Suliniutit anguniakkallu pingaarnersiukkat

April 2017

1. Illoqarfinni tamani innuttaasunik sullissinerup pitsaanerpaamik ingerlanneqarnissaa siunertaralugu allaffissornermi ingerlatsiviit aningaasanik nammineq aqutaqarlutik aaliangiisinnaanerat nukittorsarneqassasoq, Inunnik Isumaginninnermi sullissiviit, Meeqqat Atuarfii, Meeqqeriviit il.il. (kontrakt styring)

 

2. Nunaqarfinni Aqutsisut nammineersut 1 januar 2018 aallarnerfigalugu aningaasanik aqutaqarlutik namminneq aqutsilissasut.

 

3. Sumiiffimmi siunnersuisoqatigiit (Lokalråd) pilersinneqassasut kingusinnerpaamik 2019-mi.

 

4. Meeqqanik, inuusuttunik, utoqqarnik innarluutilinnillu sullissineq eqqarsaatigalugu innuttaasunillu sullissineq pitsanngorsarniarlugu isumaginninnikkut malunnaatilimmik nukittorsaasoqassooq.

 

5. Kulturikkut naleqartitagut timersorneq, qimusserneq, nipilersorneq, erinarsorneq, isiginnaartitsineq, atuakkiorneq, filmiliorneq, inuiattullu nutaaliortuarnerput pingaartillugu ineriartortitsissuugut.

 

6. Utoqqarnut, innarluutilinnut, meeqqanullu siunnersuisoqatigiit pilersinneqassasut ersarissumik taakkununnga politikkiliornissaq siunertaralugu.

 

7. Kommune inuutissarsiornermi suliffeqarfinnik namminersortunillu allanik annertusaaffigissallugu orniginartuunissaa siunertaralugu illoqarfiit nunaqarfiillu nutartikkamik innuttaasut suliffeqarfiillu namminersortut peqatigalugit pilersaarusiorfigineqassapput.

 

8. Kommunip pilersaarusiornera sanaartugassat, inuussutissarsiutinillu ineriartortitsineq ataqatigiimmata Namminersorlutik Oqartussaniit sanaartugassat pillugit oqartussaaffik annertunerusoq aningaasanillu malitseqartoq kommunimut pilertornerusumik nuunneqarnissaa sulissutigissuarput.

 

9. Takornariaqarnikkut inuutissarsiutinillu allanik eqaannerusumik siuarsaanissaq siunertaralugu Naalakkersuisut qanimut suleqatigalugit Kangaatsiami, Qeqertarsuarmi, Qasigiannguanilu suluusalimmik mittarfiliassat siuartinniarneqarnissaat piaartumik sulissutigineqassooq.

 

10. Qasigiannguani erngup nukiganik nukissiorfiliassaq pilertornerusumik suliarineqalernissaa anguniarneqassasoq Aasiaat Kangaatsiaq taakkulu nunaqarfiisa iluaqutissarsiffigisinnaasaat ilanngullugu.

 

11. Ingerlatsivinnik illoqarfiit akornanni siammaasoqarsinnaanera pillugu aqutsinikkut sunniutaasinnaasut assigiinngitsut pillugit misissorneqassapput.