinnaavutit:
- Danskisut innuttaassuseqaruit
- Minnerpaamik ukiuni 10-ni Kalaallit Nunaanni aalajangersimasumik najugaqareersimaguit annerpaamillu ukiuni 3-ni 18-inik ukioqalereernerpit kingorna Kalaallit Nunaata avataani najugaqarsimaguit
- Ilinniakkamut akuerisaasumut akueritissimaguit
Ilinniagaqarneq imaluunniit inunnik isumaginninneq pillugit Kalaallit Nunaata avataani najugaqarsimaneq Kalaallit Nunaata avataani najugaqarsimanertut naatsorsuussaanngilaq 18-ileereernerup kingorna.
Nunani allani (Danmarkip aamma Kalaallit Nunaata avataani) ilinniagaqarnermut ilinniagaqarnersiuteqarsinnaavutit:
- Danmarkip naalagaaffiani innuttaaguit aamma
- ilinniarfimmi pisortanik akuerisaasumi tiguneqarsimaguit atuarlutillu
Aammalu imatut inissisimaguit:
- Qinnuteqarnerup nalaani Kalaallit Nunaanni aalajangersimasumik najugaqaruit minnerpaamillu tamanna sioqqullugu Kalaallit Nunaanni ukiuni 5-ni najugaqareersimaguit,
- imaluunniit minnerpaamik ukiuni 10-ni Kalaallit Nunaanni aalajangersimasumik najugaqareersimaguit annerpaamillu ukiuni 3-ni 18-inik ukioqalereernerpit kingorna Kalaallit Nunaata avataani najugaqarsimaguit
Ilinniagaqarnermik ingerlatsineq
Tapiissutinik pisartagaqassaguit, ilinniakkamik ingerlatsisariaqarputit.
Imatut isumaqarpoq:
- atuartitsinernut pinngitsoorani peqataaffigisassanut malinnaasussaavutit
- misilitsittarlutillu inaarutaasumik misilitsittassasutit
- allaaserinninnermi sulianik tunniussisassasutit
- pinngitsoorani atuartitsinernut takkuttarnissamut piumasaqaatit naammassisassagitit
Ilinniakkami ingerlatanni pinngitsoorani peqataanissamut piumasaqaateqartoqanngippat suli ilinniagaqarnermik ingerlatsinertut nalilersorneqartarpoq. Taamaammat ukiup affakkaarlugit SU-mik pisartagaqarnermut uppernarsaammik tunniussinikkut Ilinniakkamik ingerlatsinerit uppernarsartassavat
Kikkut ilinniakkamik ingerlatsinerit nalilissavaat?
Aqqutissiuisuit imaluunniit ilinniarfigisavit ingerlaavartumik ilinniakkamik ingerlatsinnerit nalilersortassavaat.
Napparsimaneq peqqutigalugu takkutinngitsooruit
Sivisuumik napparsimalissagaluaruit tamatigorluinnangajak ilinnut namminermut ilinniarnernullu kinguneqartussaavoq. Taamaammat napparsimalerlutit paasigukku piaarnerpaamik ilinniarfigisat paasitipallattariaqarpat. Ilinniakkamik ingerlatsinissamut piumasaqaatit naammassisinnaanngikkukkit, ilinniarfivit ilinniakkamik ingerlatsinerit pillugu uppernarsaatinik pinissaata tungaanut ilinniagaqarnersiuteqarnerit unitsinneqarsinnaavoq.
Ilinniakkat ilinniagaqarnersiuteqarfiusut
Inuussutissarsiutinut ilinniartitaanermut ataatsimut ilinniarninni ilinniagaqarnersiuteqarsinnaavutit. Tamatuma kingorna ilinniagaqarnersiuteqarnissamut piumasaqaataavoq ilinniakkap siusinnerusukkut ilinniagarisimasamut pissusissaatut nangitsineruppat suliaqarfiusullu pineqartup iluani qaffasinnerusumiittussaappat.
