Tarnip pissusaanik immikkut ilisimasalik aqutsisutut sulisussaq ujartorneqarpoq

Meeqqanik inuusuttunillu siunnersuisarfimmi (MISI-mi) tarnip pissusaanik immikkut ilisimasalik aqutsisutut sulisussaq Kommune Qeqertalimmit ujartorneqarpoq
Qinnuteqarfissaq:
30. november 2018
Sumi:
Aasiaat
Ulloq aallartiffik:
1/11 imalt. isumaqatigiissuteqarnikkut
Akissarsiat:
Isumaqatigiissutit malillugit
Meeqqat inuusuttuaqqallu ajornartorsiutaannik suliaqarneq nuannaraajuk? Kommune Qeqertalimmi perorsaanermik, tarnip pissusaanik siunnersuisarfimmik massakkut pilersitsiniarnitsinni tarnip pissussaanik immikkut ilisimasalik aqutsisutut sulisussaq ataaseq ujartorparput.
 
Meeqqanik inuusuttunilu siunnersuisarfik (MISI) suliaqarfiup INUIT ilaaniippoq, tassanngaanniit kommunimi suliaqarfiit assigiinngitsut pisarialimmik suleqatigiinnissaat qulakkeerneqartarpoq. Meeqqanik inuusuttuaqqanillu suliaqarnermi tamakkiisumik paasissutissanik siuarsaanissaq kommunip periusissiaani MISI pingaarutilittut inissisimavoq.
 
MISI-mi oqaloqatiginninneq atorlugu misissuisarpugut aaqqissuulluakkamillu tunngaveqartumik sulisarluta. Inersimasut meeqqanut akisussaasuusut, meeqqat ilikkagaqarnissaannik, iluarisimaarnissaannik ineriartornissaannillu qulakkeerinninnissamut paasisanik sakkussanillu pissarsinissaat suliassaraarput pingaarnerpaaq. Taamaattumik sulinitsinni pingaarnertut suliassarput tassaavoq, perorsaanikkut tarnillu pissusiinik ilisimasalittut angajoqqaanut aammalu meeqqanik inuusuttuaqqanillu ukioqanngitsuniit 18-it angullugit ukiulinnik sullissisunut siunnersuineq. 
 
Tarnip pissusaanik ilisimasalittut suliaqarfinnit assigiinngitsuneersut peqatigalugit perorsaanikkut tarnillu pissusaatigut siunnersuineq suliarissavat.  Taakkua saniatigut namminersorlutit MISI-mi ajornartorsiutinik misissuinerit inuttut, suleqatigiikkaatut aaqqissuussaanikkullu suliarisassavatit.  Immikkoortortami sulianik ilinniakkamut tunngasunik, suleqatigiinnermik pitsaasumillu kiffartuussinermik pingaartitsisumi suleqataalissaatit.
 
MISI pilersinniarneqarleruttorpoq, taamaattumik illit isummatit pitsaasut tassunga ilanngutissallugit periarfissaqangaatsiassaatit.
 
Siunnersuisarfik Aasianni inissisimavoq, taamaattorli kommuni tamakkerlugu, illoqarfinnik pingasunik nunaqarfittaanillu ilalik, sullissisarpugut. Taamaattumik sulinermut atasumik angalasarneq atorfimmut uunga ilaavoq.
 
Akisussaaffiit:
 
• Perorsaasutut aamma tarnip pissusiinik ilisimasalittut siunnersuisarneq.
• Atuarfeqarfiit ulluuneranilu paaqqinnittarfiit qanimut suleqatigineqassapput.
• Angajoqqaat, ilinniartitsisut perorsaasullu siunnersorneqarneri ilitsersorneqarnerilu
• Meeqqap ilagisartagai suleqatigalugit meeqqap ineriartornissaa, atugarissaarnissaa ilinniarnissaalu siuarsarniarlugit MISI misissuisarpoq nalilersuisarlunilu kiisalu suliniutit piviusorsiortut atorlugit ujartortarlugit.
• Tarnip pissusaanik nalunaarusiorneq.
• MISI-mi atorfillit allat peqatigalugit ilinniagaq aallaavigalugu inerisaaneq aaqqissuussaanikkullu ineriartortitseqataaneq.
• Pisortaq qaninneq isumaqatigalugu allanik suliaqarneq.
 
Ataani allassimasut amerlanersaat ilinnit naammassineqarsimassasut naatsorsuutigaarput: 
 
• Tarnip pissusiinik ilisimasalittut ilinniarsimasuusutit, akuersissuteqarlutillu, piumasaqaataanngilarli. 
• PPR-imi sulinermik ilisimasaqartutit, ajornanngippallu misilittagaqartutit.
• Ilinniartitsisut, perorsaasut angajoqqaallu siunnersorlugillu aqqutissiuutissallugit sulinissarnut piareersimasutit.
• Ilinniagaq aallaavigalugu suliallit piginnaasaasa pitsanngorsarneqarnissaannik piareersimasutit, ilaatigut oqalugiarluni saqqummiineq, atuartitsineq qanimullu sullissinerit siunnersuusiorfigisarnissaannik piareersimassaatit.
• Inuit assigiinngitsorpassuit oqaloqatiginissaannut inissisimaffiinilu naapinnissaannut piumassuseqarputit piginnaaneqarlutillu.
• Namminersorlutit sulisinnaassutit
• Aaqqissuussaanermi ineriartortuartumi sulerusussuseqartutit
• Kalaallit Nunaanni inuiaqatigiinni pissutsinik ilisimasalik aamma kalaallisut oqalussinnaaneq iluaqutaassaqaaq.
 
