Pingasunngorneq novembarip ulluisa 29-anni 2023 Aasiaat aamma Saint Philippe illoqarfittut ikinngutigiilerlutik atsioqatigiipput.
Illoqarfiit marluk, Saint-Philippe, Reunion Island aamma Aasiaat, avatangiisinik piujuaannartitsineq, assassussakkanik iluaquteqarsinnaaneq, aalisarnermik ineriartitsineq, kulturikkut paarlaasseqatigiissinnaaneq aammalu ilinniartitaanikkut qileruteqalernissartik pillugu illoqarfittut ikinngutigiilernertik uppernarsarlugu suleqatigiilerniarlutik paaseqatigiissutigaat.
Tamannalu nalliussillugu ippassaq marlunngorneq novembarip ulluisa 28-anni 2023 Aasiaat Katersortarfianni ilasseqatigiipput. Saint-Philippemiit peqataapput; Borgmester, atorfilittai allallu. Aasianniit peqataapput; Borgmester, kommunalbestyrelsemi ilaasortat, Kommunimi atorfilittat, Aasianni suliffeqarfiit ilaannit qaaqqusat.
Saint-Philippemiit tikeraat susassaaleqatinneqanngillat. Tassa illoqarfimmi suliffeqarfiit arlallit pulaarpaat, aammalu nunaqarfik Akunnaaq ilaasa tikeraarpaat. Tikeqqaaramik Polar Seafood pulaarpaat soorunami aamma suliffeqarfiit allat. Ualikkut Aasiaat Katersortarfiani ilasseqatigiinnermut peqataapput. Unnukkut Egedep oqaluffiani erinarsoqatigiit Aasiaat Nipaat tusarnaariarlugit. Ullumikkut pingasunngornermi Aasiaat Katersugaasiviat, illu issumik ujaqqanillu qammagaq, meeqqat atuarfiat Gammeqarfik, GUX-Aasiaat pulaassavaat. Minnerunngitsumillu illoqarfiit taakku marluk isumaqatigiissutertik ualimut nal. 16.00 atsioqatigiissutigissavaat.
Saint-Philippe
Illoqarfik Saint-Philippe 7.000 missarluinnaani inuttaqarpoq. Saint-Phillippe illoqarfiani nillikenik, muskatsinik aalisarnermillu sivisoorsuarmik inuussutissarsiutigineqarsimapput. Taakkuli 1800-kkunni Vanlijenik ivigarsuarnillu sukkuliassanik taarserneqarsimapput. Tamatuma nalaani sukkuliorfiit marluk (Baril aamma de la Trinité) sananeqarput. Ullumikkullu palmit inerittuinik aamma naatitsineq vanlijenillu naatitsineq ingerlanneqartarput.
Innermik anitsisartoqarnera pissutigalugu siusinnerusukkut umiarsuarnik ingerlaarfigineqarnissaa ersigineqartarsimavoq sineriaa allanngoraannaavimmat. Umiarsuarpassuillu ikkarlinnikorpassuaqarfiuvoq taamaalilluni.
Saint-Phillippep sumiiffia
Illoqarfik Saint Phillippe Afrikap kangianiittup Madakasgarip kangiani qeqertaarannguup kangiani kujammut isuani inissisimavoq. Afrikap eqqannguani inissisimagaluarluni illoqarfik Frankrigemut atavoq – kommuneuvoq.
Illoqarfimmi najugaqartut amerlanerpaartaat sinerissami najugaqarput.