Immikkulli ittumik pisoqartillugu inuussutissarsiummik ilinniarnertut qaffasitsigisumik inuussutissarsiornermut ilinniarnissamut allamut ilinniagaqarnersiuteqarnissamut qinnuteqartoqarsinnaavoq, imaappat:
- ilinniakkamut tunngatillugu annertuumik suliffissaaleqisoqarnera pissutigalugu suliffissarsisinnaanngikkuit imaluunniit
- Kalaalit Nunaanni ilinniarniakkamut tunngatillugu sulisussaaleqisoqarpat
Ilinniakkanut assigiinngitsunut pingasunut ilinniagaqarnersiutinik pisinnaavutit:
Inuussutissarsiutinut ilinniartitaanerit
- Inuussutissarsiutinut ilinniakkat akunnattut
- Inuussutissarsiutinut ilinniarnerit tamakkerlugu ilinniartutut akissarsiaqassaatit
- EUD-t ilaanni aningaasatigut ikiorsiissuteqartitsisoqarpoq (stipendium), assersuutigalugu ilinniarnermi suliffimmik misiliititaaleruit.
- Ilaannilu EUD-ni ilinniarnerup ingerlarnga tamaat aningaasatigut ikiorsiissutisisassaatit, assersuutigalugu isumaginninnermut ikiortitut ilinniarniaruit.
Ilinniagaqarnissamut piareersarluni ilinniartitaanerit
- Ilinniagaqarnissamut piareersarluni ilinniarnerit tassaapput ilinniarnertuunngorniarfiit (GUX)
- Ilinniagaqarnissamut piareersarluni ilinniartoq qaffasinnerusumik ilinniartitaanermut piginnaanngorsarneqassaaq
- Ilinniagaqarnissamut piareersarfimmi ilinniarnerit tamakkerlugu aningaasatigut ikiorneqassaatit
Ingerlariaqqiffiusumik ilinniartitaanerit
- Ingerlariaqqiffiusumik ilinniartitaanerit teoriimut tunngasunik ilinniarnerupput
- Ingerlariaqqiffiusumik ilinniartitaaninni aningaasatigut ikiorserneqassaatit qiortartakkat atorlugit
Akigititat
Ilinniagaqarnersiutinik pissarsinissannut qassinik ukioqarnersutit, suna sumilu ilinniarnerit apeqqutaapput.
Ilinnialernissamut piareersarluni ilinniartitaanerit
- 18-it sinnerlugit ukioqaruit, qaammammut 5.229 kr. pissarsiarisassavatit
- 18-it inorlugit ukioqaruit, qaammammut 2.510 kr. pissarsiarisassavatit
- Danmarkimi ilinniaruit, qaammammut 5.333 koruunit pissarsiarisassavatit, SU-miit ilinniagaqarnersiuteqarsinnaanngikkuit.
Malugiuk
Ilinniartut ineqarfiini ineqartunut 18-it inorlugit ukiulinnut ineqarneq nerisaqarnerlu akeqanngilaq.
Ilinniartut ineqarfianni nerisitsisoqartanngippat, qaammammut nerisassarsiutissanik 1.725 kr.-inik imaluunniit 1.045 kr-nik tunineqartassaatit.
Kalaallit Nunaanni taamaallaat atuuppoq.
Inuussutissarsiutinut ilinniartitaanerit
Inuussutissarsiutinut ilinniartitaanerni ilinniartut praktikkerfimminnit akissarsiaqartarput. Akissarsiat praktikkerfimmit praktikkerfimmut assigiinngissinnaapput, taamaakkaluartorli inuussutissarsiummik ilinniakkanik peqarpoq qaammammut stipendianik pisartagalinnik.
Inunnik isumaginninnermut ikiortit aamma peqqinnissamut ikiortit ilinniagaqarnersiutinik ilinniarnertik tamaat pissarsisarput. Ilinniarneq tamaat qaammammut 5.221 kr pissarsiarisarpaat.
Ingerlariaqqiffiusumik ilinniartitaanerit
- Kalaallit Nunaanni ilinniaruit qaammammut 5.229 kr. pissarsiarisassavatit
- Danmarkimi ilinniaruit qaammammut 5.333 kr. pissarsiarisassavatit, SU-mit ilinniagaqarnersiutisisanngikkuit
- Nunani allani ilinniaruit qaammammut 5.857 kr pissarsiarisassavatit
Malugiuk
Ilinniagaqarnersiutit qaammatit tamaasa siumoortumik tunniunneqartarput. Assersuutigalugu augustip aallartinnerani ilinniakkat aallartikkukku, taava juli naappat ilinniagaqarnersiutitit tunniunneqassapput.
