Kommune Qeqertalik aamma Avannaata Kommunia nunap immikkoortuani ineriartortitsinissaq pillugu suleqatigiinnerulernissamik kissaateqarput

Borgmesterit ataatsimeeqatigiillutik Ilulissani mittarfittaassap aamma suliniutit aalajangersimasut kommunini marluusuni innuttaasunut inuussutissarsiornermullu qanoq periarfissiisinnaanerat oqaluuseraat.

Sisamanngornermi oktoberip 15-ianni Kommune Qeqertalimmi borgmesteri Avannaata Kommuniani borgmesterimik Ilulissani ataatsimeeqateqarpoq. Ataatsimiinnermi kommunit akornanni nunap immikkoortuani ineriartortitsinissaq pillugu suleqatigiinnerulernissamut periarfissat oqaluuserineqarput.

Ataatsimiinnermi ilaatigut Kommune Qeqertaliup Torsukattammi illuaqqamik pilersitsinissamik pilersaarutaa, Ilimanamiit Qasigiannguanut aqquserngiornissamut periarfissaq kiisalu Ilulissani mittarfittaassap pilersinneqarneratigut ineriartortitsinissamut periarfissat oqaluuserineqarput.

Pingaarnertut oqaluuserineqarpoq kommunit suleqatigiinnerisigut kommunit killeqarfiisa akimorlugit takornariaqarneq inuussutissarsiornerlu qanoq nukittorsarneqarsinnaanersut, aammalu ineriartorneq kommunini marluusuni innuttaasunut iluaqutaanissaa qanoq qulakkeerneqarsinnaanersoq.

Ilulissani mittarfik nunap immikkoortuani ineriartortitsinissamut periarfissanik nutaanik ammaassissooq. Kommunit suleqatigiinnerulernermikkut periarfissat taakku diskobugtimi illoqarfinnut nunaqarfinnullu iluaqutaanerulersikkusuppaat.

– Kommunit killeqarfii akimorlugit suleqatigiinnerput nukittorsarusupparput, taamaalilluta innuttaasunut amerlanerusunik periarfissaqartitsisinnaaniassagatta. Ineriartorneq kommunimut ataatsimut killeqartariaqanngilaq, Kommune Qeqertalimmili Avannaata Kommunianilu inuussutissarsiortunut innuttaasunullu periarfissanik pilersitsissalluni, Kommune Qeqertalimmi borgmesteri oqarpoq.

Suleqatigiinnerup siunertaraa kommunit soqutigisaasa ataatsimoorfiusut sumiiffinnilu nukittuffiit qanoq ilillutik nunap immikkoortuani ineriartortitsinissamut periarfissanik piviusunngortitsisinnaanersut misissussallugu.