Nalunaarummik tigusaqarnerup kingorna kommuni aaliagiissaaq isumaginninnikkut misissuineq pisariaqartinneqarnersoq.
Isumaginninnikkut misissuinermi meeqqap pisariaqartitai suunersut paasinarsisarput aamma misissuineq meeqqap ilaqutariillu eqqortumik tapersersorneqarnissaannik toqqaanissamut iluaqutaasarpoq.
Isumaginninnikkut misissuineq tassaavoq kommunini sulianik suliaqartartut sakkussaat, meeqqap pisariaqartitaanik aamma meeqqap atugaasa pitsanngorsarnissaannut eqqortumik tapersersuisinnaajumalluni ikiorsiissutinik sorlernik qulaajaanermi atorneqartartoq.
Meeqqap ineriartorneranik, ingerlalluarneranik peqqissusaanillu kommuni nalunaarummik tigusigaangami, ernummatigisat aallaavigalugit navianartorsiortoqaraangat, isumaqartoqaraangallu meeraq immikkut ittumik tapersersorneqartariaqarunartoq isumaginninnikkut misissuisoqalertarpoq.
Isumaginninnikkut misissuineq tassaavoq kommunimi sulianik suliarinnittartut meeqqap attaveqaataasullu ajornartorsiutaannik nukittuffiinillu siammasissumik ilisimasaqalerniarlutik atortagaat.
Misissuinerup siunertaraa meeqqap inissisimaffianik paasinninnissaq, taamaasilluni meeqqap atugarissaaqqilernissaanut aammalu meeraq ilaqutariillu eqqortumik ikiorsiissutinik tulluuttunik tapersersorneqarnissaanut inerniliisussaq.
Angajoqqaatut meerarlu ajornanngippat suleqatigalugit isumaginninnikkut misissuisoqassaaq. Tamanna ima paasineqassaaq meeraq angajoqqaallu isumaginninnikkut misissuisoqarnerani ataasiarlutik arlaleriarlutilluunniit oqaloqatigineqartassapput. Meeqqap isumaa isumaginninnikkut misissuinermi akuutinneqassaaq aamma meeqqap isiginnittariaasii meeqqap ukiuinut inerisimassusaanullu naleqqussarneqartassapput.
Angajoqqaatut oqartussaassusilik meerarlu misissuinerup siunertaanik qanorlu pinissaanik ilisimatinneqassapput.
Isumaginninnikkut misissuinerup siunertaraa suliamik suliarinnittartup meeqqap, ilaqutariit meeqqallu attaveqarfii suleqatigalugit meeqqap inissisimaffianik takunnissinnaalernissaa.
Meeqqap inissisimafianik takunnissinnaalernerup suliamik suliarinnittartup meeqqap ajornartorsiutaanik aammalu nukittuffiinik paasisaqalersissavaa, taamaalilluni meeqqamut ilaqutariinnut naleqquttunik qanoq tapersersuinissaq takuneqarsinnaalersissallugu.
Kommunimi sulianik suliarinnittartup isumaginninnikkut misissuinermini qulequttat 6-t makkua misissussavai:
- Meeqqap pissusilersornera, atugarisai ineriartorneralu.
- Meeqqap ilaqutaariinnerani pissutsit, matumani ilaqutariit attaveqarfiillu qanoq katitigaaneri ilanngullugit.
- Meeqqap ulluunerani paaqqinnittarfimmiinneranut imaluunniit atuarneranut tunngasut.
- Meeqqap peqqissusaanut tunngasut.
- Meeqqap sunngiffimmi ikinnguteqarneranullu tunngasut.
- Pissutsit attuumassuteqartut allat.
Suliamik suliarinnittut nalilersussavaa isumaginninnikkut misissuinermi immikkoortut 6-t tamarmik misissorneqassanersut. Suliamik suliarinnittup suliani ataasiakkaani nalilersorneqartarput immikkoortut sorliit paasissutissiissutigineqassanersut.
Suliamik suliarinnittartup meeraq immikkut ittumik tapersersorneqarnissaminik pisariaqartitsinersoq paasiniarlugu isumaginninnikkut misissuinermini suliaqarfiit attuumassutillit, soorlu meeqqap ulluunerani paarineqartarfia, atuarfia suliaqarfiillu allat attuumassuteqartut paasissutissanik pissarsiffiginiarlugit aallerfigissavai.
Aamma suliamik suliarinnittartup meeqqamut tapersersuinerit suliniutillu aallartinneqarsinnaasut nalilersorsinnaajumallugit meeqqamut attaveqaataasut nukittuffii misissussavai.
Meeraq attaveqarfigisartakkallu pillugit paasissutissat tamaasa sulianik suliarinnittartup katersoreerunigit isumaginninnikkut misissuineq naammassiniartussanngussavaa, isumaginninnikkullu misissuinerup aallartinneqarnerani tunngaviusumik ajornartorsiut qanoq aaqqinneqassanersoq inerniuliussassamik suliaqartussanngussaaq.
Meeraq attaveqaataasullu pillugit paasissutissat katersorneqartut aallaavigalugit sulianik suliarinnittartup ilaqutariit nukittuffii qanoq isikkoqarnersut eqikkaasinnaalissaaq misissueqqissaarsinnaalissallunilu, aamma kommunip meeraq ilaqutaasullu pillugit ajornartorsiutit kivikkuminaatsitaat pillugit qanoq tapersersuisinnaanera takusinnaalissavaa.
Siuliini eqikkaaneq misissueqqissaarinninnerlu tunngavigalugit, meeqqap atugaanik qulakkeerinninniarluni pisarialimmik suliaqaqqinnissamut ajornartorsiutit suunerinik sulianik suliaqartartoq tunngavilersorluni isummersussaaq.
Suliat aallaavigalugit nalilersuinerup nalaani suliamik suliarinnittartup kommunip tungaaniit ikiorsiissutit aallartinneqarsinnaasut nalilersuiffigissavai.
Meeraq pillugu tapersersuinissamut arlalinnik periarfissaqartutut suliamik suliaqartartoq naliliissimassappat, meeqqamut ilaqutariinnullu siunissaq qaninnerusoq ungasinnerusorlu eqqarsaatigalugit ikiorsiissiutit ataasiakkaat qanoq kinguneqarsinnaanersut nalilersuissalluni allaaserinnissallunilu pingaaruteqarpoq.
Isumaginninnikkut misissuinerup inernerisinnaavaa ilaqutariit nukittuffii naammattut namminneq meeraq tapersersorsinnaangaat, kommunilu ikiorsiissutinik aallartitsisariaqanngittoq.