Qinnuteqarneq
Kalaallit Nunaanni ilinniagaqarneq
Ilinniagaqarnersiutinut qinnuteqarnissannut marlunnik periuutsinik iliorsinnaavutit:
MitID-qaruit
MitID-qaruit sullissivik.gl aqqutigalugu toqqaannartumik qinnuteqarsinnaavutit
Qulaatungaani imminut kiffartuunneq tooruk MitID-llu atorlugu iserlutit, taava aallartissaatit.
MitID-qanngikkuit
MitID-qanngikkuit piffinni Majoriaq attavigissavat qinnuteqaasiorninni ikiorsinnaavaatit. Eqqaamallugu registerindsigt-imiit uppernarsaatinik ilanngussissagavit, uani aasinnaavat.
Ilinniagaqarnersiutinik ukioq taanna ilinnialernissanni kingusinnerpaamik ulloq 1. marts qinnuteqareersimassaatit.
Kalaallit Nunaanni nakorsaatit katsorsartinnerillu akeqanngillat
Ilinniagaqarnersiutinik qinnuteqassaatit sapinngisamik 1. marts tikitsinnagu ukiumi tassani ilinnialerfissanni.
Kalaallit Nunaanni nakorsartinnerit nakorsaatillu akeqanngillat.
Danmarkimi ilinniagaqarneq
Danmarkimi ilinniarusukkuit, taava nammineerlutit:
Danskit SU-annik, ilinniarfimmit tigusaareernerup kingorna aammalu kingusinnerpaamik ilinniarnerup aallartinnginnerani qaammat ataaseq sioqqullugu qinnuteqarsinnaavutit.
Danskit SU-annik qinnuteqarniarnermi MitID-qaqqaassaatit. Danmarkimi ilinniartuuguit, katsorsartinnernut nakorsamit innersuussaasunut assigiinngitsunut tapiiffigineqarsinnaavutit assersuutigalugu tassanngaannartumik kigutilerisumiittariaqarnermut, tarnip pissusaanut ilisimasalimmut ikiortiserinermut, nakorsaatinullu.
Tamatuma saniatigut ingerlariaqqiffiusumik ilinniagaqarnermi 1.100 koruuninik atuakkanut tapiiffigitittoqartarluni.
Kalaallit Nunaata avataani ilinniagaqarneq
Kalaallit Nunaata avataani ilinniarnermik inissisimasumik ilinniagaqarnersiutinik/immikkut ittunik tapiissutinik qinnuteqarniaruit uani qinnuteqarsinnaavutit: Danmark-imut nunanut allanut ilanngullugu ilinniagaqarnersiutinut/immikkut tapissutinik qinnuteqaat
Nunanut allanut, Danmark ilanngullugu ilinniagaqarnersiutit pillugit qinnuteqarnermi immersugassamut ilitsersuut
Inissisimanerit apeqqutaatillugu, immersuiffissap sumut nassiunneqarnissaa assigiinngitsuusinnaavoq:
• Kalaallit Nunaanniikkuit qinnuteqarnermut immersuiffissaq Kalaallit Illuanut nassiutissavat
• Danmarkimiikkuit qinnuteqarnermut immersuiffissaq Kalaallit Illuanut nassiutissavat
• Nunani allaniikkuit qinnuteqarnermut immersuiffissaq Kalaallit Illuanut Københavnimiittumut siunnersuisartunut nassiutissavat
Danmarkimi Kalaallit Illuisa adressii kipparissumi talerpiup tungaani takusinnaavatit.
Immikkut akuerineqarnissamik qinnuteqarneq
Ilinniagaqarnersiutinik pisinnaaninnut malittarisassaqarpoq eqquuttariaqartunik. Ilaannikkulli pissuteqartoqartarpoq malittarisassanit immikkut ittunik akuerineqartariaqartunik.
Qinnuteqarneq
Malittarisassamut ataatsimut naleqquttumik Immikkut akuerineqarnissamik qinnuteqarniaruit aammalu qinnuteqarnissannut tunngavissanik pitsaasunik tunngavitsialaasunillu peqaruit Immikkut akuersissuteqartarnermut ataatsimiitsitaliamut qinnuteqaammik allagaateqassaatit.
Immikkut akuerineqarnissamik qinnuteqarnissamut immersugassanik pingasunik assigiinngitsunik peqarpoq:
Nalunaarusianut sinneranut immikkut immersugassaqanngilaq.
