Ulluunerani paaqqinnittarfiit - Inissiineq, anineq akiliisarnerlu

Ulluunerani paaqqinnittarfiit - Inissiineq, anineq akiliisarnerlu

Kommune Qeqertalimmi meeqqavit ulluunerani paaqqinnittarfimmi inissamik pissarsinissamut allatsissinnaavat

• meeraq sapaatit akunnerinik 16-inik utoqqaassuseqalerpat
• imaluunniit meeqqap illoqarfimmut nunaqarfimmulluunniit tikinnissaa qaammammik ataatsimik sioqqullugu

Ulluunerani neqeroorummut qinnuteqaat

Ulluunerani neqeroorummit anisitsineq

Ulluunerani neqeroorummi inigisap attartortinneqarnera

Ulluunerani neqeroorfinni inaannik attartortitsineq

Meeqqap meeqqerivimmiitinnerani akiliunneqarnissaanut akuerineqarnissamut pisariaqartitsineq tunngavigalugu naliliineq

Akit allattorsimaffiat 2021

Nalinginnaasumik paasissutissiineq

Meeqqavit ulluunerani paaqqinnittarfimmi paaritittalernissaanut, paaritittarunnaarnissaanut imaluunniit utaqqisut allattorsimaffiannut allatsinnissaanut kissaateqaruit, sullissivik.gl-ip nittartagaatigut matumuuna Imminut sullinneq aqqutigalugu allatsissinnaavat imaluunniit najukkanni innuttaasunut sullissivimmut nunaqarfimmiluunniit allaffianut saaffiginnissuteqarnikkut allatsissinnaallugu.

Angajoqqaatut meeqqavit paaqqinnittarfimmi sorlermiinnissaa kissaatigisinnaavat.

Meeqqat meeraaqqerivimmi angerlarsimaffimmiluunniit paarsisartumi inissisimappat, meeqqanut paaqqinnittarfimmiinnissaanut ukiui naammalerpata neqeroorfigineqassaasi.

Utaqqinarsinnaavoq ulluunerani paaqqinnittarfimmi inissarsiortoqartillugu.

 

Akigititat

Ulluunerani paaqqinnittarfiit akigititaat kommunip aalajangertarpai. Akiliutissaq apeqqutaavoq:

• Ilaqutariittut ukiumut aningaasarsiassi amerlassusaat
• Meeqqanik qassinik paaqqinnittarfinniittuuteqarnersi

Meeqqavit ulluunerani paaqqinnittarfimmiinneranut akiliinngikkuit meeqqavit inissani annaaratarsinnaavaa.

Inissisimaffiit allannguuteqarpat, soorlu avikkuit, suliffittaaruit ilinniagaqaleruilluunniit aamma meeqqavit ulluunerani paaqqinnittarfimmiinneranut akiliutitit allannguuteqassapput. Inissisimaffiit allannguuteqarpat pisussaavutit kommunimut saaffiginnissallutit.

 

Qinnuteqarneq

Meeqqavit ulluunerani paaqqinnittarfimmiilernissaanut, aninissaanut imaluunniit utaqqisut allattorsimaffianniilernissaanut allatsissinnaavat, taamaaliorsinnaavutillu sullissivik.gl-ip nittartagaatigut Imminut sullinneq aqqutigalugu.

Imminut sullissaguit NemID atussavat. NemID netbankinnut atortakkavit assinga atorsinnaavat.

Najukkanni innuttaasunut sullissivimmut imaluunniit nunaqarfimmi kommunip allaffianut immersuiffissamik immersuinissamut, atsiornissamut tunniunnissaanullu aamma saaffiginnissallutit periarfissaqarputit. Saaffiginnikkuit makku nassassavatit:

• Meeqqavit ateqarneranut imaluunniit kuisinneranut allagartaa
• Najugarisassinnut uppernarsaat
• Ukiup kingulliup siuliani ilaqutariit imaluunniit inoqutigiit ukiumut isertitaasa uppernarsaataat. Uppernarsaatit meeqqavit meeqqerivimmiinneranut akiliisarnissamut naatsorsuinissamut atorneqassapput

 

Utaqqisut allattorsimaffiat

Illoqarfimmi nunaqarfimmiluunniit najukkanni ulluunerani paaqqinnittarfimmut utaqqisunut allattorsimaffeqarsinnaavoq.

Utaqqisunut allattorsimaffeqarneranut patsisaasut marluusinnaapput. Siulleq tassaavoq inissat amigarnerat, aappaalu tassaalluni ulluunerani paaqqinnittarfimmut kikkut siulliullutik inissinneqassanersut kommunit ataasiakkaat aalajangersorsinnaammassuk.

Kommunit meeqqanik ulluunerani paaqqinnittarfimmut tulleriiaaralutik inissarsiuussinerat ima pisarpoq:

• Meeqqat ineriartornerminni ajornartorsiuteqartut
• Meeqqat meeqqerivimmeereersut, soorlu meeraaqqerivimmiit meeqqerivimmut nuuttussat
• Angajoqqaat kisimiittut suliffillit ilinniartulluunniit meeraat
• Angajoqqaat tamarmik suliffillit ilinniartulluunniit meeraat
• Angajoqqaat aappaannaa suliffilik ilinniartorluunniit meeraat
• Angajoqqaat arlaannaaluunniit suliffeqaranilu ilinniartuunngitsut meeraat

Najukkanni inissanik innersuussisartoq allassimasut allat saniatigut, ulluunerani paaqqinnittarfimmi inissamik innersuussinissamik neqerooruteqartarpoq.

 

Inissaq akiligassaanngitsoq

Inissaq akiligassaanngitsoq tassaavoq meeqqanut meeqqat angerlarsimaffianni angajoqqaarsianiluunniit najugalinnut ulluunerani paaqqinnittarfimmi inissaq. Inissat akeqanngitsut paaqqinnittarfiup, angajoqqaarsiat kommunimilu isumaginninnikkut oqartussaasut, soorlu sullissisup, akornanni suleqatigiinnikkut agguataarneqartarput.

Meeraq angajoqqaarsiamini meeqqalluunniit angerlarsimaffianni najugaqartilluni inissami akiligassaanngitsumiittuarsinnaavoq.

 

Naammagittaalliuuteqarneq

Meeqqavit ulluunerani paaqqinnittarfia naammaginngikkukku naammagittaalliuuteqarnissannut pisinnaatitaaffeqarputit. Soorlu makkua naammagittaalliuutigisinnaavatit:

• Meeqqavit utaqqisut allattorsimaffianni inissisimanera
• Angerlarsimaffimmi paarsisussamik atorfinitsitsineq

Najukkanni kommunalbestyrelsimut naammagittaalliuuteqarsinnaavutit. Naammagittaalliuutit allagaassaaq, eqqaamajullu pappialat naammagittaalliuutinnut tunngassuteqartut ilanngutissagakkit.

Naammagittaalliuutivit kommunalbestyrelsimit aalajangiiffigineqarnera naammaginngikkukku, Isumaginninnermi Naammagittaalliuuteqartarfimmut ingerlateqqissinnaavat.

Isumaginninnermi Naammagittaalliuuteqartarfimmut naammagittaalliuuteqarit

Kommunalbestyrelsip naammagittaalliuutinut allanut tunngasunut aalajangiineri naammaginngisatit oqartussaasunut allanut ingerlateqqissinnaanngilatit.