Assassornermut sulliviit – Nalinginnaasumik paasissutissiineq

Assassornermut sulliviit – Nalinginnaasumik paasissutissiineq

Assassornermut sullivik innuttaasunut tamanut assassornermik soqutigisaqartunut sulliviuvoq ammasoq. Assassornermut sulliviit amerlanerit atorneri akeqanngillat. Sumiiffiilli ilaanni assassornermut sullivimmik atuisinnaajumagaanni eqqumiitsuliortut peqatigiiffiannut ilaasortaanissaq pisariaqartarpoq.

Assassornermut sulliviup init atortullu pisariaqartut atugassiissutigisarpai. Assersuutigalugu tassaasinnaapput:

• Maskiina moreersit (slibemaskine)
• Maskiinamik pilattuutit
• Maskiinamik qillarissaatit
• Sannatit assigiinngitsut

Assassornermut sulliviup atortussat atugassiissutigineq ajorpai. Taamaattoq sulliviit ilaanni atortussat pisiarinissaannut periarfissaqarsinnaavutit. Atortussat pisiarisinnaanngikkukkit, nammineq nassartariaqarpatit. Assersuutigalugu tassaasinnaapput:

• Ukkusissaq
• Nassuit
• Qilalukkap tuugaavi
• Ujaqqat erlinnartut

Assassornermut sullivimmi sanaatit, toqqaannartumik assassornermut sullivimmut tuniniarsinnaavatit. Sanaatit aamma tuniniarsinnaavatit:

• Pisiniarfinnut eqqumiitsulianik nioqquteqartunut
• Unnuisarfinnut
• Imaluunniit aqqusinermi tuniniaanermi

Malugiuk
Illit kommunerisavit assassornermut sullivik aningaasalersorlugulu nakkutigisaraa. Kommunivillu aamma ammasarfiit aalajangertarpai.

Assassornermut sulliviit illoqarfinni tamani pigineqanngillat.