1. Qinnuteqaat word-dokumentinngorlugu allassavat ilanngussassanullu ilanngullugu scannerlugu.
2. Paasissutissat pisariaqartut, uppernarsaallunilu atsiornerit naqissusiinerillu ilinniagaqarfissanniik pissarsiarinissaat nammineerlutit akisussaaffigivat.
3. Ilaatigullu nunami tassani ilinniakkap pisortatigoortumik akuerineqarsimaneranut uppernarsaatit pissarsiarisussaavatit, aamma ilinniarfimmut qinnuteqaammik nassiussereersimassallutit.
Uppernarsaatissat tamakkerukkit qinnuteqaat Ilinniagaqarnersiuteqartitsivimmut usf@nanoq.gl -imut nassiutissavat.
Malugiuk
Immikkut ittumik akuerineqarnissaq pisinnaatitaaffiginngilat.
Immikkut akuersissuteqartarnermut ataatsimiitsitaliaq ataatsimeereerpat qinnuteqaatinnut atatillugu allakkatigut akissummik nassinneqassaatit. Immikkut akuersissuteqartarnermut ataatsimiitsitaliaq qaammatit tamaasa ataatsimiittarpoq.
Nunani allani ilinniarnerit
Kalaallit Nunaat aamma Danmarkip avataani ilinniarniarnermut immikkut akuersissuteqartoqarnissaanut qinnuteqartuartasaaq.
Nunani allani akiliilluni ilinniakkamik aallartinnissat kissaatigigukku, ilinniarnermut aningaasartuutit Namminersorlutik Oqartussanut aningaasatigut taperserneqarnissannut immikkut akuerineqarnissannut qinnuteqarsinnaavutit.
Ilinniarnermut aningaasartuutinut tapiissutit ukiumut annerpaamik 100.000 kr.-iusinnaapput.
Qiortagaqarluni ingerlatsineq
Qiortagaqarluni aaqqissuussaq
Ilinniakkamik ingerlaqqiffiusumik ilinniagaqartumut qiortagaqarluni aaqqissuussaq ilinnut atuuppoq.
Qiortagaqarluni aaqqissuussaq atorlugu illit ilinniagaqarnersiutinnik aqutsisinnaavutit. Qiortagaqarluni aaqqissuussaq ilinniartumut ataatsimut 82-inik qiugassanik imaqarpoq, qiorsineq ataaseq qaammatip ataatsip ilinniagaqarnersiuteqarneranik naleqarluni. Imannalli paasineqassanngilaq, ukiuni sisamani ilinniarnerni ataatsimi qiortagassat 82-it atorsinnaagitit.
Piffissamut ilinniarfiusussatut sivisussusilikkamut ilinniagaqarnermusiaqarsinnaavutit taassumalu qaavatigut qaammatit aqqaneq-marluk (”unitsitsigallarnermik”) ilasinnaallugit.
Kalaallit Nunaanni ingerlariaqqiffiusumik ilinniakkanut qiorsinerit 82-it Kalaallit Nunaanni atugassatut tunniunneqartarput.
Danmarkimi qallunaat ingerlariaqqiffiusumik ilinniagaannut qiorsinerit 58-iusarput.
Piffissaq ilinniarfiusussatut sivisussusiligaq sunaana?
Ilinniakkat tamarmik ukiuni aalajangersimasuni sivisussuseqartussatut nalilersorneqartarput. Tamanna piffissaq ilinniarfiusussamik taaneqartarpoq. Taanna aallaavigalugu illit ilinniartutut qiorsinerit qassit pisinnaatitaaffigissaneritit naatsorsorneqartarput.
Assersuut Peqqissaasunngorniarneq ukiunik sisamanik sivisussuseqarpoq. Qaammatit 48-it qiugassat 48-itut naleqarput. Taakkua saniatigut unitsitsigallarneq qaammatinik 12-nik sivisussusilik, tassa qiugassat 12-t ilassutigineqartarput. Peqqissaasunngorniarluni ilinniarnermut ataatsimut taamaalillutit qiugassanik 60-inik tunineqarsinnaassaatit.
Linkimi ataaniittumi illit qiorsinnaasatit qassiunersut takusinnaavat. Aamma ilinniarfigisanni siunnersortit saaffigisinnaavat.
