Kommune Qeqertalimmi borgmesteri nalunaaruteqarpoq, Qasigiannguaniittoq ulloq unnuarlu angerlarsimaffik Puilasoq, ukiumi nutaami ammaqqissasoq.
Borgmesteri Simigaq Heilmann ima itisiliivoq: ”Nuannaarutigaara, kommunalbestyrelsi tamarmiusoq aalajangermat ulloq unnuarlu angerlarsimaffik Puilasoq kingumut ukiumi nutaami ammaqqissasoq. Suli siunertaraarput anguniarlugulu meeqqat angajoqqaaminnut angerlaqqissinnaasut angerlartinneqarumaartut, angajoqqaarsiaasartunillu amerlanerusunik peqalersinnaanissarput. Pingaaruteqarpormi meeqqat ilaqutariinni toqqissisimanartumik peroriartussasut. Taamaattorli kommunitsinni ulloq unnuarlu angerlarsimaffiup ukiumi nutaami ammaaqqinnissaa Kommune Qeqertaliup kommuninut allanut namminersortunullu ulloq unnuarlu angerlarsimaffiutilinnut aningaasarpassuarnik atuineranik annikillisaaqataassaaq.”
Siusinnerusukkut siunertaasimasoq, siunertarineqaannassaaq tassalu meeqqat 0-17 ukiullit avatangiisaannut eqqissisimanartumik aamma toqqissisimanermik angerlarsimaffippalaartumillu pissutsinik pilersitseqataassasoq. Puilasoq meeqqanut arfineq pingasunut inissaqassaaq.