Neqeroorutigisinnaavagut:
 
• Suliffik soqutiginartoq unammillernartorpassualik.
• Suleqatigiit suliffiullu pilersikkiartornerani peqataangaatsiarneq.
• Ilinniagaq aallaavigalugu inuttullu ineriartornissamut periarfissat pitsaasut.
• Namminersorluni sulisinnaaneq suleqatigiinnilu suleqataasinnaaneq
 
Piffissaq suliffiusartussaq tassaavoq sap.ak. akunnerit 40-t.
 
Meeqqanik pinerliisimannginnermut uppernarsaat
 
Atorfik una meeqqanik pinerliisimannginnermut uppernarsaammik pisussaatitaaneq pillugu inatsimmut ilaavoq.  Inatsit naapertorlugu kommunip meeqqanik pinerliisimannginnermut uppernarsaatip kommunimit tiguneqarnerata kingorna aatsaat atorfinittoqarsinnaavoq. Taamaattumik naalagaaffiup politiivinit meeqqanik pinerliisimannginnermut uppernarsaammik naammaginartumik kommunimi pissarsisoqareerpat aatsaat atorfinittoqarsinnaasoq, erseqqissaatigissavarput.
 
Akissarsiat atorfinitsitaanermilu atugassarititaasut:
 
Kalaallit Nunaanni Namminersorlutik Oqartussat kattuffiullu isumaqatigiinniarsinnaatitaasup akornanni isumaqatigiissut atuuttoq naapertorlugu akissarsiaqartitsisoqarlunilu atorfinitsitsisoqassaaq.
 
Atorfik inissaqartitsivoq, taamaattumik qularnaveeqqummut ineqarnermullu, atuinermut il. il. akiliisoqartassaaq matumani Kalaallit Nunaanni Namminersorlutik Oqartussat kommunillu Kalaallit Nunaanni illuutaannut ineqarnermut akiliuteqartarnermut maleruaqqusat qaqugukkulluunniit atuuttut naapertorlugit akiliisoqartassaaq. Atorfininnerup nalaani atorfimmut atasumik inimik innersuussisoqarsinnaatinnagu sulisut atorfimmut atasumik ineqarnissaminnik tunineqarsinnaatitaasut utaqqiisaasumik ineqarnissaminnut neqeroorfigineqartassapput.
 
Atorfininnermi angalanermut pequtillu nassiunnerinut malittarisassat atuuttut naapertorlugit sulisitsisoq akiliussissaaq.
 
Kommune Qeqertalimmi pisortaaneq pisortarissavat qaninneq
 
Piffissap qinnuteqarfiusup kinguninngua isumaqatigiissuteqarnikkulluunniit atorfik inuttalerneqarusuppoq.
 
Paasissutissat sukumiinerusut
 
Atuarfeqarfinnut, sunngiffimmut kulturimullu ataqatigiissaarisumut, Hector Lennert Sørensenimut oqarasuaat (+299) 38 70 35 mailimulluunniit: hlso@qeqertalik.gl,  saaffiginnilluni aamma nittartagaq www.qeqertalik.gl aqqutigalugu pissarsiarineqarsinnaapput.
 
Qinnuteqaat
 
Ilinniarnivit siornatigullu suliffigisimasavit naatsumik oqaluttuassartai paasissutissiissutigalugit (CV-eq), kiisalu ilinniakkap uppernarsaatai oqaaseqaatillu kingusinnerpaamik ulloq 30.november 2018 tigoreersimassavagut aamma taakkua mailimut uunga kingusinerusukkut nassiunneqarsinnaapput qeqertalik@qeqertalik.gl. Tamatuma kinguninngua atorfinitsitsiniarluni oqaloqateqartoqassasoq ilimasuttoqassaaq.
 
Kommune Qeqertalik tassaavoq Qeqertarsuup Tunuata kujasinnerusortaani kommuni nutaaq pilersinneqaqqammisoq. Kommunerput sisamanik illoqarfeqarpoq arfineq-pingasunillu nunaqarfeqarluni aamma kommunip suliai suni tamani ersittuunissaat anguniagaraarput. Sulisutta pitsaasumik kiffartuussinertik takutissavaat aamma kommunimi sulineq  kalaallit naleqartitaannut kulturikkullu tunuliaqutaannut nalimmassassallugu kissaatigaarput. Aaqqissuussaanerput nutaaq pillugu uani itinerusumik atuarit:

Aasiaat Qeqertarsuup Tunuata kujasinnerusortaani qeqertamiippoq. Qeqertaq qeqertarpassuit iluatungaaniippoq aamma imaq qeqertap qanittuaniittoq qajartorfissaqqilluartutut ilisimaneqarpoq kiisalu Kalaallit Nunaanni arfernit imartarput nuannarineqarluartartoq aamma ilisimaneqaatigaarput. Illoqarfik Kalaallit Nunaanni illoqarfiit annersaasa tallimaraat 3.100-t missaanni najugaqarfigineqartoq aamma kommuni katillugit 6.500-t missaanni najugaqarfigineqarpoq. (qilalukkat qimmillu qimuttut minillugit).