Assersuut
Kalaallit Nunaanni ingerlariaqqiffiusumik ilinniarputit ukioq ataaseq Kalaallillu Nunaanni qiortakkat 12-t atorpatit. Allamik ilinniagaqarusullutit paasigakku Danmarkimi ingerlariaqqiffiusumik ilinniakkamut maanna qinnuteqarputit.
Qallunaat ilinniagaqarnersiutaannik qinnuteqaruit Kalaallit Nunaanni qiukkat 12-t atoreersimallugit ilisimatitsisissutigisussaavat, qallunaat qiortagaannit qioriikkat taakku ilanngaatigineqassapput.
Danmarkimi ingerlaqqiffiusumik ukioq ataaseq ilinniarsimaguit kingornalu Kalaallit Nunaanni nangeqqikkusussagukku periuseq taanna aamma atuutissaaq. Qallunaat ilinniagaqarnersiutaanni qiugassat 12-t atoreersimasatit, illit qiukkat 12-t ilisimatitsissutigisimagakkit Kalaallit Nunaanni qiugassanit ilanngaatigineqartussanngussapput.
Eqqaamajuk pisariaqartunik ilisimatitsisimannginneq akiligassitsinnermik kinguneqarsinnaammat.
Misissugassanik ingerlaavartumik tigusisarluni nakkutilliisoqartarpoq.
Piffissaq ilinniagaqarnermusiffissaq Ilinniagaq ataaseq bachelorinngorniarnertaqartarpoq kandidatinngorniarnertaqartarlunilu, ilinniakkat taakku marluk immikkoortutut isigineqartarput, taamaattumik immikkoortut tamarmik immikkut qiugassanik 12-nik ilassuserneqartarput. Ilassutitut qiugassat pisariaqartitsisoqaraangat aatsaat tunniunneqartarput, tassa imaappoq piffissaq ilinniarfiusussaq kinguaattoorfiusimappat, tunniussisoqartassasoq. Ilinniakkamut aalajangersimasumut ilassutitut qiugassat atorsimanngikkaanni ilinniakkamut nutaamut taakku nuunneqarsinnaanngillat aamma bacheloritut ilinniakkamit kandidatitut ilinniakkamut.
Qiugassanik naatsorsuisarneq tunniussisarnerlu
Qiugassat qaammatinut iluitsunut naatsorsorlugit qiorneqartarput. Ilinniarnerup aallartinnerani nalaanilu qaammatip akissarsiffissap ulluisa 15-ianni ilinniartuusimaguit qiorsinissamut pisinnaatitaaffeqassaatit. Qaammammik siumoorluni qiorsimasat tunniunneqartarput.
Ilinniarnerup ilaani peqataasussaannginnermik akuerineqarneq qiorsiffiussanngilaq
Ilinniarnerup ilaani peqataasussaannginnermik akuerissallutit ilinniarsimaguit, piffissaq ilinniarfissat sivikinnerussaaq. Taamaattumik ilinniagaqarnermusiffissat aamma sivikinnerussaaq. Assersuutigalugu ilinniarnerup ilaani, qaammatini arfinilinni, peqataasussaannginnermik akuerineqarsimaguit, piffissaq ilinniarfissatut nalunaarsukkamit taakkua ilanngaatigissavagut aamma ilinniagaqarnermusiffissaq qaammatinik arfinilinnik sivikillissavarput.
Piffissap ilinniagaqarnermusiffissap sivitsorneqarnera Piffissaq ilinniarfissaq qaammatinik 60-inik amerlanerusunik sivisussuseqarsimappat, piffissaq ilinniarfissaq 82-inik qiornertalittut sivitsorneqarsinnaavoq. Soorlu tamanna nakorsanngorniarnermut atuuppoq. Ilinniarnerit taamaatiinnarukku sivitsortitsineq atorunnaarsinneqassaaq.
Qiorsissasanani aalajangerneq Qiugassat kingusinnerusukkut atorusukkukkit qiorsisarniarnak aalajangersinnaavat. Qiorsisassanani aalajangertoqarsimappat, piffissaq atuarfiusussaq imaluunniit ilinniagaqarfiusussaq allanngorunnanngillat. Maluginiassavat qaammatini qiorsinernik atuinngitsoorfigisanni ikiorsiissutinik immikkut ikiorsiissutinik aamma pisinnaassannginnavit (soorlu angalanernik akiliutsinnernut suliaritinnernullu aningaasartuutit assigisaallu).
