Qimmiutitaannginninni

Qimmiutitaannginninni

Akigititat
Akigititat akinut allattorsimaffimmi ataaniittumi nassaarisinnaavatit.

Akit allattorsimaffiat 2021

Paasissutissat nalinginnaasut

Inuppassuit qimminik nuannarisaqarput qimmiutitaarusuttarlutillu. Taamaattorli qimmiutitaannginnermi pilersaarusiortoqartariaqarpoq eqqarsaatigeqqissaagaasallunilu. Illit ilaquttatillu sulernerlusi paaseqqissaarnissaa pingaaruteqarpoq. Imminut taamaattorli aamma qimmeq eqqarsaatigalugu. Qimmimik pisaaruit ataavartumik toqunissaata tungaanut akisussaaffiliisuuvoq.

Assersuutigalugu, ilisimaviuk qimmit nalinginnaasumik ukiut arfineq-pingasuniit ukiunut 14-nut uumasarmata? Qimmeq ukiorpassuarni paarilluartussaavat. Qimmiutitaannginninni siunnersuutitsialaat eqqarsaatigisariaqakkatillu ukuusinnaapput.

Piffissaq, aningaasaqarneq ineqarnerlu

Qimmimut piffissaqarluarnissaq pingaaruteqarpoq. Qimmeq ullormut akunnerit arfineq-pingasut sinnerlugit kisimiinnissaa innersuussutaanngilaq.

Tamatuma saniatigut qimmeq aalanissaanut eqqarsartaatikkullu sungiusarluarneqartassaaq. Qimmiutit ullormut minnerpaamik pingasoriarlutit aneersittassavat.. Naatsiivimmut anillatsillugu naammanngilaq. Tamatuma saniatigut eqqarsartaatsikkut suliaqartinneqartassaaq, assersuutigalugu sungiusarnikkut qimminut ikkussortakkatigulluunniit.

Qimmeqarneq aningaasanik naleqarpoq. Qimmeq akeqarnerata saniatigut nerisassanut, atortussanut aningaasartuutissanullu aningaasartuuteqarsinnaasoq eqqaamassavat. Qimmeq napparsimalissagaluarpat uumasut nakorsaanut nakorsiarnissaa aamma akeqassaaq.

Illumi inissiamiluunniit najugaqaraluarussi inip eqqortumik pequsersorsimanissaa aamma pingaaruteqarpoq. Qimmeq inissaqassaaq, sanilinullu akornutaassanngilaq.

Najugarisannilu qimmeqarsinnaatitaanerlutit aamma qulakkeeqqaassavat.

Qimmit meeqqallu

Qimmeqarluni alliartorneq meeqqanut nuannersinnaavoq, meerarpassuillu qimmiutitaarusuttarput. Ajoraluartumilli pissanganarunnaartarpoq, meeqqallu qimmimik paarsinissaminnut neriorsuutertik puigortarpaat. Taamaammat qimmeq inersimasumit akisussaaffigineqartariaqarpoq, meeqqanullu qimmimik akisussaaffeqarnissaq naatsorsuutigineqanngilluinnassanani.

Taamaattorli qimmiuteqarneq meeqqanut ilikkarfiusinnaalluarpoq. Uumasunut asanninnermik ataqatigiinnermillu, taamaattorli aamma akisussaaffimmik, ataqqinninnermik isumassuinermillu. Pingaaruteqarpoq qimmeq angerlannginnerani qanoq pingaaruteqartiginersoq qanorlu qimmeqarnermi inatsiseqarnersoq meeqqanut nassuiassallugu qimmiutitaarniarlusi aalajangerussi.

Kingoqqiffilimmik qimmiutitaarneq

Nunatsinni qimmit akusaarrapput, ilaatigut Nuummi qimmit allallu. Taakku nalinginnaasumik peqqillutillu inequnartarput. Taamaattorli qimmip suussusaa nalugaanni nalunartarpoq qanoq ittumik qimmiutitaarnerluni.

Qimmip suussusaanik ilisimasaqarluni qimmiutitaaraanni amerlanertigut pissusaa peqqissusaalu nalinginnaasumik ilisimaneqartarpoq. Taamaattorli kingoqqiffilimmik qimmiutitaarnissaq akisunerusinnaavoq pisariunerullunilu, amerlanertigut Danmarkimeersuunngikkaangamik nunat allaneersuusaramik.

Qanorluunniit taamaakkaluartoq qimmiutissanik aalajangertinnak eqqarsarluaqqaartariaqarnissat pingaaruteqarpoq. Qanoq pilliuteqartigissanersutit qanorlu piumasaqarnerlutit apeqqutaalluni qimmiutitaassaatit. Assinganik nappaateqarpallaanngitsumik imaluunniit ajoquteqarpallaanngitsumik qimmiutitaarnissaq iluarnerpaasarpoq.

Nunatsinni issittarnera eqqaamasassavit ilagaat. Qimmit tamarmik issittumi uummasuunissaminnut naleqqunneq ajorput.. Meqqukitsumik qimmiutitaarniaruit pingaaruteqarpoq ukiumi oqorsaatissaanik pisinissaq.