Pissutsit immikkut ittut Immikkut ittumik pisoqartillugu siunnersortip ilinniagaqarnersiutinut killiussaq 82-inik qiorsinertalik qiorsinernik 12-nik ilassusersinnaavaa.
Tamanna imatut pisoqartillugu pisarpoq:
• ilinniarfiup aqutsisoqarfiani, ilinniagaqartut siunnersuisoqatigiivini ilinniarfimmullu atasumik kattuffinnut assingusunut peqataasimaguit.
• Ilinniagaqartut akornanni inooqatigiinnermut ilinniagaqarnermulluunniit tunngassutilinnik suliaqarsimaguit
• Sivisunerusumi napparsimallutit uninngasimaguit, ilaquttanniluunniit qanigisanni napparsimasoqarpat toqusoqarpalluunniit.
• Meerartaarnermut meeravissiartaarnermullu atatillugu qiorsinernik ilassutinik pisinnaatitaavutit meeraq tigummigukku atuanngiffeqarnallu
Qaffasissumik timersortartuuguit imaluunniit Elite Sport Greenlandimit timersullammaaguit immikkullu aaqqissuussamik ilinniartuullutit Ilinniagaqarnersiuteqarfimmit akuerisamik, piffissaq ilinniagaqarnersiuteqarfiusussaq immikkut ilassuteqarfigineqarsinnaavoq.
Qiugassamit sorlermilluunniit qiorsisimaguit apeqqutaatinnagu qiorsivissanit marluusunit ataatsikkut qiorsisoqartussaassaaq.
Ilinniakkat immikkut piumasaqaatitallit
Ilinniakkat immikkut piumasaqaatitallit ilinniagaapput immikkut tapiiffigineqarnissamik qinnuteqaateqarfigisinnaasatit, illinniakkamik ingerlatserusukkuit.
Ilinniakkanut immikkut piumasaqqatitalinnut immikkut tapiiffigineqarnissamik qinnuteqarsinnaavutit, ilinniagaqarnerni annerusumik minnerusumilluunniit aningaasartuuteqartariaqassaguit.
Taamaammat ilinniakkanut aalajangersimasunut Namminersorlutik Oqartussat tapersersugaannut qinnuteqarsinnaavutit.
Ilinniagaq ingerlatassat allattorsimaffimmiippat stipendiamik ilassutaasumik qinnuteqarsinnaavutit.
Ilinniakkat immikkut piumasaqaatitallit sorliit atuarfigisinnaanerlugit link-ini ukunani takusinnaavatit:
Ilinniakkat Qallunaat Nunaaniittut tapiiggifineqarsinnaanngittut Namminersorlutik Oqartussaniit
Danmarkimi ilinniakkat danskit SU-vinit akuerisat ilaat Namminersorlutik Oqartussanit akuerineqarusussimanngillat naak danskit SU-vimit akuerineqarsimagaluartut.
Ilinniakkat makku Kalaallit Nunaanni Namminersorlutik Oqartussanit akuerineqanngillat:
Naammagittaalliorneq
Ilinniagaqarnersiutinik qinnuteqaatinnut tamakkiisumik imaluunniit ilaannakuusumik itigartinneqarsimaguit naammagittaalliuuteqarsinnaavutit.
Naammagittaalliuuteqarniaruit allaganngorlugu naammagittaalliuuteqassaatit. Naammagittaalliuutinnut ilanngullugu itigartitsissut ilanngutissavat.
Erseqqissaassutigineqassaarli Immikkut Ittumik Ataatsimiitsitaliap aalangiussai naammagittaalliutigineqarsinnaanngimmata.
Nammagittaalliuutit Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfimmut nassiutissavat.
Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik
Postboks 1029
3900 Nuuk
ikin@nanoq.gl
Naalakkersuisoqarfimmit qinnuteqaatit tiguneqarneranit naammagittaalliuutivit suliarineqarnerata naammassineqarnissaanut qaammammik ataatsimik sivisussuseqarsinnaavoq. Naammagittaalliuutit naammassineqariarpat allakkatigut akissutisissaatit.
Qinnuteqarnissamut killissaliussat
Aalajangiinerup tiguneraniit kingorna naammagittaalliuuteqarnissamut kingusinnerpaamik sapaatit-akunneri
Aamma atuarsinnaasatit